د لاسرسۍ وړ لېنکونه

تازه خبر
دوشنبه ۴ چنګاښ ۱۴۰۳ کابل ۱۱:۳۱

خبرونه

چين، د ځينو انټرنټي پاڼو د تړلو امر کړى دى

د چين چارواکو د دغه هېواد پر کيڼ اړخو انټرنټ پاڼو امر کړى، چې په يوه مياشت کې دې خپل فعاليت ودروي.

دغه اقدام په چين کې د قدرت پر سر د جګړې په اړه د اوازو د خپرېدو د مخنيوي په هدف شوى دى، په ځانګړې توګه اوس مهال چې دغه هېواد د ځينو عالي رتبه چارواکو بدلولو ته تيارى نيسي.

د اوتوپيا په نامه د کيڼ اړخې انټرنټي پاڼې مسوول وويل، پوليسو ورته امر کړى چې د يوې مياشتې لپاره دې خپله پاڼه وتړي.

دې پاڼې په چين کې د واکمن کمونيست ګوند په اړه ځينې انتقادي ليکنې خپرولې.

د ورځې تازه خبرونه دلته ولولئ

نړیوال جام؛ سویلي افریقا او انګلستان نیمه پایلوبې ته ورسېدل

د ویسټ اینډیز او سویلي افریقا له لوبې یو انځور
د ویسټ اینډیز او سویلي افریقا له لوبې یو انځور

د کرکټ په روان شل اوریز نړیوال جام کې د اتو غوره لوبډلو د پړاو په دویم ګروپ کې سویلي افریقا د کوربه ویسټ اینډیز په ماتولو سره په نیمه پایلوبه کې خپل ځای پوښ کړ.

د دوشنبې په ورځ د جون په ۲۴مه نېټه سویلي افریقا او ویسټ اینډیز سیالي ترسره کړه چې یاده سیالي د ۳ وېکټو په توپیر سویلي افریقا وګټله او نیمه پایلوبې ته یې لار پیدا کړه.

دا د اتو غوره لوبډلو په پړاو کې د سویلي افریقا درېیمه بریا وه.

دغه راز انګلستان بیا تر دوو بریاوو وروسته د دویمې لوبډلې په توګه نیمه پایلوبې ته ورسېده.

په دې ګروپ کې کوربه ویسټ اینډیز او امریکا نیمه پایلوبې ته له رسېدو پاتې شول.

ټاکل شوې چې نن له اول ګروپ څخه د هندوستان او اسټرالیا ترمنځ مهمه سیالي ترسره شي.

دغه سیالي چې نن د کابل پر وخت ماښام ۷:۰۰ بجې پیلېږي که یې هندوستان وګټي، نو نېغ په نېغه به نیمه پایلوبې ته لاړه شي او که اسټرالیا وګټله بیا به د افغانستان او بنګله‌دېش تر سیالۍ وروسته څرګندېږي چې له دې ګروپ څخه کومې دوه لوبډلې نیمه پایلوبې ته رسېږي.

د اتو غوره لوبډلو د پړاو وروستۍ سیالي به د افغانستان او بنګله‌دېش ترمنځ سبا سه شنبه د کابل پر وخت سهار ۵:۰۰ بجې پیل شي.

د ویلو ده چې د نیمه پایلوبې پړاو د جون په ۲۷مه نېټه پيلېږي او پایلوبه به د جون په ۲۹مه نېټه وي.

برون: لبنان ته د اسراییلو د عملیاتو غځېدل به د ایران د غچ اخیستنې خطر له ځان سره ولري

د اسراییل او لبنان د پولو څنډو کې د راکټي بریدونو له کبله اور لګېدلی دی.
د اسراییل او لبنان د پولو څنډو کې د راکټي بریدونو له کبله اور لګېدلی دی.

د امریکا د پوځ یوه لوړپوړي چارواکي خبرداری ورکړی چې لبنان ته د اسراییلو د پوځي عملیاتو غځېدل به د ایران د غچ اخیستنې خطر له ځان سره ولري.

د امریکا د ګډې قومندانۍ مشر او د هوایي ځواکونو جنرال سي کیو برون پرون یکشنبه خبریالانو ته ویلي، پر لبنان عملیات پراخه جګړه پارولی شي چې ورسره په سیمه کې مېشتو امریکایي ځواکونو ته هم خطر پېښېږي.

