په بلخ ولایت کې امنیتي چارواکي د ملي ځواکونو په لیکوکې د ښځینه پولیسو له کموالي اندیښنه څرګندوي.
د بلخ امنیې قومندانۍ چارواکي وايي، چې د امنیتي ځواکونو په صفونوکې د ښځینه پولیسو کموالی او یا هم نشتون سبب شوی ترڅو دا ځواکونه له متعددو امنیتي ستونزو سره مخ شي.
د بلخ امنیې قومندانۍ چارواکي د ملي امنیتي ځواکونو په صفونو کې د ښځینه پولیسو له کموالي څخه اندېښنه څرګندوي.
سمنواله نجیبه د بلخ د امنیې قومندانۍ د جنسیتي او حقوقي څانګې مدیره د امنیتي ځواکونو په صفونو کې د ښځینه پولیسو له کموالي شکایت کوي او وايي، چې په امنیتي ارګانونو کې د ښځینه پولیسو نشتون سبب شوی ترڅو امنیتي ستونزې زیاتې شي.
مېرمن نجیبه وايي، چې دوی هڅه کوي ترڅو په راتلونکو دوو کلونوکې ۵ زره تنه ښځې د ملي پولیسو صفونو ته را جذب کړي:
"موږ ښځینه پولیسوته چې ابتدايي زده کړې یې ترسره کړې وي، ضرورت لرو، باید یې یاده کړم، چې تردمه د ښځینه پولیسو د نشتون له امله له ګڼ شمېرستونزو سره مخ شوي یو، په نږدې راتلونکي کې به ۵ زره نوي پولیس جذب شي."
ډېری مواقع په ټولنه کې نا سم دودونه او همدارنګه ځیني وخت هم مذهبي تندروه چلند سبب شوی، چې نسبت نارینوو ته د ملي ځواکونو په صفونو کې د ښځو ګډون په مراتبو لږ ووسي.
په عین وخت کې ځیني مذهبي علما وايي، چې د امنیتي ځواکونو په لیکوکې د ښځو ګډون هیڅ شرعي مشکل نه لري او په عین وخت کې باید کورنۍ د ملي ځواکونو په صفونو کې د خدمت کولو لپاره د خپلو لوڼو مخالفت ونه کړي:
"د هېواد امنیتي وضعیت ښه نه دی، دا یو اساسي ضرورت دی، چې د ملي ځواکونو په لیکو کې ښځې ګډون وکړي، هیڅ شرعي مشکل په کې نشته، له دې لوري باید کورنۍ د خپلو لوڼو مخالفت ونه کړي ترڅو د ملي ځواکونو په صفونو کې خدمت وکړي."
له بل لوري د بلخ ولایت د امنیې قومندانۍ چارواکي وايي، چې بلخ ولایت کې نسبت نورو لومړۍ درجه ولایتونو ته د پولیسو تشکیلات په مراتبو کم دي او له همدې امله نا امني په دې ولایت کې زیاته شوې ده.
د بلخ د امنیت امرعبدالرزاق قادري یې په اړه ازادۍ راډیوته وویل:
"په بلخ ولایت کې نسبت کندهار، هلمند، کابل او هرات ته د پولیس تشکیلات په مراتبو کم دي، دا موضوع سبب شوې ترڅو د امنیت ټنګښت په برخه ګن شمېرستونزې رامنځته شي."
په همدې حال د بلخ د مدني ټولنې استازي هم له کورنیو څخه غواړي، ترڅو د ملي ځواکونو په لیکو کې د نجونو د خدمت کولو سره مخالفت ونه کړي او دا موضوع په امنیتي برخه کې د ټولنې اساسي ضرورت ګني.
مجیب الرحمن حبیب زی، بلخ