په جلال اباد کې د سره صلیب په دفتر په شوې حمله کې اوښتي زیان
افغان چارواکي وايي؛ چې په جلال اباد ښار کې د سره صلیب د نړیوالې کميټې پر دفتر د وسله والو په پروني برید کې د دې دفتر یو ساتونکی ووژل شو او یو تن برسیرن ټپی دی. د ننګرهار د امنیې قومندانۍ ویاند حضرت عمر مشرقیوال ازادی راډیو ته وویل؛ چې دا حمله د دوتنو له خوا شوې وه چې یوه یې ځان الوزولی او دوهم یې د امنیتي ځواکونو په ډزو کې وژل شوی دی. په همدې حال کې د سره صلیب نړیوالې کمیټې اعلان وکړ؛ چې په دې برید کې د دوی هیڅ مامور نه دی ژوبل شوی. مخکې د دې دفتر د بهرني مشراو یوه بل کارکونکي د ټپي کیدو ویل شوي و.