د لاسرسۍ وړ لېنکونه

تازه خبر
یکشنبه ۱۳ کب ۱۴۰۲ کابل ۰۶:۱۷

افغانستان

د هلمند په چاودنه کې اتو تنو پولیسو ته مرګ ژوبله اوښتې

په هلمند کې نن د ماین په یوه چاودنه کې د پولیسو یو سیمه ایز قومندان وژل شوی او اووه پولیس ټپیان شوي.

دهلمند دوالي وياند داود احمدي وويل چې دا چاودنه نن سهار د ګرشك د نهرسراج په سيمه كي دپوليسو په موټر شوې، چې پكي دپوليسو يوسيمه ایز قوماندان حاجي زينووژل شوى او په موټركي سپاره پوليس ټپيان شوي.

احمدي دټپي شويو پوليسو شميره په ډاګه نكړه خو وويل چې په دغه سيمه كي پوليسو نن سهار تصفوي عمليات پيل كړي او د مګړى روان دي .

په همدي اړه په لښكرګاه كي دايمريجنسي روغتون يو ډاكتر دنوم دنه ښودلو په شرط ازادۍ ر اډيوته وويل چې دوى ته اوه تنه پوليس په ټپي حالات كي ور وړل شوي چې د دريو حالات پكي نازك دى او څلور يې ښه دي.

د ورځې تازه خبرونه دلته ولولئ

د افغانستان د اتلتیک د ملي لوبډلې لوی روزونکی سخي زاده ایران کې ومړ

احمد فیروز سخي زاده
احمد فیروز سخي زاده

د افغانستان د اتلتیک د ملي لوبډلې لوی روزونکی احمدفیروز سخي زاده پرون په ایران کې په حق ورسېد.

د هېواد د اتلتیک د دې مخکښ روزونکي د کورنۍ غړو ازادي راډیو ته وویل، سخي زاده چې په ورځ کې به یې د اعصابو د آرامولو څو ټابلیټونه خوړل، د شنبې په ورځ د زړه د درېدو له کبله سا ورکړه.

نوموړي چې له شاوخوا پنځو میاشتو راهیسې په ایران کې اوسېده، وروستی ځل تېره اونۍ د افغانستان د اتلتیک له ملي لوبډلې سره په تهران کې د آسیا د اتلتیک په لوبو کې د لوی روزونکي په توګه ګډون وکړ.

د لوګر د مس عینک کان له سیمې سلګونه تاریخي آثار کابل ته لېږدول شوي

د لوګر د مس عینک کان سیمه
د لوګر د مس عینک کان سیمه

د طالبانو حکومت وايي د مس عینک کان له سیمې څخه یې سلګونه تاریخي آثار کابل ته استولي دي.

باختر خبري آژانس چې طالبان یې اداره کوي، پرون د طالبانو د حکومت د لرغون پوهنې د رییس ذبیح الله سادات له قوله خبر ورکړ چې نوموړی وايي، د کوشاني دورې اړوند ۴۰۰ لرغونی آثار چې په وروستیو کې د لوګر په مس عینک کان کې موندل شوي وو، د کابل موزیم ته استول شوي دي.

د مس عینک د استخراج چارې له څو کلونو راهیسې د دې کان په سیمه کې د بودایي دورې د یو لرغوني ښار د اړوندو راپورونو له کبله ځنډېدلې وې.

پرځېدلي جمهوري نظام د دې کان د استخراج د چارو قرارداد له یوه چینايي شرکت سره کړی و، خو په دې کان کې عملي کار څوکاله وځنډېد.

طالبانو د ۲۰۲۱ کال په اګست کې پر افغانستان له بیاواکمنېدو وروسته یوځل بیا د مس عینک کان پر پروژې کار پیل کړ او غواړي چې د دې پروژې په وسیله له چین سره ځان نژدې کړي.

یو هندي وګړی افغانستان ته له داعش ډلې سره د یو ځای کېدو د تلو د هڅې په تور نیول شوی

له ارشیفه د داعش ‌ډلې بیرغ
له ارشیفه د داعش ‌ډلې بیرغ

د هندي رسنیو د راپورونو له مخې، د هند د کیرالا ایالت یو اوسېدونکی د اسلامي دولت ډلې یا داعش له لیکو سره د یوځای کېدو د هڅې په ترڅ کې په افغانستان کې نیول شوی دی.

هندو پوست ورځپاڼې دا مشکوک تروریست د ثناالاسلام په نوم یاد کړی او ویلي یې دي، نوموړی له نیول کېدو او له ده څخه د طالبانو د حکومت د استخباراتو له تحقیقاتو وروسته اوس په کندهار کې په توقیف کې دی.

