د لاسرسۍ وړ لېنکونه

تازه خبر
شنبه ۱۵ سلواغه ۱۴۰۱ کابل ۰۹:۳۳

افغانستان

د امریکا د بهرنیو چارو وزیر جان کري نن کابل ته را ورسید

د امریکا د بهرنیو چارو وزیر جان کري نن کابل ته را ورسید، د امریکا سفارت په یوې مطبوعاتي اعلامیې کې ویلي، چې نوموړی به له جمهور رییس حامد کرزي، ځینو نورو چارواکو او د مدني ټولنې له یو شمېر غړو سره وګوري.

نړېوالو رسنیو راپور ورکړی، چې جان کري به د څلورویشتو ساعتونو لپاره په کابل کې وي.

د امریکا د بهرنیو چارو د وزیر په توګه دا کابل ته د ښاغلي کري لومړی سفر دی.

د ورځې تازه خبرونه دلته ولولئ

امریکا د افغانستان لپاره د ملګرو ملتونو وګړو صندوق د کار له تمدید ملاتړ وکړ

په نیویارک کې د ملګرو ملتونو سازمان ودانۍ

په ملګرو ملتونو سازمان کې د امریکا متحده‌ایالاتو ځانګړې استازولۍ، د یوه بل کال لپاره د افغانستان لپاره د ملګرو ملتونو د وګړو صندوق د کار له تمدید ملاتړ څرګند کړی.

په دې سازمان کې د ملګرو ملتونو استازولۍ پرون ناوخته یوه اعلامیه کې لیکلي، متحده‌ایالات د اسټرالیا، اتریش، بلجیم، کاناډا، هالنډ، نیوزیلنډ او انګلستان په ګډون په افغانستان کې د ملګرو ملتونو د وګړو صندوق د کار له تمدید ملاتړ کوي، څو دا اداره وکولای شي د افغانانو بشري او اساسي اړتیاو پوره کولو کې مرستې ته دوام ورکړي.

دې ادارې په خپله اعلامیه کې د طالبانو له‌خوا د افغان نجونو او ښځو په زده‌کړو، کار او نورو ټولنیزو برخو کې لګول شوي محدودیتونه هم غندلي او له طالبانو یې غوښتي چې دا ډول تبعیضي او ضد تولیدي تګلارې چې د بشري حقونو او بنسټیزو ازادیو مخه نیسي، بېرته واخلي.

په ملګرو ملتونو کې د متحده‌ایالاتو د ځانګړې استازولۍ اعلامیه کې زیاته شوې، د طالبانو پرېکړو لا د مخه په سوړ ژمي او دې سخت اقتصادي حالت کې د مهمو مرستو د رسولو مخه نیولې ده.

ملګرو ملتونو کې د امریکا استازولۍ په افغانستان کې د مرستو رسولو برخه کې له ښځینه کارکوونکو هم ملاتړ ښودلی، څو په خبره یې، د ښځو او نجونو په ګډون تر ټولو زیان منونکي نفوس ته بشپړ، خوندي او بې خنډه لاسرسی دوام ومومي.

مک‌کال: په افغانستان کې د ښځو وضعیت خراب شوی

د امریکا متحده‌ایالاتو د استازو جرګې د بهرنیو اړیکو کمېټې مشر مایکل مک‌کال

د امریکا متحده‌ایالاتو د استازو جرګې د بهرنیو اړیکو کمېټې مشر مایکل مک‌کال وايي، له هغه وروسته چې امریکايي سرتېري له افغانستان ووتل، په دې هېواد کې د ښځو وضعیت خراب شوی دی.

مک‌کال دا څرګندونې د استازو جرګې ته، واشنګټن کې د افغانستان د پخوانۍ سفیرې رویا رحماني د بلنې په مناسبت کړې دي.

د استازو جرګې د بهرنیو اړیکو کمېټې له‌خوا یوه خبرپاڼه کې چې پرون ناوخته خپره شوې لیکل شوي، افغانستان کې له ښځو هر ډول ازادي اخستل شوې، ښوونځیو ته نه‌شي تلای او ان بې له محرمه د سفر اجازه هم نه‌لري.

د استازو جرګې د بهرنیو اړیکو د کمېټې په خبرپاڼه کې په افغان نجونو د پوهنتونونو تړل کېدو، پارکونو ته یې په تلو بندیز، نادولتي موسسو کې یې د کار مخنیوي او یو شمېر نور بندیزونه هم یاد شوي.

