لویدیځې خبري رسنۍ وایي، د عراق امنیتي ځواکونو د قومي ملیشو په ملتیا د سې شنبې د ورځې په لومړیو کې د انبار ولایت په مرکز رمادي کې د یوه روغتون له ودانۍ څخه د اسلامي دولت وسله وال وایستل.
وسله والو د روغتون ودانۍ څو ورځې وړاندې اشغال کړې وه.
راپورونه وایي، پر روغتون د حکومتي ځواکونو د حملې پر مهال د اسلامي دولت لس تنه وسله وال ووژل شول. د رمادي ښار په نورو برخو کې هم د عراق د حکومتي ځواکونو د پرمختګونو راپورونه خپاره شوي دي.
د انبار ولایت د پولیسو قوماندان تورن جنرال کاظم فدوي عربي ژبې ورځپاڼې شرق الاوسط ته وویل، امنیتي ځواکونو وکړاى شول چې د رمادي ښار ۱۷ م سړک له وسله والو پاک کړي.
جنرال فدوي زیاته کړه، په دې نښتو کې د اسلامې دولت ۱۳ تنه وسله وال وژل شوي دي.
په عین حال کې د انبار د ولایتي شورا مرستیال فلاح العیسوي شرق الاوسط ورځپاڼې ته ویلي، د امنیتي ځواکونو د قوت او شمیر په زیاتیدو سره دوى د اسلامي دولت د وسله والو پرضد له دفاعي حالت څخه تهاجمي حالت ته رسیدلې دي.
ده د اسلامي دولت د وسله والو پر ضد د رمادي ښار په دفاع کې د امینتي او قومي ځواکونو د مېړانې ستاینه وکړه.
عراقي ځواکونو تېره اوونۍ هغه مهال پر رمادي ښار د اسلامي دولت د وسله والو د واکمن کیدو خبرداری ورکړی و چې دې ډلې د ښار د محاصره کولو لپاره هلې ځلې زیاتې کړي.
وسله والو د تیرې جمعې او شبنې په ورځو د رمادي ښار په مرکز کې یو شمیر حکومتي ودانۍ اشغال کړې وې.
د انبار ولایتي شورا وایي، د رمادي ښار یو شمیر کورنۍ بیرته خپلو کورونو ته ستنې شوې، خو په زرګونو بېځایه شوي خلک لا هم په بغداد کې پاته دي.
د رمادي ښار یو اوسیدونکی چې هبانیه سیمې ته بېځایه شوی، وایي: کوم کسان چې کورونو پریښودو ته اړ شوي، په ډېربد حالت کی ژوند کوي.
دغه کس په یوې ویدیو کې چې د سره صلیب کمېټې له خوا په فیسبوک کې خپره شوي، ویلي: په خیمو کې برېښنا او اوبه نه شته، دلته په سختو ناروغیو اخته کسان هم شته، تر اوسه هېچا له دوى سره مرسته نه ده کړې.