د لاسرسۍ وړ لېنکونه

تازه خبر
جمعه ۲۵ غبرګولی ۱۴۰۳ کابل ۱۱:۲۴

نړۍ

د اروبايي ټولنې د مشر ″هرمان وان رامپوي″ د کار موده د یوې بلې دورې لپاره تایید شوه

د اروپايي ټولنې مشرانو د اروپايي شورا د مشر په توګه د ″هرمان وان رامپوي″ د کار موده پرون د یوې بلې دورې لپاره تایید کړه.

وان رامپوي چې پخوا د بلجیم صدراعظم و، د ۲۰۰۹ کال په ډسمبر کې کله چې د اروپايي شورا د مشر په توګه ټاکل کېده ډېر لږ پېژندل شوی و او د یوه بېخونده سیاسي شخصیت په توګه پېژندل کېده خو په یورو زون کې د بحران له پیلیېدو وروسته په مالي او اقتصادي چارو کې تجربې ده، ته یو ښه شخصیت ورپه برخه کړ.

د دوهمې دورې له ټاکل کېدو سره به وان رمپوي د ۲۰۱۴ کال ترپایه د اروپايي شورا د مشر په توګه خپل کار ته دوام ورکړي؛ خو د دریمې دورې لپاره نه شي ټاکل کېدای.

د ورځې تازه خبرونه دلته ولولئ

د ازادې اروپا/ازادي راډیو د اذربایجان څانګې د ویبپاڼې بندولو پرېکړه سرغړونه وبلل شوه

ارشیف
ارشیف

د اروپا د بشري حقونو محکمې پرون پنجشنبې په اذربایجان کې د ازادې اروپا/ازادي راډیو د اذربایجاني برخې د ویبپاڼې د بندولو په اړه د اذربایجان د حکومت پرېکړه د اساسي ازادیو او د بشري حقونو د ساتنې د کنوانسیون سرغړونه وبلله.

د ازادې اروپا/ازادي راډیو مشر سټېفن کپوس، په یوه بیان کې د اروپا د بشري حقونو د محکمې د دې اقدام هرکلی وکړ.

ده زیاته کړه: "د ازادي راډیو اذربایجاني څانګه لا هم په خپلو امکاناتو د عامه فساد، سیاسي بندیانو او د انتخاباتي درغلیو په اړه خپلو څېړنیزو راپورونو ته دوام ورکوي."

کپوس دا هم وویل چې د اذربایجان خلک د نورو ځایونو د ولسونو په څېر، له حکومتي پروپاګند څخه لیرې خپلواکو معلوماتو ته د لاسرسي حق لري.

هغه وايي: "موږ دې ماموریت ته دوام ورکوو او په باکو به فشار ته دوام ورکړو چې موږ ته اجازه راکړي چې په آذربایجان کې په ازاد ډول کار وکړو."

د ازادې اروپا/ازادي راډیو د اذربایجاني څانګې دفتر چې په اذربایجان کې د "آزادلیق" په نوم پېژندل کېږي په ۲۰۱۷م کې د باکو د محکمې په حکم وتړل شو.

محکمې ادعا کړې وه چې د راډیو ویبپاڼې داسې مواد خپاره کړي چې "د ډله‌ییزو پاڅونونو د غوښتنې په شمول تاوتریخوالي او مذهبي افراطیت ته تبلیغ کوي."

پاپ فرانسیس د جي۷ په سرمشریزه کې د یو شمېر هېوادو له مشرانو سره ګوري

 د نړۍ د کاتولیکانو مشر پاپ فرانسیس
د نړۍ د کاتولیکانو مشر پاپ فرانسیس

واتیکان د پنجشنبې په ورځ د جوزا په ۲۴مه اعلان وکړ چې د نړۍ د کاتولیکانو مشر پاپ فرانسیس به په ایټالیا کې د جي۷ G7 په سرمشریزه کې د متحدو ایالتونو او اوکراین له ولسمشرانو جو بایډن او ولودیمیر زیلینسکي او د هند له صدراعظم نریندرا مودي سره وګوري.