د اسوشېټېډپرېس په وینا، تر دې وړاندې د اسراییلو چارواکو ګواښ کړی که خبرې د دې لامل نه شي چې حزب‌الله ډله له سرحدي سیمو په شا شي، دوی به پر لبنان عملیات وکړي.

څو ورځې وړاندې د اسراییل پوځ وویل، د لبنان عملیاتو ته یې یو باوري پلان چمتو کړی دی.

حزب‌الله چې د ایران له ملاتړه برخمنه ډله بلل کېږي، د غزې د جګړې له پيله وخت نا وخت پر اسراییلو توغندیز بریدونه کوي او اسراییل یې هم اهداف په نښه کوي.

د حج په سږنیو مراسمو کې د مړو شویو حاجیانو شمېر له ۱۳۰۰ اوښتی

د حج له مراسمو یو انځور
د حج له مراسمو یو انځور

د حج په سږنیو مراسمو کې د مړو شویو حاجیانو شمېر له ۱۳۰۰ واوښت.

د سعودي عربستان د روغتیا وزیر فهد بن عبدالرحمان الجلاجل پرون یکشنبه دولتي تلوېزیون ته ویلي، ۸۳ فیصده مړه شوي هغه حاجیان دي چې دوی سره رسماً د حج کوونکو په توګه ثبت نه وو.

دغه حاجیان تر ډېره په سره لمر کې د اوږده واټن قدم وهلو له کبله مړه شوي دي.

اسوشېټېدپرېس خبري اژانس د قاهرې د دوو سرچینو په حواله ویلي، د مړو شویو حاجیانو څه باندې پنځوس فیصده یې د مصر اتباع دي.

په راپور کې راغلي چې سعودي عربستان له ۱۶ مسافرتي شرکتونو څخه د دې لپاره جوازونه اخیستي چې یو شمېر حاجیانو ته یې په غیر رسمي ډول عربستان ته د سفر زمینه برابره کړې وه.

ویانا کې د طالب ضد مخالفانو ناسته؛ د افغانستان د راتلونکې لار نقشې په اړه بحث کوي

ارشیف: په ویانا کې له دې مخکې هم د طالبانو د یوه عمده مخالف احمد مسعود او نورو څېرو په ګډون ناستې شوې دي.
ارشیف: په ویانا کې له دې مخکې هم د طالبانو د یوه عمده مخالف احمد مسعود او نورو څېرو په ګډون ناستې شوې دي.

د ویانا څلورمه ناسته نن پیلېږي.

په دې ناسته کې د طالبانو د حکومت ضد عمده مخالفان سره راټولېږي او په خبره یې چې د افغانستان د راتلونکې لار نقشې په اړه بحث کوي.

د ملي مقاومت جبهې په خپله ایکسپاڼه لیکلي چې د دوی مشر احمد مسعود په دې ناسته کې د ګډون لپاره د اتریش پلازمېنې ویانا ته رسېدلی دی.

د بیان له مخې تمه کېږي چې د طالبانو ضد "سیاسي او پوځي" ډلو شاوخوا اویا استازي د ویانا څلورمې ناسته کې برخه واخلي.

طالبانو بیا د ویانا پخوانۍ ناستې بې ګټې بللې وې او ویل یې چې ټولې د دوی په خبره ازمویل شوې څېرې په‌کې راټولیږي.

کرکټ نړیوال جام؛ انګلستان په لوی توپیر امریکا ته ماتې ورکړه

د انګلستان له لوبې یو انځور
د انګلستان له لوبې یو انځور

د کرکټ په نړیوال جام کې انګلستان په لوی توپیر امریکا ته ماتې ورکړه.

امریکا په ۱۱۶ منډې هدف ورکړی و.

انګلستان په څه باندې ۹ اوورونو کې دغه هدف ته داسې حال کې ورسېد، چې هېڅ لوبغاړی یې نه وو اوټ شوی.

انګلستان په دې بریا سره په اتو غوره پړاو سیالیو کې خپل امتیازونه څلورو ته ورسول او بي ګروپ په سر کې ځای لري.

له بي ګروپه یوه بله لوبه د ویسټ اینډیز او جنوبي افریقا تر منځ ده.

ماښام به بیا د هندوستان او اسټرالیا ټیمونه سره مخ شي.

سبا سهار وختي د اول ګروپ دوه نور ټیمونه افغانستان او بنګله‌دېش لوبه لري.

که افغانستان له بنګله‌دېشه په ښه توپیر لوبه وګټي نیمه پایلوبې ته وځي.

طالبانو د روسیې د بهرنیو چارو وزیر د وروستیو څرګندونو هرکلی کړ

 د روسیې د بهرنیو چارو وزیر سرګي لاوروف
د روسیې د بهرنیو چارو وزیر سرګي لاوروف

د طالبانو د بهرنیو چارو وزارت د روسیې د بهرنیو چارو وزیر له دریځ هرکلی کړی چې ویلي یې دي له طالبانو سره لا زیاتو با ثباتو، دوامداره او حقیقي خبرو ته اړتیا ده.

سرګي لاوروف د ټولیز امنیت د تړون سازمان د بهرنیو چارو وزیرانو د شورا په ناسته کې چې همدا اوونۍ په قزاقستان کې شوې د افغانستان اړوند خبرې کړي.

هغه ویلي، له افغانستان لا هم د ترهګرۍ ګواښ موجود دی، خو د ده په خبره د طالبانو حکومت له ترهګرو سره مبارزه کوي او دوی یې همکارۍ ته چمتو دي.

د طالبانو د بهرنیو چارو وزارت په خپل بیان کې د لاوروف له نظره د هرکلي تر څنګ ویلي چې د روسیې په شمول ټولو هېوادو ته د ښه امنیت ډاډ ورکوي.

لاوروف داسې وخت د طالبانو له حکومت سره د دوامداره او رغنده خبرو په دوام ټینګار کړی چې تمه ده د همدې جون میاشتې په پای کې د دوحې درېیمه ناسته وشي.

د دوحې په ناسته کې د ملګرو ملتونو په کوربه توب د افغانستان لپاره د نړۍ د ګڼو هېوادونو ځانګړي استازي غونډه نیسي.

د روسیې داغستان کې د وسله‌والو بریدونه؛ له ۱۶ ډېر کسان وژل شوي

د روسیې په داغستان کې د وسله‌والو کسانو د بریدونو وروسته یوې ودانۍ اور اخیستی دی.
د روسیې په داغستان کې د وسله‌والو کسانو د بریدونو وروسته یوې ودانۍ اور اخیستی دی.

د روسیې په داغستان کې د وسله‌والو په بریدونو کې لږ تر لږه ۱۵ پولیس، یو عیسوي کشیش او یو شمېر نور ملکیان وژل شوي دي.

د داغستان والي سیرګي میلیکوف نن دوشنبه وختي وویل وسله‌والو بریدګرو پرون یکشنبه په دوو ښارونو مخاچ کلا او دربند کې پر دو کلیساوو، د یهودانو پر یوه عبادت ځای او د پولیسو پر یوه پوسته ډزې وکړې.

اسوشېټېډ‌پرېس خبري اژانس ویلي چې د روسیې د ترهګرۍ ضد کمېټې د داغستان دغه بریدونه ترهګریز بللي دي.

په داغستان کې د دغو بریدونو له کبله د درېیو ورځو لپاره ملي ماتم اعلان شوی دی.

تراوسه معلومه نه ده چې د بریدګرو کره شمېر څومره و، خو چارواکو ویلي پنځه تنه بریدګر یې وژلي دي.

د برید مسوولیت کومې ډلې نه دی منلی، خو وړاندې تر دې داعش تر ډېره په روسیه کې د ورته بریدونو مسوولیت اخیستی دی.

د پاکستان اپوزیسیون ګوندونو په دې هېواد کې د ترهګرۍ ضد عملیاتو مخالفت کړی

ارشیف: پاکستاني ځواکونه په شمالي وزیرستان کې د عملیاتو پر مهال
ارشیف: پاکستاني ځواکونه په شمالي وزیرستان کې د عملیاتو پر مهال

د پاکستان اپوزیسیون ګوندونو د "عزم استحکام" په نوم د پوځ له‌خوا په دغه هېواد کې د ترهګرۍ ضد عملیاتو مخالفت کړی دی.

د تحریک انصاف ګوند عمومي منشي عمر ایوب رسنیو ته ویلي چې د ترهګرۍ پر ضد د عملیاتو پرېکړه باید پارلمان وکړي.

