ناټو تایید کړې ده چې د شمالي کوریا ځواکونه د روسیې کورسک سیمې ته، چې له اوکراین سره ګډه پوله لري، انتقال شوي دي.

د ناټو سرمنشي مارک روتې د دوشنبې په ورځ په بروکسل کې په خپلو څرګندونو کې دا اقدام د روسیې په پراخ یرغل کې "د پام وړ شدت" وباله او ویې ویل چې دا وروسته له هغې چې په جګړه کې تر ۶۰۰ زرو زیات روسي سرتېري وژل شوي یا ټپیان شوي دي، د روسیې د ولسمشر ولادیمیر پوتین "مایوسي" ښيي.

د ناټو د سرمنشي تر څرګندونو وړاندې، په وروستیو اوونیو کې راپورونه ورکړل شوي وو چې شمالي کوریا له مسکو سره د نژدې اړیکو په نښه روسیې ته ځواکونه، تجهیزات او مهمات لېږي، څو د اوکراین پر ضد په جګړه کې وکارول شي.

د جنوبي کوریا استخباراتي راپورونه وايي چې د شمالي کوریا تر درې زرو زیات عسکر روسیې ته استول شوي، او تمه کېږي چې تر دسمبر میاشتې پورې به ۱۲زره نور سرتېري هم واستول شي.

د جنوبي کوریا د استخباراتو معلومات ښيي چې د جنګي الوتکو پیلوټان هم روسیې ته استول شوي دي.

د چین پولیس وايي چې په پلازمېنه پېکېنګ کې یوه ښوونځي ته نژدې د چړې په وسیله د برید په نتیجه کې د درېیو ماشومانو په ګډون پنځه کسان ټپیان شوي دي.

د اسوشیتیدپرېس خبري آژانس د راپور له مخې، دا حمله نن د لړم په ۷مه ماسپښین مهال په هایدیان نومې سیمه کې وشوه.

پولیسو په یوه بیان کې ویلي چې یو ۵۰ کلن مشکوک کس د دې برید په تړاو نیول شوی دی.

د دې برید د علت په اړه څه نه دي ویل شوي.

سږ کال په چین کې د چړې په وسیله د حملو څو پېښې وشوې چې په ځینو کې یې د ښوونځیو د زده‌کوونکو لاس و.

تېره میاشت د چین په جنوبي ښار شنژن کې په یوه برید کې یو ۱۰ کلن جاپانی زده‌کوونکی ووژل شو.

په جون میاشت کې په سوژو ښار کې د ښوونځي په بس تمځای کې په یوه برید کې یوه ښځه او ماشوم یې ټپیان شول او یوې چینایۍ مېرمنې چې غوښتل مداخله وکړي، ووژل شوه.

د روانې اکټوبر میاشتې په لومړیو کې د شانګهای ښار په یو سوپر مارکېټ کې د چړې په وسیله په جلا برید کې بیا درې کسان مړه او ۱۵ نور ټپیان شول.

د ناټو مشر ماریک روتې وايي، دا ټلواله تاییدوي چې د شمالي کوریا سرتېري د اوکراین پر پوله د روسیې کورسک سیمې ته رسېدلي دي.

روتې نن د اکټوبر ۲۸مه په بروکسل کې د وینا پر مهال وویل چې د اوکراین په جګړه کې د شمالي کوریا د سرتېرو ګډون به د روان کړکېچ له پراخېدو سره د پام وړ مرسته وکړي.

د ناټو عمومي منشي زیاته کړه، داسې مهال چې د اوکراین په جګړه کې له شپږ لکو ډېر روسي سرتېري مړه یا ټپيان شوي، دا اقدام د ولسمشر ولادیمیر پوتین د ناکامو هلو ځلو نښه ده.

د لبنان روغتیا وزارت وايي اسرايیل نن دوشنبه پر جنوبي ښار صور حمله کړې او لږ تر لږه ۵ کسان یې وژلي او ۱۰ نور ټپیان کړي دي.

دغه وزارت په یوه خبرپاڼه کې ویلي، اسرايیل نن سهار د دغه ساحلي ښار په مرکز کې یوه وداني ویشتلې چې ۵ کسان یې وژلي او ۱۰ نور ژوبل کړي دي.

د فرانسې خبري اژانس ویډیو راپورټر ویلي چې، د اضطراري چارو کارکوونکي یې لیدلي چې د ژوندي پاتې شویو د ژغورنې لپاره یې په امبولانس کې سیمې ته ځان رسولی و.

صور د لبنان یو ساحلي ښار دی چې د خپلې لرغونتیا له کبله د یونسکو د فرهنګي میراثونو په فهرست کې شامل دی.

اسرايیل تېره میاشت په لبنان کې د حزب‌الله ډلې پر مهمو مرکزونو خپلې هوايي حملې زیاتې کړې.

حزب‌‌الله یو پوځي-سیاسي سازمان دی چې امریکا یې د یو ترهګریز سازمان په توګه پېژني، خو اروپايي ټولنې یې یوازې پوځي څانګه په خپل تور فهرست کې شامله کړې ده.

د حزب‌الله سیاسي څانګه د دغه هېواد په پارلمان کې ځینې څوکۍ لري.

په پاکستان کې نن دوشنبه ماشومانو ته د ګوزڼ یا پولیو ضد واکسین ورکولو بل ملي کمپاین پیل شو.