فرانسیس د ایټالیا د صدراعظم جیورجیو میلوني له لوري سرمشریزې ته بلل شوی چې نن جمعه د مصنوعي ذهانت په اړه وینا وکړي.

د فرانسې خبري آژانس د راپور له مخې، تمه ده چې ۸۷ کلن پاپ فرانسیس په یو لړ دوه اړخیزو غونډو کې د غزې او اوکراین پر جګړو خبرې وکړي.

د راپور له مخې فرانسیس به د فرانسې له ولسمشر ایمانویل مکرون، د کاناډا له صدراعظم جسټن تروډو او د پیسو د نړیوال صندوق له مشرې کریستالینا جورجیوا سره هم وګوري.

بریتانیا، کاناډا، فرانسه، جرمني، ایټالیا، جاپان او امریکا د جي۷ غړي دي.

د دې ډلې سرمشریزه د پنجشنبې په ورځ د ایټالیا په کوربه‌توب پیل شوه.

ترکیې او امریکا د ایف۱۶ ډوله جنګي الوتکو د خرڅلاو په اړه موافقه لاسلیک کړه

د امریکا یوه ایف۱۶ الوتکه
د امریکا یوه ایف۱۶ الوتکه

ترکیې او د امریکا متحدو ایالتونو د ایف۱۶ F-16 ډوله جنګي الوتکو د خرڅلاو په اړه موافقه لاسلیک کړه.

دا پرېکړه وروسته له هغې اعلان شوه چې واشنګټن تر څو میاشتنیو مذاکرو وروسته د ۲۳ میلیارد ډالرو په ارزښت د دې موافقې په اړه رضایت وښود.

د ترکیې د دفاع وزارت یوې سرچینې د فرانسې خبري اژانس ته نن ویلي، دغه موافقه لاسلیک شوه او د دواړو لوریو استازي پر جزییاتو په خبرو بوخت دي.

د دې موافقې له مخې به ترکیه له واشنګټن څخه ۴۰ نوې ایف۱۶ ډوله الوتکې رانیسي.

د مالي د سرو زرو په یوه کان کې د مړو شویو کسانو شمېر ۲۲ ته رسېدلی

ارشیف
ارشیف

د مالي چارواکو نن رویټرز خبري اژانس سره په خبرو کې تایید کړه چې د دغه هېواد په جنوب کې د سرو زرو په یوه کان کې د مړو شویو کارګرانو شمېر ۲۲ ته زیات شوی دی.

په مالي کې د کانونو د فدراسیون عمومي منشي تاولي کمارا له رویټرز خبري ژانس سره په خبرو کې ویلي، تېره شنبه دغو کان کیندونکو په کان کې کار کاوه چې د کان یوه سمڅه ورباندې ونړېده.

په تېره جنورۍ کې میاشت کې هم د مالي په جنوب لوېدیځ کې د کان د نړېدو په ورته پېښه کې ۷۰ کسان مړه شوي وو.

د ازادې اروپا/ازادي راډیو په اذربایجان څانګې محدودیت له اساسي ازادیو سرغړونه وبلل شوه

ارشیف
ارشیف

د اروپا د بشري حقونو محکمې (ECHR) نن د رایو په اتفاق د ازادې اروپا/ازادي راډیو د اذربایجان څانګې د لاسرسي د محدودیت لپاره د اذربایجان د حکومت پرېکړه د بشري حقونو د ملاتړ له کنوانسیون او له اساسي ازادیو سرغړونه وبلله.

د ازادې اروپا/ ازادۍ راډیو د اذربایجان څانګه چې په دغه هېواد کې د ازادلیق په نامه فعالیت کاوه، په پلازمېنه باکو کې په ۲۰۱۷م کال کې د باکو د محکمې له‌خوا وتړل شوه.

دغې محکمې ادعا کړې چې د دغې راډیو ویبسایټ داسې محتوا خپره کړې چې مذهبي خشونت او افراطیت ته په کې لمن وهل شوې او د عمومي بلواوو د رابللو غوښتنه کې شوې ده.