د هندو پوست د راپور له مخې، ثناالاسلام د تاجکستان له لارې افغانستان ته تللی و، او غوښتل یې په افغانستان کې له داعش ډلې سره یوځای شي.

په راپور کې دا نه دي ویل شوي چې نوموړی څه وخت او د افغانستان په کومه سیمه کې نیول شوی، خو دا یادونه شوې ده چې د طالبانو د حکومت چارواکو د دې موضوع په اړه هند ته خبر ورکړی دی او د راتلونکو اقداماتو په اړه د دواړو خواوو ترمنځ خبرې روانې دي.

رواداري سازمان: افغانستان کې سلګونه تنه په قصدي ډول وژل شوي

د رواداري سازمان په راپور کې طالبان هم په قصدي وژنو کې په لاس لرلو تورن شوي
د رواداري سازمان په راپور کې طالبان هم په قصدي وژنو کې په لاس لرلو تورن شوي

د رواداري په نوم د بشري حقونو مدافع ډله ادعا کوي چې طالبانو او ناپېژاندو وسله والو په ۲۰۲۳ کال کې په افغانستان کې په هدفي او غیرقانوني وژنو کې لاس درلود.

دې ډلې چې له هېواده بهر فعالیت کوي، پرون (د مارچ په دوهمه) د افغانستان د بشري حقونو د وضعیت په اړه د یوه ۳۰ مخیز راپور په خپرولو سره همداراز ویلي دي چې د تېر ۲۰۲۳ کال په ترڅ کې په ټول افغانستان کې له بشري حقونو د سرغړونو په ترڅ کې لږترلږه د ۵۰۶ کسانو د وژل کېدو او د ۲۶۶ نورو د ټپي کېدو موارد مستند شوي دي.

د طالبانو حکومت تراوسه د دې راپور په اړه څه نه دي ویلي، خو له دې مخکې یې د بشري حقونو په سرغړونو کې لاس لرل رد کړي دي.

د افغانستان د خبریالانو مرکز: په دایکندي کې د نسیم راډیو نشرات بېرته پیل شول

ارشیف
ارشیف

د افغانستان د خبریالانو مرکز وايي، طالبانو په دایکندي ولایت کې د نسیم خصوصي راډیو ته اجازه ورکړې چې خپل نشرات بېرته پیل کړي، خو د دې راډيو مدیر مسوول سلطان علي جوادي لا هم د طالبانو په بند کې دی.

دې مرکز نن شنبې د مارچ دویمه د یوې خبرپاڼې په خپرولو سره ویلي، د طالبانو د استخباراتو ادارې دا راډيو پنځه میاشتې وړاندې تړلې وه.

د افغانستان د خبریالانو مرکز د نسیم راډیو د خاوند د مدافع وکیلې نحیبې واحدي په حواله ویلي، نن دې راډیو بېرته خپل نشرات پیل کړل.

د دې مرکز په خبرپاڼه کې راغلي، جوادي د لیندۍ په شلمه د دایکندي په مرکز نیلي کې د طالبانو د ابتدائیه محکمې له لوري (د طالبانو د حکومت پر ضد د تبلغاتو او بهرنیو هېوادونو ته د جاسوسۍ) په تور په یو کال زندان محکوم شوی و.

واک ته د طالبانو له ستنېدو وروسته ډېر شمېر خبریالان او د رسنیو کارکوونکي د طالبانو له‌خوا نیول شوي او زنداني شوي دي.

په کونړ کې د چت غورځېدو پېښه؛ څلور کسان مړه او درې نور ټپیان شوي

د افغانستان په عمومي نقشه کې د کونړ ولایت موقعیت
د افغانستان په عمومي نقشه کې د کونړ ولایت موقعیت

په کونړ کې د یو د کور چت د غورځېدو په پېښه کې څلور کسان مړه او درې نور ټپیان شوي دي.

د کونړ ولایت د پېښو پر وړاندې د چمتووالي ادارې مرستیال احسان الله نن شنبه ازادي راډیو ته وویل: "د پرله‌پسې ورښتونو له کبله تر اوسه په کونړ کې ۳۲ کورونه تخریب شوي چې د اسعداباد اړوند د اندرسیر په کلي کې د یو کور د چت د راغورځېدو په پېښه کې څلور تنه مړه او درې نور ټپیان دي."

