د لاسرسۍ وړ لېنکونه

تازه خبر
جمعه ۸ سلواغه ۱۴۰۰ کابل ۰۴:۱۰

خبرونه

د اروپایي ټولنې مشرانو ″ټوسک″ د اروپایي کمیسیون د نوي مشر په توګه وټاکه

د اروپایي ټولنې مشرانو د پولنډ صدراعظم ډونالډ ټوسک د اروپایي کمیسیون د نوي مشر په توګه وټاکه.

د ایټالیا د بهرنیوچارو وزیرفرد ریکا موګریني هم د اروپایي ټولنې د بهرني سیاست د مشرپه توګه وټاکل شو.

د اروپایي کمیسیون مشرهرمان وان رامپوي چې د دندې موده یې پای ته رسیدلې، پرون د بلجیم په مرکز برکسل کې دا څرګندونې وکړې.

ډونالد ټوسک په یوه خبري غونډه کې وویل، چې هغه د اوکرایین په وړاندې یوه تندلاري نه بلکه یوه قوي دریځ ته اړتیا لري.

دی وایي، وروستی هدف باید د سولې ټینګول وي.

د ورځې تازه خبرونه دلته ولولئ

د اروپايي ټولنې د پناه غوښتونکو په ډله کې د افغانانو شمېر زیات شوی 

ارشیف; قطري الوتکه

تازه شمېرې ښيي چې په اروپايي ټولنه کې د پناه غوښتونکو په ډله کې د افغانانو شمېر زیات شوی دی.

د جرمني خبري اژانس په حواله، یوازې په نوامبر میاشت کې د اروپايي ټولنې او نورو اروپايي هېوادونو کې د پناه غوښتنې ۷۱زره ۴۰۰ درخواستونه ثبت شوي چې د اکتوبر میاشتې په نسبت ۹ سلنه زیاتوالی ښيي.

د اروپايي ټولنې چارواکو نن جمعه ویلي چې دا په ۲۰۱۶کال کې د کډوالو تر بحران وروسته د پناه غوښتونکو دویم لوړ شمېر دی.

د اروپايي ټولنې د پناه غوښتونکو ادارې، په حواله، په ثبت شویو درخواستونو کې ۱۳۰۰۰ یې د افغان وګړو دي چې ورپسې د سوریې د وګړو شمېر زیات دی.

په اګست میاشت کې پر افغانستان د طالبانو له واکمنېدو وروسته له افغانستانه د خلکو د مهاجرت اندازه زیاته شوې ده.

له هغې راهیسې له افغانستانه د خلکو د راایستلو یا تخلیې په عملیاتو کې په لسګونو زره افغانانو چې له نړیوالو ځواکونو او غربي حکومتونو سره یې کار کړی و، وایستل شول.

د قطر یوه لوړ-پوړي چارواکي پرون رویټرز خبري اژانس ته وویل چې دغه هېوادونه له افغانستان د خلکو د راایستلو لپاره بېرته الوتنې پیلوي.

د بلوچستان په کېچ سیمه کې ۱۰ پوځیان د وسله والو په بريد کې وژل شوي 

ارشیف؛ بلوچستان

د پاکستان پوځ وايي چې د بلوچستان په کېچ سیمه کې د دوی پر يوه امنيتي پوسته د وسله والو په بريد کې۱۰ سرتېري وژل شوي دي.

د پوځ د عامه اړيکو ادارې ای اس پي ار پرون په يو بيان کې ويلي چې دا بريد د سې شنبې او چهارشنبې په منځنۍ شپه وشو چې د ډزو په تبادله کې يو وسله وال هم ووژل شو او يوشمېر نور ژوبل شول.

بيان زياتوي چې امنيتي ځواکونو د وسله والو پرضد د لټون عمليات پيل کړي او تر دې دمه يې درې وسله وال نيولي دي.

