د هرات خلکو پرون د سلما بند د کارد بشپړیدو او د بند پرانیستل کیدو هرکلی وکړ.
هراتیانو پرون [دوشنبه] د ښارپه ورزشي سټیدوم کې ډولونه وهل او اتڼونه یې وکړل.د هرات ښار یو اوسیدونکی وايي:
((موږ ډيرخوشاله یو. زموږ دا هیله ده چې خپل برق به تولیدوو او د ګاونډيو پر بريښنا به زموږ اتکا پای ته ورسیږي.))
د سلما بند د جوړیدو کار د یک شنبې په ورځ بشپړ شو.
د افغانستان د اوبو او انرژۍ وزارت وايي چې دا بند۸۰ زره هکټاره ځمکه اوبولای شي او د ۴۲ میګاواټه برق د تولید ظرفیت لري.
د سلما بند پرهريرود دریاب جوړ شوی چې کاسه یې د یک شنبې په ورځ د اوبو د ذخیره کولو لپاره وتړل شوه.
په هرات ښارکې پرون یو شمېرخلکو حکومت ته ډاډ ورکړچې د بند د امنیت په ټینګولو کې به همکاري کوي.د هرات یو اوسیدونکی وايي:
((د سلما بند له اوبو به د کرهنې او مالدارۍ په برخه کې د خلکو ډیرې ستونزې حل شي. دلته به هیڅ خبره هم نه کیږي. ولس د دې پروژې ملاتړ کوي. دا زموږ وطن ته حیاتي اهمیت لري او زموږ ژوند به ورسره ښه شي.))
افغان چارواکي وايي چې د سلما بند کاسه به په راتلونکو۱۱ میاشتو کې له اوبو ډکه شي.
سلما بند جوړولو کار په 1976 [میلادي] کال کې پيل شوی وو.
په هرات کې د مدني ټولنو ویاند علي جان فصیحي ازادي راډیو ته وویل چې ځیني هېوادونه ښايي د دې پروژې لپاره د خنډ جوړولو هڅې وکړي نو د افغانستان حکومت ته ښايي چې په سیمه کې امنیتي ځواکونه زیات کړي.علي جان فصیحي زیاته کړه:
((هریرود له هغو لویو دریابونو دی چې اوبه یې ایران ته ځي او له دې امله زه باور لرم چې د سیمې د امنیت ټینګیدل له ډیرو مهمو مسلو دی.))
د سلما بند پروژه د هند په مالي مرسته بشپړه شوه.د دې بند پر جوړولو ۳۰۰میلیونه ډالر لګیدلي دي.
د سلما بند کاسه۶۴۹ میلیون مترمکعب اوبه زیرمه کولای شي.
ولسمشرمحمد اشرف غني، قدرت ته تر رسیدو وروسته، د سلما بند د کارد لیدو لپاره هرات ته ولاړ او له خلکو سره یې ژمنه کړې وه چې دا پروژه به په لنډ وخت کې پرانیستل کیږي.