په هلمند کې چې د مارجې په څېر ولسوالیو کې يې د بارک اوباما جنګي ستراتېژي د نمونې په توګه عملي شوې ده امریکايي پوځي قومندانان وايي دلته ډېر ښارګوټي د تیر کال په پرتله اوس خوندي دي او د طالبانو فعالیت په کې کم شوی دی .
خو د پاکستان سره د پولې څخه دوسلوالو اسانه اوښتل را اوښتل دا لاس ته راوړنه په ډېره اسانۍ په اوبو لاهو کولی شي .
د امریکا د پلي سمندري ځواکونو یو قومندان ډګروال ډیویډ فورنیس چې د مارجې د ولسوالۍ په تازه حال یې خبریالانو ته خبرې کولې وویل ، له دې سیمې ډېرې پیچلې او ګڼې لارې پاکستان ته تللي چې وسلوال طالبان پرې تګ راتګ کوي .
د ډګروال فورنیس په وینا طالبان پر دې لارو په وړو ډلو کې تګ راتګ کوي او د اکمالاتو او تګ راتګ لپاره د ملکیانو له لاریو او موټرو ګټه اخلي .
نوموړي خبریالانو ته وویل سرتیرو یې داسې بریښنايي وسایل نیولي چې په کورنو کې په جوړیدونکیو بمونو کې کاریږي او د پاکستان د تولیداتو نښې ورباند ې دي .
نوموړي دا څرګندونې له هغې څو ساعته مخکې وکړې چې سپینې ماڼۍ په افغانستان کې د خپله جنګي ستراتېژۍ د ارزیابۍ نتایج خپاره کړل.
د اسوشیتيد پریس خبري اژانس راپور وايي ، د اوباما په هغه پلان کې چې غواړي د افغانستان په جنوب او ختیځ کې ګڼ میشتي سیمې خوندي کړي لویه ستونزه همدا د وسلوالو د پټیدو او اکمالولو په برخه کې د پاکستان د رول ده .
د امریکا د متحدو ایالتونو د ټولو ځواکونو لوی درستیز امیر البحر مایک مولین د پنجشنپې په ورځ په کندهار او هلمند کې هغو وړو امریکايي بیسونو ته ورغی چې د پاکستان پولې ته نېږدې پراته دي .
نوموړي له ده سره ملګرو خبریالانو ته وویل داسې نښې ویني چې د دوی ستراتيژي د امریکايي او افغان افسرانو او ولسي خلکو تر منځ د باور په زیاتیدو کې موثره ده او سیمه ایزه حکومتي چارواکي ورسره بامسولیته او حسابي شوي دي .
د نوموړي په وینا په مجموعې توګه د پام وړ پرمختګ شوی دی . خو لا هم اوږده لاره په مخ کې ده .
تر دې مخکې په پاکستان کې ، مایک مولین په دې هېواد کې د وسلوالو د پټیدو ، تنظیمدو او مجهزیدو د ستونزې په اړه خبر ې کړې وې .
د افغانستان د جګړ ې دستراتېژۍ په اړه د سپینې ماڼۍ د ارزیابۍ په پنځه مخیزه خلاصه کې د وسلوالو په تجهیز کې د پاکستان د رول په اړه نرمه یادونه شوې ده .
ویل شوي ، د وسلوالو د پټیدو د خوندي ځایونو له منځه وړل د پاکستان سره په سرحدي سیمو کې د همکارۍ د پرختیا او زیاتول غواړي .
خو په دې کې د شمالي وزیرستان او بلوچستان چې تر ټولو ډېرې د اندیښنې سيمې دې مشخصه یادونه نه ده شوې .
د جګړې د ستراتيژۍ د ارزیابۍ په خلاصه کې ویل شوي دي چې پاکستان په تېر کال کې د وسلوالو د پټنځایونو د له منځه وړلو په برخه کې پر مختګ کړی او په دې برخه کې يې زیانونه هم ګاللي دي.
خو پاکستاني چارواکو ډېر تمرکز پر هغو وسلوالو ډلو کړی چې د ننه پاکستان کې يې ګواښونه رامنځ ته کړ ې دي ، دوی تر اوسه د امریکا هغه غوښتنه نه ده منلې چې په شمالي وزیرستان کې چې دی د وسلوالو پر ضد اقدام وکړي .
د امریکا د ټولو ځواکونو د لوی درستیز مرستیال جنرال جیمز کارټ ورایټ دا اونۍ په وشينګټن کې وویل په سرحدي سیمو کې د وسلوالو طالبانو د تګ راتګ د مخنیوي لپاره د امریکا او پاکستان ګډې هڅې د پخوانیو اتلس میاشتو په مقایسه په وروستیو دوو میاشتو کې چټکې شوې دي . او له دې سره له کرښې څخه د وسلوالو طالبانو د اوښتو را اوښتو وړتیا کمه شوې ده .
خو ایا دا هڅې پوره دي ، کارټ ورایټ وویل چې نه ، خو دا د سولې د ټینګښت لپاره لاره هواروي او زه باور لرم چې ډېر زر به یې اغیزې ووینو .