په باکو کې محکمې د اذربایجان څانګې د تړلو پرېکړه وروسته له هغې وکړه چې دغې راډیو د ولسمشر الهام علییف د کورنۍ او هغه ته د نږدې کړیو د مالي فعالیتونو په اړه یو تحقیقي راپور خپور کړ.

د رفح اوسېدونکو د اسراییلو د سختو هوایي او ځمکنیو بریدونو خبر ورکړ

په رفح کې د روانې جګړې انځور
په رفح کې د روانې جګړې انځور

د غزې په جنوب کې د رفح اوسېدونکي تېره شپه د اسراییل له‌خوا د سختو هوایي او ځمکنیو بریدونو خبر ورکوي.

د رویټرز خبري آژانس د راپور له مخې دوی ویلي، په داسې حال کې چې اسراییلي ټانګونه د رفح په لوېدیځ کې وړاندې تګ کوي، تېره شپه په سیمه کې د اسراییل د هوایي، ځمکنیو او د سمندر له لارې د بریدونو له پلوه یو تر ټولو سخته شپه وه.

د دغو بریدونو په نتیجه کې ډېرې کورنۍ په تیاره کې خپلو کورونو او خیمو پرېښودو ته اړ کړای شوي دي.

د رویټرز د راپور له مخې اسراییلي ځواکونه په رفح کې ساحل ته نژدې د المواصي پر لوري پرمختګ کوي.

دا هغه سیمه ده چې د اسراییل پوځ پررفح د مې د میاشتې له برید راهیسې په ټولو اعلانونو او خپرو کړو نقشو کې د بشرپالنې د سیمې په توګه نومولې ده.

د اسراییل پوځ دغه راپورونه رد کړي دي.

چارواکي: دمګړی په ایران کې ۸زره بهرنیان بندیان دي

د ایران د اوین زندان
د ایران د اوین زندان

د ایران د عدلیې وزارت مرستیال او د بندیانو د انتقال د کمېټې رییس عسکر جلالیان وایي، په اوس وخت کې اته زره بهرنیان په ایران کې بندیان دی.

جلالیان نه‌دي ویلي چې په دوی کې څومره یې افغانان دي.

د ایران د اسلامي جمهوريت ایرنا خبري آژانس پرون چهارشنبې د جلالیان له قوله خبرورکړی چې ویلي یې دي، د ایران عدلیې وزارت هڅه کوي چې بهرني بندیان د هغوی اصلي هېوادونو ته د بندیانو د سپارلو د موافقو له مخې وسپاري.

د ایران حکومت له دې مخکې په څو مرحلو کې افغان بندیان د طالبانو حکومت ته سپارلي دي.

په ایټالیا کې د نړۍ د اوو پرمختللو صنعتي هېوادونو سرمشریزه پیلېږي

د جي۷ د سرمشریزې غونډې ته چمتووالی روان دی.
د جي۷ د سرمشریزې غونډې ته چمتووالی روان دی.

د نړۍ د اوو پرمختللو صنعتي هېوادونو ډلې یا جي۷ نن پنجشنې په ایټالیا کې درې ورځنۍ سرمشریزه د امریکا د هغه وړاندیز په اړه په توافق سره پیلوي چې چې د روسیې له کنګل شوې شتمنۍ څخه پنځوس میلیارد ډالره اوکراین ته د پور ورکولو لپاره د تضمین په توګه بندوي.

د اسوشېټېډپرېس خبري آژانس د راپور له مخې ډیپلوماتانو تایید کړې چې د نړې د سترو صنعتي هېوادونو مشرانو مخکې له دې چې ایټالیا ته ورسېږي او د دې هېواد په جنوب کې دغه سرمشریزه پیل کړي، پر دې موضوع توافق کړی دی.