خبرپاڼه د مک‌کال له قوله لیکي، افغانستان په نړۍ کې یوازینی هېواد دی چې طالبانو په کې ښوونځي او پوهنتون ته د نجونو د تلو مخه نیولې.

د امریکا متحده‌ایالاتو د استازو جرګې د بهرنیو اړیکو کمېټې مشر وايي، د استازو جرګې ته یې د رویا رحماني له بلنې موخه دا ده چې افغان ښځو ته یو پيغام ورسوي چې دوی نه‌دي هېرې شوي.

هالنډ د ارزګان د ۲۰۰۷ کال پېښې قربانیاتو ته تاوان ورکوي

د هالنډ بیرغ

د هالنډ حکومت وایي، دوی به د محکمې د هغې پرېکړې لپاره استېناف ته مخه نه کړي چې په ۲۰۰۷ کال کې یې هالنډي پوځیان په افغانستان کې د بمبارۍ پرمهال د شلو ملکیانو پر وژنه تورن کړي دي.

په هاګ کې یوې سیمه ییزې محکمې په نومبر کې د هالنډ له حکومته غوښتې و چې د پېښې د قربانیانو کورنیو ته دې تاوان ورکړي.

د هالنډ دفاع وزارت مخکې ویلي و چې دوی د ارزګان په چوره ولسوالي کې پر یوې کلا هغه وخت بمباري وکړه چې له هغه ځایه طالبانو د دوی پر هلکوپترو ډزې کړې وې.

د هالنډ دفاع وزیرې کاجسا اولونګرین د جمعې په ورځ په یوه لیک کې چې د پارلمان غړیو ته یې واستاوه څرګنده کړه چې پر دې پېښې پنځلس کاله تېر دي نو اوس د وضاحت لپاره ډېر څه په لاس کې نه لري نو استېناف ته مراجعه نه کوي او د اوښتي زیان غرامت به ورکړي.

یونېسف: د افغان ماشومانو او مېرمنو ملاتړ ته دوام ورکوو

ارشیف: په خوست کې د یونېسف له لوري د مرستې رسونې یو انځور

د افغانستان لپاره د ملګرو ملتونو د ماشومانو د وجهي صندوق یا یونېسف نوی استازی فران ایکویزا وایي، د افغانانو په ځانګړي ډول د ماشومانو او مېرمنو ملاتړ ته به دوام ورکړي.

ایکویزا پرون په افغانستان کې خپل ماموریت پیل کړ.

ده وویل، افغانستان د نړۍ په کچه له یو سخت ناورین سره مخامخ دی نو د یونېسف ماموریت ډېر مهم دی.

ایکویزا زیاته کړه چې د یونېسف نه ستړې کېدونکې ډله به خپل کار ته ادامه ورکړي.

د طالبانو له لورې په نادولتي موسسو کې د ښځو پر کار بندیز دا اندېښنې پیدا کړي چې بشري وضعیت به پسې خراب شي ځکه چې یو شمېر موسسې کار ته زړه نه ښه کوي.

د ملګرو ملتونو د بشري مرستو د همغږۍ د ادارې له اټکل سره سم په دوه زره درویشتم کال کې به تر اته ویشت میلیونه ډېر افغانان نورو بشري مرستو ته اړ شي.

د بشري حقونو ځینو بنسټونو د 'اسماعیل مشعل' د خوشې کېدو غوښتنه کړې

اسماعیل مشعل د کابل په سړکونو د زرګونه کتابونو د وړیا وېش لړۍ پیل کړې وه.

د بشري حقونو یو شمېر بنسټونو د طالبانو له لوري د پوهنتون د استاد اسماعیل مشعل نیول غندلي او د هغه د سمدستي خوشې کېدو غوښتنه یې کړې ده.

د بشري حقونو د څار ډلې د افغانستان د برخې څېړونکې سحر فطرت ازادي راډیو ته تېره شپه وویل چې له نږدې یو نیم کال راهیسې د طالبانو له لوري په افغانستان کې مدني اعتراضونه ځپل کېږي.