بل خوا د بلوڅ بېلتون غوښتونکو ناقانونه ګرځول شوې ډلې "بلوچستان لبرېشن فرنټ" په يو خپور کړي بيان کې د دې بريد مسؤلیت منلی او د ۱۷ امنيتي سرتېرو د وژلو ادعا يې کړې ده.

کرکت؛ د پاکستان سوپر لیګ کې نن کويټه ګلېډيېټرز او پېښور زلمي سره مخ کېږي

د پاکستان سوپر لیګ

پاکستان کرکټ سوپر ليګ د اووم پړاو سيالۍ پرون په کراچۍ کې پيل شوې.

د دې ۲۰ اووريزه سياليو لومړۍ لوبه د ملتان سلطانز او کراچي کینګز لوبډلو ترمنځ وشوه.

کراچي کينګز لومړی بېټينګ وکړ او په ټاکل شويو ۲۰ اوورونو کې يې د پنځو لوبغاړو په سوځېدو ۱۲۴ منډې وکړې.

په ځواب کې ملتان سلطانز د درو لوبغاړو په سوځېدو سره په ۱۹م اوور کې هدف تر لاسه کړ او لوبه يې په اوو ويکټونو وګټله.

نن به د کويټه ګلېډيېټرز او پېښور زلمي لوبډلو تر منځ سيالي کېږي.

په کوټه کې رحمن الله ګربز او په پېښور ټيم کې نجیب الله ځدراڼ لوبیږي.

په روانو سياليو کې شپږ لوبډلې برخه اخلي او ۳۴ لوبې به کېږي.

د فبرورۍ تر اوومې به لومړۍ ۱۹ لوبې په کراچۍ کې او د فبرورۍ له ۱۰مې به وروستۍ ۱۹ لوبې په لاهور کې کېږي چې پايلوبه به يې د فبرورۍ پر ۲۷مه وي.

د تاجکستان او قرغزستان سرحدي سیمو کې په اوربند هوکړه وشوه

د تاجکستان او قرغزستان چارواکي

د تاجکستان او قرغزستان چارواکو په سرحدي سیمو کې تر یوې جګړې وروسته پر اوربند موافقه وکړه.

د تاجکستان د ملي امنیت دولتي کمېټې ویلي، په نښتو کې لږ تر لږه دوه ملکیان وژل شوي، د امنیتي ځواکونو د ۶ غړو په ګډون ۱۰ کسان ټپیان شوي.

بل خوا د قرغزستان روغتیا وزارت ویلي چې لږ تر لږه ۱۲ ټپیان روغتونونو ته لېږدول شوي دي.

د قرغزستان د اضطراري حالاتو وزارت ویلي چې د قرغزستان ۲۴۰۰ وګړي د شخړې له ساحې ایستل شوي دي.

د پنجشنبې ورځې نښتې له تېر کال راهیسې د دواړو هېوادونو ترمنځ تر ټولو سخت تاوتریخوالی و.

تېر کال هم په ورته نښتو کې لسګونه کسان وژل شوي وو.

دواړو خواوو پر یو بل تور ولګاوه چې پولې ته غځېدلې لارې یې بندې کړي او ډزې یې پیل کړې دي.

روسیه: د امنیتي اندېښنو په اړه مو د امریکا "مثبت ځواب" نه دی ترلاسه کړی

اوکرایني ځواکونو سره د امریکا مرسته

روسیه وايي، د اوکراین پر سر د خپلو امنیتي اندېښنو په اړه یې د امریکا له لوري "مثبت ځواب" نه دی ترلاسه کړی.

خو وايي چې په یو شمیر مسئلو د خبرو د دوام امکان شته.

لکه څنګه چې تمه کېده، متحده ایالاتو او ناټو د چهارشنبې په ورځ په ناټو کې د اوکراین د غړیتوب په مخ د دروازو د تړلو لپاره د مسکو غوښتنه رد کړه او ویې ویل چې په ختیځه اروپا کې د متحدو ځواکونو او پوځي تجهیزاتو په اړه خبرې نه کوي.

