د عراق د انبارولایت په هیت سیمه کې چې د سنیانو د قبیلې "بونمر" خلک اوسي؛ یو شمېر مشران وايي چې د اسلامي دولت په نوم وسله والې ډلې يې په تازه حمله کېلږترلږه اویا نارینه وژلي دي.
د ازادي راډیو د خبریال په وینا، عراقي امنیتي ځواکونو د شنبې په ورځ د "هیت" د بېرته نیولو لپاره عملیات وکړل او په سبا یې د اسلامي دولت وسله والو د غچ اخیستلو لپاره؛ د بونمر قبیلې اویا غړي ووژل.
په انبار کې د بونمر د قبیلې مشرانوازادي راډیو ته ویلي چې لږترلږه درې سوه کسان یې ورک دي او داسې ګڼي چې په هیت کې به د اسلامي دولت په نوم وسله والې ډلې بندیان کړي وي.
د بونمر قبیلې ډیر ځوانان په انبار کې د "صحوه" غورځنګ غړي دي چې د اسلامي دولت په نوم، د وسله والې ډلې پر ضد جنګیږي او له تیرو دوو اونیوراهیسې یې د دې ولایت لویدیز ته د هغوی د نفوذ د خپرېدو مخنیوی کړی دی.
رپوټونه وايي چې د اسلامي دولت په نوم وسله والې ډلې؛ د بونمر قبیلې سل ګونه کسان وژلي دي.
د عراق د کورنیو چارو وزارت او په سیمه کې یو قبایلي مشر وايي چې هلته قتل عام شوی دی.
د بونمر قبایلي مشرانو بي بي سي ته ویلي چې د اسلامي دولت په نوم وسله والې ډلې؛ په تیرودوو اونیو کې شپږسوه دېرش تنه وژلي چې ښځې او کوچنیان هم په کې وو.
رپوټونه وايي، د بونمر د خلکو داسې قتل عام او په یو شمیر نورو ښارونو لکه موصول او صلاح الدین کې د مذهبي اقلیتونو شکنجې او وژلو د اسلامي دولت په نوم د وسله والې ډلې پر ضد؛ د سني عراقیانو حسیاست زیات کړی دی.
په دې سیمو کې د سني عراقیانوقبایلو وسلې اخیستې او د اسلامي دولت په نوم د وسله والې ډلې پر ضد یې جنګ ته مخ اړولی دی.
خو په انبار کې سنیان وايي چې د دې مبارزې لپاره ډير محدود امکانات لري او د عراق پوځ د کافي وسلو او تجهیزاتو په ور رسولو کې ناکام شوي دي.
قبایلي مشرانو د عراق پر حکومت تور لګولی چې په دې مساله کې ملامت دی.
د بونمر د قبیلې یوه مشر نن دوشنبه واشنګټن پوسټ ته وویل چې دوی احساس کوي چې د عراق حکومت شا وراړولې او له پامه یې لویدلي دي.
دې قبیلې مشر ویلي: د عراق په حکومت کې اداري فساد دومره زیات دی چې هغه وسلې چې باید موږ ته راولیږي؛ په تور بازار کې یې خرڅوي.