د هغه په خبره، په دې ورښتونو کې یو شمېر څاروي هم له منځه تللي دي.

د کونړ د ټولګټو چارو ریاست بیا د کونړ او نورستان ترمنځ د یو شمېر لارو د تړلو کېدو خبر هم ورکړی دی.

بل پلو، په غزني کې طالب سیمه ییز چارواکو وايي، د شدیدو ورښتونو له کبله د غزني له مرکز او شمېر ولسوالیو ترمنځ غځېدونکې لار تړل شوي دي.

د غزني اوسېدونکو له طالب چاوراکو د دې لارو د پرانیستلو غوښتنه کړې ده.

په وروستیو څو ورځو کې د افغانستان په بېلابېلو ولایتونو کې د واورې او بارانونو له امله د سالنګونو په ګډون په یو شمېر ولایتونو کې لارې تړل شوي دي.

د امریکا پولیسو د 'نصرت احمدیار' په وژنه کې د لاس لرلو په تور یو کس نیولی

 نصرت احمدیار کلونه په افغانستان کې له امریکايي ځواکونو سره د ژباړونکې په توګه کار کړی و او دی د ۲۰۲۳م کال د جولای په درېیمه په واشګټن کې هغه مهال ووژل شو چې له موټره يې سپرلۍ ښکته کوله.
نصرت احمدیار کلونه په افغانستان کې له امریکايي ځواکونو سره د ژباړونکې په توګه کار کړی و او دی د ۲۰۲۳م کال د جولای په درېیمه په واشګټن کې هغه مهال ووژل شو چې له موټره يې سپرلۍ ښکته کوله.

د امریکا پولیسو د هغه تنکي ځوان د نیولو خبر ورکړی چې په واشنګټن کې د یوه افغان په وژلو کې په لاس لرلو تورن دی.

دغه افغان چې نصرت احمدیار نومېږي کلونه يې په افغانستان کې له امریکايي ځواکونو سره د ژباړونکې په توګه کار کړی و.

هغه د ۲۰۲۳م کال د جولای په درېیمه په واشګټن کې هغه مهال ووژل شو چې له موټره يې سپرلۍ ښکته کوله.

د احمدیار ملګرو پولیسو ته ویلي، پر هغه د کرایه د غوښتلو پر مهال ډزې وشوې.

خو د واشنګټن پولیسو ویلي، هغه له سپرلۍ ښکته کولو وروسته په خپل موټر کې ناست و چې څو تنکي ځوانان ورغلل او هڅه يې وکړه چې د هغه موټر ترې واخلي.

۳۱ کلن احمدیار پر افغانستان د طالبانو له واکمنېدو وروسته امریکا ته تللی و او په شمالي ویرجینیا کې له خپلې مېرمنې او ماشومانو سره مېشت و.

د امریکا بهرنیو چارو وزارت 'بنفشه یعقوبي' د زړورې ښځې د جایزې ګټونکې اعلان کړه

د امریکا د بهرنیو چارو وزارت
د امریکا د بهرنیو چارو وزارت

د امریکا د بهرنیو چارو وزارت د افغانستان د تېر جمهوري نظام د بشري حقونو د خپلواک کمېسیون غړې بنفشه یعقوبي د ۲۰۲۴م کال د زړورې ښځې د جایزې له دولسو ګټونکو څخه یوه اعلان کړه.

د امریکا د بهرنیو چارو وزارت د بیان پر اساس، مېرمن یعقوبي او یولس نورې ښځې له ایران څخه د فریبا بلوچ په ګډون به د زړورو ښځو دا جایزه د مارچ میاشتې په څلورمه په یو لړ مراسمو کې ترلاسه کړي.

په بیان کې راغلي، په دې مراسمو کې به د امریکا د بهرنیو وزیر انټونې بلېنکن او د دې هېواد لومړی مېرمن جیل بایډن ګډون وکړي.

د امریکا د بهرنیو چارو وزارت په بیان کې ویلي، مېرمن یعقوبي کلونه د هغو ښځو له حقونو چې له تاوتریخوالي سره مخ شوي، دفاع کړې ده.

وړاندې راغلي، مېرمن یعقوبي او خاوند يې په ۲۰۰۸م کال کې د کم لیده کسانو د روزنې لپاره د رهیاب په نوم یو سازمان هم رامنځته کړ.

له افغانستان څخه له مېرمن یعقوبي او له ایرانه د مېرمن بلوچ سربېره لس نورې ښځې له بنګله‌دېش، بېلارس، بوسنیا هرزي ګوینا، برما، کیوبا، اکوادور، ګامبیا، جاپان، مراکش او یوګانادا څخه د ۲۰۲۴ کال د امریکا د بهرنیو چارو وزارت د زړورې ښځې جایزې ګټونکې اعلان شوي دي.