مسکو ته په یوه لیک کې متحده ایالاتو هغه څه تشریح کړل چې د اوکراین کړکیچ د حل لپاره "جدي ډیپلوماتیکه لاره" بولي.

اوس تمرکز پر دې دی چې ولسمشر پوتین به د امریکا وړاندیز ته څه ډول ځواب ووايي.

د هلمند په ګرشک کې د هاوان مرمۍ چاودنې ۱ ماشوم وژلی او ۲ نور یې ټپیان کړي 

ارشیف؛ په مهترلام کې چاودنې ماشومان ټپبان کړي

د هلمند ولایت په ګرشک ولسوالۍ کې د هاوان د یوې زړې مرمۍ چاودنې، یو ماشوم وژلی او دوه نور یې ټپیان کړي دي.

په هلمند کې د طالبانو د اطلاعاتو او فرهنګ رئیس حافظ راشد هلمندي ازادۍ رادیو ته وویل پېښه هغه مهال وشوه چې یوه ماشوم د ګرشک ولسوالۍ په سربند سیمه کې د هاوان له ناچاودې مرمۍ سره لوبې کولې.

هلمندی وایي:" پېښه په ګرشک ولسوالۍ کې رامنځ ته شوې ده. متاسفانه دولس- دولس نیمې بجې شااوخوا د ګرشک ولسوالۍ په سربند سیمه کې ماشومانو د هاوان یوه زړه مرمۍ موندلې وه، رااخیستې یې وه او په ډبرو یې ټکولې وه نو چاودېدلې ده."

په افغانستان کې د ناچاودو مهماتو د چاودنې په پېښو کې د انساني تلفاتو په شمېر کې زیاتوالی راغلی.

د مرغومي په ۲۰مه د ننګرهار ولایت په لعلپورې ولسوالۍ کې د هاوان د زړې مرمۍ په چاودنه کې د ۶ ماشومان په ګډون ۷ کسان او په سبا یې په همدې ولسوالۍ کې په ورته پېښه کې دوه مېرمنې ووژل شوې.

ایران: د امریکا د بندیزونو له امله د افغان کډوالو د ساتنې توان له لاسه ورکوو

د افغانستان-ایران پوله

ایران وايي چې د افغان کډوالو د ساتنې توان پردې هېواد د امریکا د بندیزونو له کبله له لاسه ورکوي.

ایراني رسنیو پرون په ملګروملتونو کې د ایران د سفیر او دایمي استازي مجید تخت روانچي له قوله خبر ورکړ چې نوموړي د امنیت شورا غونډې ته ویلي، ایران له زرګونه افغان کډوالو سره چې هره ورځ د دې هېواد قلمرو ته ننوځي لازمې مرستې کوي خو دی زیاتوي چې د متحدوایالاتونو د بندیزونو په نتیجه کې د ایران مالي سرچینې محدودېږي.

د فارس خبري اژانس د راپور له مخې تخت روانچي ویلي، که نړیواله ټولنه په ایران کې له ډېره افغان کډوالو سره د پام وړ او پر وخت مرستې ونه کړي نو تهران به په یوازې ځان له هغوی سره د مرستې د دوام توان نه لري.

د راپور له مخې په ملګروملتونو کې د ایران سفیر له نړیوالې ټولنې او په خاص ډول مرستندویو هېوادونو وغوښتل چې پر خپلو مکلفیتونو عمل وکړي او د افغان کډوالو لپاره نوري او اضافي مالي مرستې ځانګړې کړي.

د ملګروملتونو د شمېرنو له مخې په ایران کې څه کم اته لکه راجسټر شوي او شااوخوا دوه میلیون غیرقانوني افغان کډوال اوسېږي.