د اوکراین ولسمشر ولادمیر زیلینسکي به هم په دې سرمشریزه کې ګډون وکړي او تمه ده چې نوموړی به د امریکا له ولسمشر جوبایډن سره یوه جلا دوه اړخیزه امنیتي موافقه هم لاسلیک کړي.

یواین‌ایچ‌سي‌آر: تېره میاشت په نړۍ کې ۱۲۰ میلیونه کسان بې‌ ځایه شوي

ارشیف: د فرانسې او بریتانیا په اوبو کې د بېلابېلو هېوادونو د کډوالو کښتۍ. دوی هڅه کوي چې په داسې لارو ځانونه نورو هېوادونو ته ورسوي.
ارشیف: د فرانسې او بریتانیا په اوبو کې د بېلابېلو هېوادونو د کډوالو کښتۍ. دوی هڅه کوي چې په داسې لارو ځانونه نورو هېوادونو ته ورسوي.

د ملګروملتونو د کډوالو لویه کمېشنري یا "یواین‌ایچ‌سي‌آر" وایي، تېره میاشت په نړۍ کې دومره ډېر کسان د جګړې، شخړو، تاوتریخوالي او ځورونې له امله له خپلو سیمو بې ځایه کېدو ته اړ شوي چې مخکې یې ساری نه‌دی لیدل شوی.

"یواین‌ایچ‌سي‌آر" په هغه راپور کې، چې نن پنجشنبې یې خپور کړی ویلي چې په تېره مې میاشت کې په نړۍ کې ۱۲۰ میلیونه کسان بې ځایه شوي چې دا د مخکېني کال پرتله نژدې لس سلنه زیاتوالی ښیي.

د دې ادارې په وینا، دا د ټولې نړۍ د نفوس شاوخوا یونیم سلنه ده.

د ملګرو ملتونو د کډوالو د لویې کمېشنرۍ په خبره، له څه باندې دوه درېیمه برخه بې ځایه شوي کسان په کور دننه بې ځایه شوي کډوال دي.

د هغو کسانو له ډلې چې له خپلو هېوادونو تښتېدلي، دوه پر درېیمه یې تر اوسه په ګاونډیو هېوادونو کې پاتې دي.

د دې ادارې په خبره، دوی چې معمولاً تر سختو شرایطو لاندې ژوند کوي، هیله‌من دي چې ژر به بېرته خپلو هېوادونو ته ستانه شي.

په دې راپور کې همدارنګه په نړیواله کچه د بې ځایه شویو افغانانو شمېر نږدې ۱۰،۹میلیونه ښودل شوی او ویل شوي چې نږدې ټول په خپل هېواد کې دننه یا په ګاونډیو هېوادونو کې اوسي.

پر کریفي ریح د روسیې توغنديز برید؛ لږ تر لږه ۸ کسان وژل شوي او ۲۱ ټپیان دي

په کریفي ریح کې ژغورونکې ډلې هڅه کوي څو له خارو لاندې مړي او ټپیان وباسي.
په کریفي ریح کې ژغورونکې ډلې هڅه کوي څو له خارو لاندې مړي او ټپیان وباسي.

د اوکراین پر کریفي ریح ښار د روسیې د بالستیک توغندي په برید کې لږ تر لږه ۸ تنه وژلي او ۲۱ نور یې ټپیان کړي دي.

کریفي ریح د دنیپرو پیتروفسک سیمې یو لوی ښار دی چې د اوکراین د ولسمشر ولودمیر زیلینسکي پلرنی ټاټوبی دی.

د اوکراین د کورنیو چارو وزیر ایهور کلیمینکو ویلي چې د پروني برید په وژل شویو او ټپیانو کې ماشومان هم شته.

برید له هغه راپور وروسته شوی چې په کې راغلي، امریکا به اوکراین سره د نورو پټریوټ توغندیز سیستم مرسته وکړي.

د اوکراین د جنوب پوځي چارواکو ویلي چې په برید کې یوه دولتي ودانۍ او د هستوګنیزو اپارتمانونو یو بلاک زیانمن شوی دی.

نور راوښيه

XS
SM
MD
LG