مسعود حلیم یو ځوان افغان خطاط دی، چې د شپږم ځل لپاره یې وکړای شول، قران پاک خطاطي او منیاتوري کړي، ده مخکې له دې هم پنځه ځلې قران پاک خطاطي کړی و، چې لومړۍ او دویمه نسخه یې د سعودي عربستان او کویت پاچاهانو ته ډالۍ کړای شوي.
دریمه نسخه یې د افغانستان د ولسمشرۍ ماڼۍ په کتابتون، څلورمه او پنځمه یې د نړۍ په سترو کتابتونو کې د افغاني کتابت د نمونې په ډول اېښودل شوي دي.
مسعود حلیم شاوخوا ۲۵ کاله کیږي، چې د قران کریم په کتابت او د اسلامي ایتونو په لیکلو بوخت دی. د ده تر ټولو لویه نیکمرغي دا ده، چې پوره کورنۍ یې ورسره په دې سپېڅلي کار کې مرسته کوي.
ده دا وروستۍ قران کریم په څلور کلونو کې بشپړ کړ، خو دی وايي، که چېرې زمینه ورته برابره شي نو کولای شي په کال کې دوه نسخې په لاس ولیکي.
