د اسلامي دولت په نامه ډلې یا داعش په روانه اونۍ کې د سوريې د پالمیرا لرغوني او د عراق د رمادي ښارونو په نیولو سره پر بغداد او دمشق فشار زیات کړی دی.
رویترز خبري اژانس وايي په سوریه اوعراق کې د داعش وروستیو پرمختګونو ددې ډلې پر ضد امریکا د مبارزې پر ستراتیژۍ چې یوازې په هوايي بریدونو پورې منحصره ده ،هم انتقادونه او شکونه پورته کړي دي.
د سوريې د بشري حقونو څارونکې ډلې ویلي د اسلامي دولت په نامه ډلې د سوريې پالمیرا ښار ته نژدې له عراق سره د دې هیواد سرحدي نقطه هم نیولې ده.
سپینې ماڼۍ ویلي د داعش له خوا د سوريې د پالمیرا ښار نیول د امریکا په مشرۍ نړیوال ائتلاف لپاره چې په سوریه او عراق کې د دې ډلې پر ضد هوايي عملیات کوي، شا تګ دی.
خو د سپینې ماڼۍ ویاند جوش ارنسټ ویلي د امریکا ولسمشر د کانګریس د جمهوري غوښتونکو له دې غوښتنې سره موافق نه دی چې د اسلامي دولت په نامه ډلې سره د جګړې لپاره دې امریکايي سرتیري واستول شي.
په همدې حال کې ملګري ملتونه وايي د پالمیرا ښار چې شاوخوا دوه سوه زره نفوس لري درېیمه برخه اوسېدونکي له سیمې وتلي دي.
د سوريې او د ملګرو ملتونو د کلتوري ادارې یونسکو چارواکو وېره ښودلې چې د اسلامي دولت په نامه ډله به په پالمیرا کې لرغوني اثار او تاریخي سیمې له مینځه یوسي.
دې ډلې په عراق کې ګڼشمیر لرغوني اثار او میوزیمونه ونړول.
د مصر د الازهر اسلامي ادارې په یوه بیان کې پر نړیوالې ټولنې غږ کړی چې د پالمیرا ښار د نړیدو مخه ونیسي. الازهر ویلي اسلام د کلتوري میراثونو د مینځه وړل خلاف دی.
د اسلامي دولت په نامه ډلې پالمیرا ښار په داسې وخت کې نیولی چې د روانې اونۍ په سر کې يې د عراق د انبار ولایت مرکز رمادي هم په خپل کنټرول کې واخست.
د امریکا ولسمشر که څه د داعش لخوا د رمادي نیول یو تکتیکي په شاه تګ بللی خو ټینګار کوي چې د اسلامي دولت په نامه ډلې پر ضد روانه مبارزه ناکامه شوې نه ده.
د پالميرا لرغونې سيمې عکسونه: