د لاسرسي لېنکونه

تازه خبر
جمعه ۲۴ لړم ۱۳۹۸ کابل ۰۲:۲۷

د سوريي حکومتي ځواکونو خپلو بریدو ته دوام ورکړی


په سوریه کې د بشري حقونو فعالان وايي، چې حکومتي ځواکونو په بېلابېلو سیمو کې خپلو حملو ته دوام ورکړي.

په عین حال کې د سوریې حکومت د سره صلیب نړېوال سازمان هغه کاروان ځنډولی چې د خوراکی مواد او نورو عاجلو مرستو د رسولو لپار د حمص ښار ته روان شوی وو.

د سوریې حکومت لا هم هغه کاروان چې د جمعې په ورځ له دمشق څخه د سره صلیب د نړېوال سازمان له خوا سیمې ته روان شوی وو، له ځان سره ساتلی دی.

د سوریې حکومت مخکې تردې ژمنه کړې وه، چې دې کاروان ته به اجازه ورکوي چې په حمص ښار کې له ځپل شوېو خلکو سره د مرستې مواد ورسوي.

د بابا عمرو د سیمې اوسیدونکو وضعیت ډير ناوړه بللی دی او وايي چې نه اوبه لري او نه هم خوراکي مواد ورته رسیږي.

د حمص ښار د دې سیمې خلکو ویلي، چې دا سیمه تقریبا درې اونۍ مخکې د پوځ له خوا کلا بند شوې وه او له هغه راهیسې د مخالفینو او حکومتي ځواکونو ترمنځ جګړه روانه وه.

د ترکیې د بهرنیو چارو وزیر احمد داود اغلو د شنبې په ورځ په استانبول کې د سوریې حالاتو په اړه په یوه خبري کنفرانس کې وویل، چې د بابا عمرو د سیمې وضعیت د حکومتي ځواکونو له خوا د خلکو د قتل عام یو کمپاین دی:

"په بابا عمرو کې وروستۍ پېښې او تر دې مخکې په نورو ښارونو کې شوې پيښې د خلکو د قتل عام لپاره په یوه منظم کمپاین بدلې شوې دي چې د پوځ له خوا د هغوي د خپلو خلکو په ضد چلیږي. تشدد او مشکلات هر ورځ مخ په زیاتیدو دي."

په همدې خبري کنفرانس کې د ایټالیاد بهرنیو چارو وزیر جیولیوترزي وویل، چې د بابا عمرو په سیمه کې روان تشدد د منلو وړ نه دی:

"هغه څه چې په دې سیمه کې روان دي، هغه د خلکو له منځه وړل او د ښارونو له منځه وړل دي چې بمبارد شوی دي.

هلته خلک په لارو سرکونو باندې دا ترور په خپلو سترګو ګوري. دا وضعیت یو جنایت او د بشریت ضد جرم دی."


په عین حال کې د بشري حقونو فعالین وايي، چې د شنبې په ورځ هم د ترکیې سرحد ته نږدې د ادلیب په ښار کې د سوریې د رژیم د ځواکونو او وسله والو مخالفینو ترمنځ درنه جګړه روانه وه.

له بله پلوه د سوریې دولتي مطبوعاتو د شبنې په ورځ وویل، چې یوه انتحاري حمله کونکې په درعا ښار کې دوه تنه وژلي دي.

درعا هغه ځای دی چې د بشار الاسد د رژیم په ضد روان مخالفت ځينې پیل شو. د ملګرو ملتونو د اټکل پر اساس په تیر تقریبا یوه کال کې لږترلږه اوه نیم زره کسان په سوریه کې په روانو ناکراریو کې وژل شوي دي.
XS
SM
MD
LG