د افغانستان له ۱۹ کلنو کم عمره لوبډله نیمه پایلوبې ته ووته 

له ۱۹ کلنو کم عمره لوبډله

د افغانستان له ۱۹ کلنو کم عمره لوبغاړو د کرکټ د دې کتګورۍ د نړیوال جام په کوارتر فاینل لوبه کې سرېلانکا ته ماتې ورکړه او نیمه پایلوبې ته ووتل.

پرونۍ لوبه افغان لوبډلو پیل کړه او په ۴۸ اوورونو کې یې د ټولو لوبغاړو په سوځېدو سره ۱۳۴ منډې جوړې کړې.

د سرېلانکا لوبډلې ټول لوبغاړي په ۴۶ اوورونو کې وسوځېدل او ۱۳۰ منډې یې جوړې کړې.

په دې توګه افغانستان سرېلانکا ته د څلورو منډو په توپیر ماتې ورکړه.

افغانستان کرکټ بورډ ویاند فرید هوتک بېګا په دې اړه ازادۍ راډیو ته وویل:" افغان له نولس کلنو کم عمره لوبډلې په کوارټر فاینل سیالۍ کې سرېلانکا ته ستره ماتې ورکړه. د ویلو ده چې د دې لوبو لپاره افغان لوبغاړو پوره چمتووالی نیولی و، او تمه لرو چې انشالله په نیم پایلوبه کې به هم د افغانستان لپاره د پام وړ لاسته راوړنې ولري."

د نولس کلنو د یو ورځنیو لوبو نړیوال جام د جنوري په څوارلسمه په وېسټ اینډیز کې پیل شو او د فبروري تر پنځمې دوام کوي.

بلېنکن: که روسیه پر اوکراین  یرغل وکړي له سختو عواقبو سره به مخ شي

اوکرایني او امریکایي سرتېري

د امریکا د بهرنیو چارو وزیر انتوني بلېنکن وايي، که روسیه پر اوکراین د یرغل لاره غوره وګڼي نو له سختو عواقبو سره به مخامخ شي.

ښاغلي بلېنکن دا څرګندونې پرون له ازادۍ راډیو سره په ځانګړې مرکه کې وکړې.

بلېنکن پر مسکو غږ وکړ چې له اوکراین او لوېدیځ سره د روان کړکېچ د پای ته رسولو لپاره ډیپلوماسۍ ته مخه کړي.

نوموړي وویل:" موږ په خورا اګاهانه ډول عمل کوو. او هر لازم اقدام به وکړو څو مسکو ته دا روښانه کړو چې دوه لارې لري: یا د ډيپلوماسۍ او ډیالوګ لاره چې اختلافونه له سوله ییزې لارې حل شي او یا د یرغل لار چې په دې صورت کې به له سختو عواقبو سره به مخامخ شي."

بلېنکن دا څرګندونې یوه ورځ وروسته له هغه کوي چې واشنګټن د روسیې د تېرې میاشتې د اولتیماتومونو په ځواب کې خپل رسمي لیکلی دریځ اعلان کړ.

ښاغلي بلېنکن وویل، واشنګټن لاهم نه پوهېږي چې د اوکراین په اړه او د اروپا د امنیتي جوړښت د بدلون په برخه کې به د کریملېن وروستۍ پرېکړه څه وي.

د مسکو غوښتنه دا ده چې ناټو دې د اوکراین او ګرجستان په څېر د پخواني شوروي اتحاد جمهوریتونو ته غړیتوب نه ورکوي او د اروپا له ختیځه دې خپل ځواکونه او وسلې د ختیځې اروپا هغو سیمو ته په شا کړي چې په ۱۹۹۹ کال کې د ناټو له پراختیا مخکې ځای پرځای شوي وو.

روسیې ته د لوېدیځ خبرداری؛ د بالتیک سمندرګي د ګاز نل لیکه په نښه کوو

د بالتیک سمندرګي ته نږدې نظامي تمرینات

جرمني او متحدایالاتو خبرداری ورکړی چې که روسیه اوکراین اشغال کړي نو دوی به د بالتیک سمندرګي په تل کې د روسیې د ګاز نل لیکه په نښه کړي.

