د مالیزیا د هوايي شرکت د یوې الوتکې د نسکورېد د پېښې په اړه د تحقیقاتو لپاره هڅې چټکې شوي دي.
د راپورونو له مخې استرالیا چې یو شمېروګړي یې د دې پېښې په قربانیانو کې شامل دي، خپل لسګونه پولیس لندن ته استولي دي چې د نړېوالو څېړونکو په ډله کې اوکراین ته ولاړشي.
په همدې حال کې د اوکراین د روس پلوو بېلتونپالو مشر اعتراف کړی چې له دوی سره د الوتکو ضد هغه ډول میزایلونه شته چې یوه مالیزیایۍ الوتکه پرې وویشتل شوه.
پنځوس استرالیايي پولیس په اوکراین کې د یوې مالیزیایۍ الوتکې د نسکورېدو د پېښې په اړه د تحقیقاتو لپاره لندن ته رسېدلي دي او په پام کې ده چې له هغه ځایه به کېف ته ځي.
د استرالیا صدراعظم ټوني ابوټ Tony Abbott وايي، د هالنډ او د ده د هېواد د بهرنیو چارو وزیران به نن کېف ته ورسېږي او هغه موافقه به لاسلیک کړي چې اوکراین ته د څو هېوادونو د پولیسو د استول کېدو اجازه ورکوي:
″زه تاسو ته راپور درکوم چې د استرالیا حکومت پنځوس تنه پولیس افسران لندن ته واستول.
موږ چمتو یو چې خپل پولیس اوکراین ته واستوو څو د ملګرو ملتونو ترمشرۍ لاندې د نړېوال ټیم په ترکېب کې د پېښې د ځای امنیت ونیسي.
زموږ د بهرنیو چارو وزیره جولي بیشپ Julie Bishop به نن ناوخته د هالنډ د بهرنیو چارو له وزیر سره کېف ته ولاړه شي.
موږ له اوکراین سره د یوې موافقې لاسلیک غواړو څو له نړېوالو پولیسو سره د پېښې د ځای امنیت ونیسي.″
د استرالیا صدراعظم د اوکراین له ولسمشرپېتروپوروشینکو سره هم د تحقیقاتو لپاره د پېښې د ځای د امنیت په اړه خبرې کړي.
د راپورونو له مخې تر ۳۹ پورې استرالیایي اتباع هم د مالیزیایۍ الوتکې د نسکورېدو د پېښې په قربانیانو کې شامل دي.
په همدې حال کې د مالیزیا صدراعظم د خپل هېواد د هوايي کرښې د الوتکې د نسکورېدو د پېښې په اړه د تحقیقاتو په وړاندې د پرتو ستونزو له کبله غوسه څرګنده کړه.
نجیب رزاق نن په کوالالامپورکې د هالنډ په سفارت کې د خواخوږۍ د ځانګړي کتاب د لاسلیک پرمهال وویل:
″هو زه په غوسه یم. زه د پېښې ځای ته د څېړونکو بشپړ لاسرسی غواړم ځکه له بده مرغه دا د جګړې ساحه ده او تاسو پوهېږئ چې د جګړې په سیمه کې نه یوازې ساحې ته د رسېدو په وړاندې بلکې د څېړونکو د امنیت په برخه کې هم زیاتې ستونزې وي.″
له بلې خوا د اوکراین د روس پلوو بېلتونپالو قوماندان اعتراف کړی چې له دوی سره د الوتکو ضد هغه ډول توغندي شته چې واشنګټن وايي، د جولای په ۱۷ د مالیزیا د هوايي کرښې الوتکه پرې ویشتل شوې ده.
الکساندر خداکوفسکې له رویټرز خبري آژانس سره په یوه ځانګړې مرکه کې وویل، دی پوهېږي چې د بوک BUK په نوم دا توغندی د اوکراین له ختیځ ښار لوهانسک څخه توغول شوی دی.
بوک هماغه ډول توغندی دی چې په غالب ګومان د مالیزیا د هوايي شرکت مسافروړونکې الوتکه به پرې ویشتل شوې وي.
د بېلتونپالو قوماندانانو مخکې ویلي و، چې دا ډول توغندي لري خو د مالیزیايۍ الوتکې له نسکورېدو وروسته یې له دې انکار وکړ.
خداکوفسکې رویټرز آژانس ته وویل چې بوک توغندی له لوهانسک څخه او د لوهانسک د خلکو د جمهوریت تر بیرغ لاندې راغلی.