ایوب ویلي د دوی د ګوند رهبر عمران خان باوري دی چې "باید په پردي جنګ کې ځانونه ښکېل نه کړو او امن یواځې په زور نه راځي."

عمر ایوب او نورو ګوندونو د پارلمان جلسه هم بایکاټ کړې وه.

دا تر هغې وروسته ده چې د پاکستان د صدراعظم شهباز شریف په مشرۍ لوړپوړې کمېټۍ د دغو عملیاتو د پیلولو اعلان کړی.

د پاکستان حکومت ویلي چې دا پرېکړه د څلورواړه ایالتونو او د پاکستان تر واک لاندې د کشمیر او ګلګت-بلتستان له چارواکو سره په موافقه کړې ده.

طالبانو د نیکاراګوا د نااستوګن سفیر د ګومارلو هرکلی وکړ

Illustration - flag of Nicaragua
Illustration - flag of Nicaragua

د طالبانو د بهرنیو چارو وزارت د نیکاراګوا له لوري د افغانستان لپاره د نااستوګن سفیر د ګومارلو هرکلی وکړ.

دغه وزارت نن په یوه خبرپاڼه کې ویلي چې له نیکاراګویا سره د دیپلوماتیکو اړیکو ټینګښت مثبت پرمختګ دی.

تر دې مخکې د نیکاراګووا رسنیو راپور ورکړ چې دغه هېواد د افغانستان لپاره نااستوګن سفیر ګمارلی دی.

مایکل کمبپل (Michael Campbell) چې دا مهال په چین کې د نیکاراګووا سفیر دی، ټاکل شوې له دې وروسته د کابل لپاره هم د دغه هېواد د سفیر په توګه دنده ترسره کړي.

د نیکاراګوا د ولسمشر مرستیالې روزاریو موریلو د افغانستان لپاره د سفیر د ګومارلو خبر تایید کړی دی.

د طالبانو د باندنیو چارو وزارت ویلي چې په پیکینګ کې د افغانستان سفارت ته لارښوونه شوې چې د نیکاراګوا له سفارت سره نژدې کاري اړیکې ولري.

د نیکاراګووا په ګډون تر اوسه د نړۍ یوه هېواد هم د طالبانو سرپرست حکومت په رسمیت نه دی پېژندلی، خو د ګوتو په شمېر هېوادونو د طالبانو ډيپلوماتان منلي او د ځینو هېوادونو سفارتونه په کابل کې فعال دي.

په هند کې د زهرجنو جعلي الکولو د قربانیانو شمېر ۵۳ ته لوړ شوی

ارشیف: له مخکې هم په هند په ورته پېښو کې یو شمېر کسانو ته مرګ ژوبله اوښتې ده.
ارشیف: له مخکې هم په هند په ورته پېښو کې یو شمېر کسانو ته مرګ ژوبله اوښتې ده.

هندي رسنیو د چارواکو په قول ویلي چې په دغه هېواد کې د زهرجنو جعلي الکولو د قربانیانو شمېر ۵۳ ته لوړ شوی دی.

د اسوشېټېډپرېس خبري اژانس د راپور له مخې، د تامل ناډو ایالت په کلاکوریچي سیمه کې یوه جګپوړي دولتي چارواکي د هند خبري اژانس پي‌ټي‌آی PTI ته ویلي چې د پرونیو (شنبې) معلوماتو پر اساس د مړو شمېر ۵۳ تنه دی.

په ورته وخت کې یو شمېر نورو هندي رسنیو د یکشنبې په ورځ د جون ۲۳ مه د قربانیانو شمېر ۵۵ تنه اعلان کړ، خو دا خبر خپلواکو سرچینو تایید یا رد کړی نه دی.

تر دې مخکې د هند د جنوبي ایالت تامل ناډو اعلی وزیر ویلي وو چې د سې شنبې په ورځ ۳۷ تنه د زهرجنو شرابو د څښلو له کبله په څو ساعتونه کې مړه شول.

رسنۍ وايي چې تر سلو ډېر مسموم شوي کسان روغتونونو ته وړل شوي، خو د ځینو روغتیايي حالت نازک ښودل شوی دی.

په هند کې هر کال سلګونه کسان په کورونو کې د تولید شویو ارزانه الکولو له امله مري، خو سږ کال د زهرجنو شرابو له کبله د مسمومېدو او مړینو شمېر تر ټولو ډېر دی.

نور راوښيه

XS
SM
MD
LG