د جرمني د بهرنیو چارو وزیرې انالېنا بایربوک پرون د سلواغې په اوومه پارلمان ته په وینا کې وویل چې حکومت له لوېدیځو متحدانو سره په ګډه د بندیزونو پر یوه لویه او هر اړخیزه کڅوړه کار کوي چې د نارد سټریم دوه په نوم د ګاز دا نل لیکه هم په کې شامله ده.

هغې ژمنه وکړه چې که روسیه پر اوکراین برید وکړي نو له سختو عواقبو سره به مخامخ شي.

د نارډ سټریم دوه نل لیکې چې ۱۲۲۵ کیلومتره اوږدوالی لري او د روسیې ګاز به تر جرمني پورې رسوي، فعالېدو ته چمتو ده خو قانوني مراحل یې پاتې دي.

دا پروژه جرمني ته د روسيې د ګاز صادرات دوه ځلې زیاتوي خو نه د اوکراین له دودیزې لارې بلکې د بالتیک سمندرګي له لارې.

بل خوا په سیاسي چارو کې د امریکا د بهرنیو چارو د وزارت مرستیالې ویکتوریا نولانډ پرون خبریالانو ته وویل چې که روسیه پر اوکراین حمله وکړي نو د دې نل لیکې چارې به پرمخ ولاړې نه شي.

د قرغزستان او تاجکستان د سرحدي ځواکونو په نښتو کې ۱ ملکي وژل شوی

د تاجکستان-قرغزستان پولې ته نږدې سیمه

د قرغزستان او تاجکستان د سرحدي ځواکونو له خوا په لانجمن سرحد کې په تازه نښتو کې یو ملکي وګړی وژل شوی او ۲۱ نور ټپیان شوي دي.

د تاجکستان امنیتي چارواکو پرون ازادۍ راډیو ته وویل، د دې هېواد یو ملکي وګړی په دې نښتو کې وژل شوی او د سرحدي ساتونکو او ملکیانو په ګډون ۱۷ نور تپیان شوي دي.

دواړو لوریو د سرحدي سیمې د یوه سړک د بندولو او د نښتو د پیل پړه پر یوبل اچولې ده.

د قرغزستان د روغتیا وزارت د سیمې د یوه روغتیايي چارواکي په حواله وویل چې د دې هېواد ۴ سرتېري په چرو له لګېدو وروسته روغتون ته بیول شوي او د بېړنیو چارو وزارت وویل چې د دې سرحدي سیمې خلک له خپلو مېنو وځي.

د تاجکستاني رسنیو د راپورونو له مخې د دې هېواد د اړوندې سرحدي سیمې خلک هم له دې ځایه ایستل شوي دي.

د ډله ییز امنیت د تړون سازمان چې تاجکستان، قرغزستان یې غړي دي، ویلي دي چې د دې سازمان سکرتر جنرال د دواړو هېوادونو له پوځي چارواکو سره د نښتو د پای ته رسولو په اړه خبرې کړې دي.

مصطفی حدید په جرمني کې له خپل پخواني فوټبال کلپ سره یوځای شو

مصطفی حدید

افغان فوټبال لوبغاړی مصطفی حدید په جرمني کې له خپل پخواني فوټبال کلپ سره یوځای شو.

مصطفی حدید چې په ۲۰۰۹کال کې د افغانستان د فوټبال له ملي لوبډلې سره یو ځای شو، په ۲۰۱۶ کال کې جرمني ته کډوال شو او هلته یي د جرمني د فوټبال لیګونو په څو مطرح کلپونو کې د فوټبال ډګر په بېلابېلو موقعیتونو کې لوبې وکړې.

حدید په وروستیو کلونو کې د التونا۹۳ په نوم له فوټبال کلپه له وتلو وروسته د افغانستان ملي ټیم لپاره په څو کورنیو او بهرنیو سیالیو کې لوبه وکړه.