فطرت وویل: "طالبانو د پوهنتون د استاد اسماعیل مشعل له نیولو سره چې د ښځو د زده کړو لپاره یې مدني اعتراض کاوه، دا څرګنده کړه چې دوی هر هغه حرکت، هر هغه غورځنګ، فکر او نظریه چې د ښځو په تړاو د دوی له ځپونکو قوانینو سره په ټکر کې وي، ځپي."

له دې سره په ورته وخت کې د بخښنې نړیوال سازمان هم په یوه ټویټ کې د طالبانو له لوري د اساعیل مشعل نیول غندلي دي.

د طالبانو د اطلاعات او فرهنګ وزارت یوه چارواکي اسماعیل مشعل تورن کړی دی چې د دوی د نظام پرضد هڅې کوي.

اسماعیل مشعل د پنجشنبې په ورځ د طالبانو امنیتي ځواکونو په کابل کې ونیوه.

هغه د کابل په سړکونو د زرګونه کتابونو د وړیا وېش لړۍ پیل کړې وه.

ريچارد بېنيټ د استاد اسماعيل مشعل پر نيول کېدو اندېښنه ښودلې

د پوهنتون استاد اسماعيل مشعل چې خلکو ته يې وړيا کتابونه وېشل، د طالبانو له لوري نيول شوی دی.

د افغانستان د بشري حقونو لپاره د ملګرو ملتونو ځانګړي راپور ورکوونکي، ریچارد بېنیټ په کابل کې د پوهنتون د یوه استاد اسماعیل مشعل پر نیولو اندېښنه وښوده.

ښاغلي بېنیت نن په یوه ټویټ کې ویلي، د سوله‌ییزو مدني حرکتونو په نښه کول او مخنیوی د نه منلو او د افغانستان له تعهداتو سره په ټکر کې عمل دی.

د طالبانو حکومت یوه چارواکي اسماعیل مشعل، چې د طالبانو په توقیف کې دی، د نظام په تخریب تورن کړ.

د طالبانو د اطلاعاتو او فرهنګ وزارت د خپرونو مشر عبدالحق حماد پرون ناوخته په خپل ټویټر کې لیکلي: استاد مشعل «په ډېر مهارت د نظام پر ضد پاروونکي کړنې ترسره کولې، ګڼ خبريالان یې پر ځان راټول کړي وو او پر عمومي سړک يې ګڼه ګوڼه جوړه کړې وه، امنيتي ادارو د تحقيقاتو لپاره بېولی دی.»

استاد مشعل چې څه موده مخکې په یو مدني حرکت کې د نجونو او ښځو په وړاندې د پوهنتونونو د دروازو له تړل کېدو وروسته د یوه خصوصي ټلوېزیون په پروګرام کې خپل تحصیلي اسناد څيرلي وو، پرون په وړیا ډول د کتابونو د وېش پر مهال ونیول شو.

بنګله‌دېش غوره لیګ؛ کریم جنت په هره لوبه کې ښه ځلېدلی

ارشي

د افغانستان کرېکټ ملي لوبډلې لوبغاړي کریم جنت د بنګله‌دېش په غوره لیګ سیالیو کې تر دې دمه ښې لوبې کړي دي.

ښاغلی جنت چې د الراونډر په توګه لوبیږي، په توپ اچونه او توپ وهنه کې د خپلې لوبډلې لپاره ښه لوبېدلی دی.

نوموړی چې د فارټن باریشال لوبډلې غړی دی، نن(د فبرورۍ ۳مه) د خولنا ټایګرز لوبډلې پر وړاندې ۱۶ منډې وکړې او ۴ وېکټې یې ترلاسه کړې.

کریم جنت تر دې دمه په یاد لیګ کې ۱۰ لوبې ترسره کړي دي چې ټولټال یې ۱۳۹ منډې کړي دي او ۱۰ وېکټې یې اخستي دي.

هغه تر ډېره د لوبې په وروستیو شېبو کې توپ وهنې ته راځي او تر ډېره یې د خپلې لوبډلې ملا ورتړلې ده.

د دوی لوبډله اوس مهال د نومرو په جدول کې دویم ځای لري.

د یادونې وړ ده چې د بنګله‌دېش په غوره لیګ سیالیو کې نور افغان لوبغاړي عثمان غني، ابراهیم ځدراڼ او عظمت الله عمرزی هم ښه لوبېدلي دي.