پاکستان د افغانستان له لارې د انرژۍ لېږد په تړاو د نړیوال بانک له پلانه هرکلی وکړ

د کاسا۱۰۰۰ پروژې د پرانیستې له مراسمو یو انځور. د ۲۰۱۶ کاف د مې۱۲مه
د کاسا۱۰۰۰ پروژې د پرانیستې له مراسمو یو انځور. د ۲۰۱۶ کاف د مې۱۲مه

د پاکستان حکومت د نړیوال بانک د هغه پلان هرکلی کړی چې غواړي د افغانستان له لارې جنوبي آسیا ته د انرژۍ د لېږد او سوداګرۍ پر پروژې بیا کار پیل کړي.

د پاکستان حکومت په یوه بیان کې چې پرون د مارچ په لومړۍ نېټه خپور شو، دا ژمنه ستایلې او ویلي یې دي چې د نړیوال بانک دا اعلان په سیمه کې د انرژۍ د انتقال لپاره د هېوادونو ترمنځ د همکارۍ نښه ده.

پر دې پروژې د کار د بیا پیل غوښتنه قرغزستان، تاجکستان او پاکستان چې د افغانستان ترڅنګ د دې پروژې ګډونوال دي، په تېره ډسمبر میاشت کې نړیوال بانک ته وړاندې کړې وه او نژدې دوه اوونۍ مخکې نړیوال بانک په یوه بیان کې اعلان وکړ چې د افغانانو د ملاتړ لپاره د یوې نوې تګلارې له مخې به د کاسا زر پروژې د بشپړولو عملي کار پیل شي.

خو نړیوال بانک ټینګار کړی چې د دې پروژې د رغونې د لګښتونو او په راتلونکي کې د هغې د عوایدو چارې به له افغانستانه بهر سمبالېږي او د طالبانو حکومت به په کې ښکېل نه وي.

د طالبانو حکومت د نړیوال بانک د دې اعلان په اړه څه نه دي ویلي، خو مخکې له دې یې له نړیوالو موسسو غوښتي وو چې په افغانستان کې خپلې ټولې نیمګړې پروژې بشپړې کړي.

کاسا زر پروژه د تاجکستان او قرغزستان د برښنا انرژي د افغانستان له لارې جنوبي آسیا ته لېږدوي.

'ډبلیوایف‌پي' شاوخوا ۱۶ میلیون اړو افغانانو ته د غذايي موادو مرستې رسوي

ارشیف: په ارزګان کې اړمنو سره د خوړو نړیوال پروګرام د مرستو له بهیره یو انځور
ارشیف: په ارزګان کې اړمنو سره د خوړو نړیوال پروګرام د مرستو له بهیره یو انځور

د خوړو نړیوال پروګرام یا 'ډبلیوایف‌پي' وايي، په پام کې لري تر راتلونکو دوو میاشتو پورې شاوخوا ۱۶ میلیون اړو افغانانو ته د غذايي موادو مرستې ورسوي.

په افغانستان کې د دې پروګرام د عامه اړیکو مسوول فلیپې کروپف پرون په دې اړه ازادۍ راډیو ته وویل: "په سږني ژمي کې موږ یوازې د اووه میلیون افغانانو ملاتړ کولای شو. ډبلیو‌ایف‌پي پلان لري چې تر راروانې مې میاشتې پورې ۱۶ میلیون خلکو ته خواړه، مقوي غذایی مواد او ژوند ژغورونکي توکي ورسوي. د دې کار لپاره ۷۶۰ میلیون امریکايي ډالرو ته اړتیا لرو."

کروپف زیاته کړه چې دوی تېره اوونۍ یوه نوې مالي مرسته ترلاسه کړه، خو د دې پیسو یوه برخه یې هغو پورونو ته ورکړه چې د تېر کال د فعالیتونو لپاره یې اخیستي وو.

هغه زیاته کړه چې ډبلیو‌ایف‌پي د بودیجې د کمښت له کبله تېرکال اړ شو چې لس میلیون اړو کسانو ته د مرستو د رسولو پروګرام وځنډوي.

ملګرو ملتونو مخکې ویلي و، چې په افغانستان کې له ۲۹ میلیون ډېر خلک بشري مرستو ته اړتیا لري.

نور راوښيه

XS
SM
MD
LG