د افغانستان کرکټ بورډ وايي، افغانستان د کرکټ د نړیوالې شورا د بشپړ غړیتوب ترلاسه کولو ته نژدې شوی دی.
په داسې حال کې چې ملي لوبډله د کرکټ د نړیوال جام په لوبو کې د ګډون په مقصد نن اسټرالیا او نیوزیلنډ ته په سفر وخوځېده؛ کرکټ بورډ وايي، د نوې مرتبې له ترلاسه کولو سره افغانستان د غوراوي د آسانه پړاوونو له تېرولو وروسته د ۲۰۱۹ کال د کرکټ په نړیوال جام کې ګډون کولای شي.
د کرکټ بورډ ویاند فرید هوتک آزادۍ راډیو ته وویل؛ د افغانستان د کرکټ ملي لوبډله اوس د نړۍ له دولسو غوره لوبډلو څخه شمېرل کېږي او د بشپړ غړیتوب لرونکو هېوادونو سره به له دې وروسته ډېرې لوبې کوي.
د افغانستان د کرکټ بورډ هیله څرګنده کړې چې افغان لوبغاړي به په نړیوال جام کې چې نژدې دوه اونۍ وروسته پیلېږي او افغانستان به خپله لومړۍ لوبه له بنګلدېش سره کوي؛ ښه وځلېږي.