پاکستاني چارواکي: د طالبانو له حکومت ترهګرۍ سره مبارزې برخه کې د همکارۍ تمه لرو

د طالبانو د حکومت او پاکستان هېواد بيرغونه

د پاکستان د بهرنیو چارو وزارت ویلي، په افغانستان کې د طالبانو له حکومته د ترهګرۍ په وړاندې د مبارزې په برخه کې د صادقانه همکارۍ تمه لري.

د بهرنیو چارو وزارت ویاندې ممتاز زهرا بلوچ پرون په اسلام اباد کې د اوونیزې خبري غونډې پر مهال د یوې پوښتنې په ځواب کې وویل، پاکستان هیله لري چې د طالبانو حکومت به د ترهګرۍ پر ضد هغه ژمنې پوره کړي چې له نړیوالې ټولنې سره یې کړې دي.

نوموړې دا څرګندونې تر هغې یوه ورځ وروسته وکړې چې د طالبانو د حکومت د بهرنیو چارو سرپرست وزیر امیر خان متقي هغه ادعاګانې ناسمې وبللې چې ګواکې د پېښور پر یوه جومات په برید کې د افغانستان خاوره کارول شوې وه.

د پاکستان د دفاع وزیر خواجه اصف د جنورۍ پر ۳۱مه د ملي اسمبلۍ غونډې ته ویلي، طالبانو د ۲۰۲۰ز کال د فبرورۍ پر ۲۹مه له امریکا سره د دوحې موافقه کې ژمنه کړې وه چې افغانستان به د نورو هېوادونو پرضد کارېدو ته نه‌پرېږدي، خو د پېښور په برید کې د هغه په وینا د افغانستان له خاورې کار اخیستل شوی دی.

طالبانو استاد اسماعيل مشعل د نظام پر تخريب تورن کړی دی

د پوهنتون استاد اسماعيل مشعل خپل زرګونه ټوکه کتابونه ډالۍ کوي.

د طالبانو حکومت یوه چارواکي د کابل پوهنتون استاد اسماعیل مشعل، چې د طالبانو په توقیف کې دی، د نظام پر تخریب تورن کړ.

د طالبانو د اطلاعاتو او فرهنګ وزارت د خپرونو مشر عبدالحق حماد پرون ناوخته په خپل ټویټر کې لیکلي، استاد مشعل «په ډېر مهارت د نظام پر ضد پاروونکي کړنې ترسره کولې، ګڼ خبريالان یې پر ځان راټول کړي وو او پر عمومي سړک يې ګڼه ګوڼه جوړه کړې وه، امنيتي ادارو د تحقيقاتو لپاره بېولی دی.»

استاد مشعل چې څه موده مخکې په یو مدني حرکت کې د نجونو او ښځو په وړاندې د پوهنتونونو د دروازو له تړل کېدو وروسته د یوه خصوصي ټلوېزیون په پروګرام کې خپل تحصیلي اسناد څيرلي وو، پرون په وړیا ډول د کتابونو د وېش پر مهال ونیول شو.

کابل کې د نهه ولايتونو د لوبغاړو ترمنځ د تکواندو سيالۍ ترسره شوي

ارشيف

په کابل کې د نهه ولایتونو د څه باندې ۱۵۰ لوبغاړو تر منځ د تکواندو سیالۍ شوي.

د تکواندو د ملي فدراسیون چارواکو ویلي، دا سیالۍ یې د تکواندو د ملي ټیم د پخواني سر روزونکي کوریايي ماستر مین سین هاک د هڅو د درنښت په خاطر د هغه په نوم پلان او ترسره کړي.

په دې سیالیو کې اتل لوبغاړي د تکواندو د فدراسیون په رده بندي کې ځای پیدا کوي چې بیا په نورو سیالیو کې د ګډون چانس ترلاسه کولای شي.

مین سین هاک څو کاله د افغانستان د تکواندو د ملي ټیم سر روزونکی وو او د هغه د هڅو په مټ روح الله نیکپا وتوانېد په بیجینګ او لندن کې د المپيک له لوبو د برنزو مډالونه وګټي.

ښاغلي هاک د ګڼو نورو مډالونو او لاسته راوړنو په ګټلو کې هم د افغان لوبغاړو لاس‌نیوی کړی دی او هغوی یې روزلي دي.

نور راوښيه

XS
SM
MD
LG