د فوټبال دغې وتلې څېرې په لومړیو کې د فوټبال ډګر په یرغلیزه لیکه کې لوبه کوله، خو د جنوبی اسیا فوټبال سیالیو په مهال د افغانستان فوټبال ملي لوبډلې په ترکیب کې بیا دفاعی کرښې ته ورستون شو.

حدید په دې وروستیو کې یوځل بیا د جرمني التونا۹۳ کلپ سره یوځای شوی دی.

د افغانستان د کرکټ له ۱۹ کلنو کم عمره لوبډله نن له سرېلانکا سره مخ کېږي

له ۱۹ کلنو کشره لوبډله

د افغانستان د کرکټ له نولس کلنو کم عمره لوبډله نن د نړیوال جام په کوارتر فاینل کې له سرېلانکا سره مخ کېږي.

د افغانستان کرکټ بورد ویاند فرید هوتک ازادۍ راډیو ته وویل، دغه لوبه د کربین په انټیګوا کې د کابل په وخت نن ماښام په پنځه نیمو بجو پیلېږي.

د ښاغلی هوتک په خبره د افغانستان د کرکټ لوبډله یادې لوبې ته پوره چمتوالی لري.

افغان لوبډلې تر دې دمه د نولس کلنو کرکټ نړیوال جام کې د ګروپي دور دوه ټیمونه پاپوا نیوګينې او زیمبابوې ته ماتې ورکړي خو پاکستان ته یې بایللې ده.

نننۍ لوبه د کوارټر فاینل یا یو څلورم وروستي دور له سیالیو ده چې ګټونکی یې نیمه پایلوبې ته وځي.

د پاکستان سوپر لیګ نن پیلیږي

ارشیف؛ د پاکستان سوپرلیګ 

د پاکستان سوپرلیګ لومړۍ لوبه نن د کابل په وخت د ماښام په اووه نیمو بجو د کراچۍ کېنګز او ملتان سلطان لوبډلو ترمنځ د کراچۍ ښار په ملي سټوډیوم کې ترسره کېږي.

په سږني PSL کې افغان ستوري محمد نبي عیساخېل، راشد خان، حضرت الله ځاځی، رحمان الله ګوربز او نور احمد لکڼوال هم اخیستل شوي دي.

محمدنبي به د کراچي کېنګز، راشد به د لاهور قلندرز، ځاځی به د پېښور زلمیو، ګوربز به د اسلام اباد یونایټیډ او لکڼوال به د کوټه ګلډيېټرز لوبډلو لپاره لوبېږي.

د شل اووریزو سیالیو دا لړۍ یوه میاشت- د فبروري تر ۲۷مې پورې دوام کوي او اوه لوبډلې په کې لوبیږي.

د PSL لوبې په ۲۰۱۶ کې پیل شوې او پخوا په متحده عربي اماراتو کې ترسره کېدلې خو سږکال په پاکستان کې دننه پلان شوې دي.

راپور: مرستندویې موسسې افغانستان ته پیسې نه شي لېږدولی

ډالر

په یوه نوي راپور کې څرګنده شوې چې د طالبانو واک ته له رسېدو وروسته پر افغانستان د لوېدیځو هېوادونو د اقتصادي بندیزونو له کبله مرستندویې موسسې افغانستان ته پیسې نه شي انتقالولی.

د راپور له مخې، له دې امله ملیونونه افغانان د بیړنیو مرستو له ترلاسه کولو محروم شوي دي.

په دې راپور کې چې د ناروې د کډوالو شورا خپور کړی، راغلي چې ناممکنه ده هغو ملیونونو کسانو ته مرستې ورسول شي چې اړتیا ورته لري مګر دا چې د امریکا د خزانې وزارت او نورې مرستندویې ټولنې فوري اقدام وکړي او بانکونو ته د پیسو د انتقال اجازه ورکړي.

نور راوښيه

XS
SM
MD
LG