نن د افغانستان د خپلواکۍ د رسمي اعلان 96 کلیزه ده.
سره له دې چې افغانستان هیڅ کله هم د بریتانیې د واکمنۍ برخه نه خو د [Anglo-Afghan Treaty] تړون، د دې هېواد بشپړې خپلواکۍ ته رسمیت ورکړ.
افغانستان د 1919 [میلادي] کال د اګست په ۱۹ چې د اسد [زمري] له 28 سره برابريږي، له بریتانیې سره د شوي تړون پراساس، د خپلې ازادۍ رسمیت اعلان کړ.
د افغانستان د خپلواکۍ معاهده د 1919 میلادي کال د اګست په 8 د افغانانو او انګلیسانو د دریمې جګړې په پای کې لاسلیک شوې وه.
په دې معاهده کې چې د راولپنډۍ تړون هم ورته ویل کیږي، بریتانیې ومنله چې د بریتانوي هند قلمرو به په خیبردره پورې محدود وي.
د خپلواکۍ اعلان په افغانستان کې د یوې نوې دورې د پيل په توګه ومنل شو.
د هغه مهال پاچا اعلی حضرت امان الله خان چې د ازادي د مبارزې سرلاری ګڼل کیږي، د استقلال تراعلان وروسته په دې هېواد کې د سیاسي، ټولنیزو او اقتصادي اصلاحاتو یوی نوی دور پيل کړ.
د پاچا امان الله خان د هڅو په پایله کې، د افغانستان په پوځ کې اصلاحات راغلل، غلامي او جبري کارونه منع شول او د ښځو ازادۍ ته د درناوی ږغ وشو.
دا هغه اقدامات دي چې په سیمه کې یې هغه مهال ساری نه درلود.
په ننګرهارکې چارواکي وايي چې د اعلی حضرت امان الله خان د مقبرې شاوخوا ته یې سږکال د سترجشن لپاره تیاری نیولې.
سږکال به د استقلال د لمانځلو رسمي مراسم په جلال اباد ښارکې ترسره شي.
د ازادي راډيو خبریال وايي، د جلال اباد ښارپه لارو او سرکونو د شاه امان الله پوسترونه ځړول شوي او د ځانګړو نندارو تیاری نیولې شوې ده. د ننګرهار والي سلیم خان کندزي ازادي راډیوته وویل:
((موږ ملکي او نظامي تیاری نیولې، د شاوخوا ولایتونو والیان او مشران هم را بلل شوي چې په دې جشن کې ګډون وکړي.))
په جلال اباد کې د استقلال د 96 کلیزې د لمانځلو رسمي مراسم په داسې حال کې ترسره کیږي چې په کابل کې د امریکا سفارت د یولړسترو حملو د امکان له امله خبرداری ورکړی دی.
د امریکا د بهرنیو چارو وزارت په افغانستان کې خپلو ملکي او پوځي مامورینو ته د شدید احتیاط خبر ورکړی او په سترو غونډو کې له ګډونه یې منع کړي دي.