اټکل کېږي، چې شا و خوا ۴۵ ميلیونه ماشومان به د کور پر کور کمپاین پر مهال واکسین شي.

دا په‌‌داسې حال کې ده، چې په پاکستان کې د ګوزڼ د مثبتو پېښو شمېر خورا لوړ شوی او له‌‌‌دې سره هغه هڅې زیانمنې شوي، چې له کلونو راهیسې د ګوزڼ د ختمولو لپاره کېږي.

که څه هم په پاکستان کې د پولیو ضد واکسین ورکولو کمپاین په منظم ډول عملي کېږي، خو پر روغتیايي کارکوونکو او د کمپاین د خوندیتوب لپاره پر ګمارل شویو پولیسو حملې کېږي.

په پاکستان کې سږکال د مثبو پېښو شمېر ۴۱ ته رسېدلی دی.

زیاتې پېښې په بلوچستان، سند او خیبرپښتونخوا ایالتونو کې ثبت شوې دي.

پاکستان او افغانستان د نړۍ هغه دوه هېوادونه دي، چې د ګوزڼ ناروغي په‌کې ختمه شوې نه‌ده. سږ میلادي کال تر دې دمه په افغانستان کې د پولیو ۲۲ مثبتې پېښې شوي دي.

د ایران تسنیم خبري اژانس راپور ورکړی، د ایران وسله‌والو ځواکونو لږ تر لږه څلور هغه "ترهګر" وژلي چې شک کېږي، د دغه هېواد په شمال ختیځ کې یې پر پولیسو په یوه مرګوني برید کې لاس درلود.

په سیستان او بلوچستان ولایت کې د شنبې ورځې په برید کې لس پولیس وژل شوي وو.

په پاکستان کې مېشتې جیش العدل ډلې د هغه برید مسوولیت منلی دی.

تسنیم د ایران سپاه پاسداران په وینا راپور ورکړی، چې دغو ځواکونو د استخباراتو او پولیسو په ملاتړ د یک‌شنبې په ورځ لږ تر لږه څلور "ترهګر" وژلي او څلور نور یې نیولي دي.

د شنبې د ورځې برید، په وروستیو میاشتو کې په‌دې سیمه کې تر ټولو خونړی برید ګڼل کېږي.

د اکتوبر میاشتې په لومړیو کې په سیستان او بلوچستان ولایت کې په دوو جلا بریدونو کې د دوو پولیسو په ګډون لږ تر لږه شپږ کسان وژل شوي وو.

د امریکا د بهرنیو چارو وزیر انتوني‌ بلېنکن ویلي، د ګرجستان د وړمې ورځې پارلماني ټاکنو پر مهال یې د بې‌نظمیو او تیت او پرک تاوتریخوالي راپورونه ترلاسه کړي دي.

هغه ویلي، نړیوالو څارونکو دغه ټاکنې ازادې او عادلانه نه‌دي بللي.

بلېنکن ویلي، امریکایي چارواکي د ټاکنو پر مهال د نړیوالو قوانینو د نقض ټول موارد غندي او د نړیوالو او ځایي څارونکو هغه غږ بدرګه کوي چې، د ټاکنیزو درغلیو په اړه راپورونه دې بشپړ و ارزول شي.

په ګرجستان کې واکمن ګوند د اکتوبر د ۲۶مې پارلماني ټاکنو کې د بریا اعلان کړی دی، خو لوېدیځ پلوه اپوزیسیون بیا د ټاکنو پایلې رد کړي او دا ټاکنې يې د کریملین له‌خوا "کودتا" او د "روسیې ځانګړي عملیات" بللي دي.

د هند صدراعظم نریندرا مودي‌ او هسپانوي سیال یې پېدرو سانچز نن دوشنبه د هند د پوځي الوتکو د تولید لومړنۍ شخصي فابریکه پرانيسته.

دغه فابریکه د هند د ګجرات ایالت په وادودارا ښار کې واقع ده، چېرته چې سلګونه کسان د هسپانیې د صدراعظم هرکلي ته راوتلي و.

په تېرو ۱۸ کلونو کې دا لومړی ځل دی چې د اسپانیې یو مشر هند ته سفر کوي.

د اسوشیتید پریس خبري اژانس په وینا نوې پرانيستل شوې فابریکه د هسپانیې د ایربس په همکارۍ به (سي ۲۹۵) ایربس پوځي ترانسپورتي الوتکې تولیدوي.

دغه تولیدېدونکې پوځي الوتکې به د هند د هوایي پوځ په واک کې ورکول کېږي.

د مصر ولسمشر عبدالفتاح السیسي‌ پرون په غزه کې د دوه ورځني اوربند وړاندیز اعلان کړی دی.

رویټرز خبري اژانس لیکلي چې، د ښاغلي السیسي د دغه وړاندیز یوه برخه دا ده چې یوشمېر برمته شوي اسرایلیان له فلسطیني بندیانو سره تبادله شي چې بیا "یوه بشپړ اوربند" ته زمینه برابره شي.

السیسي په قاهره کې خبریالانو ته د خپل وړاندیز شوي اوربند په اړه معلومات ورکړي، خو دا یې نه‌ده روښانه کړې چې دا پلان یې د جګړې اصلي لوریو اسراییل او حماس ته سپارلی او که نه.

حماس چې له څه باندې یوه کال راهیسې په غزه کې له اسراییلي پوځیانو سره په جګړه بوخت دي، د اروپایي ټولنې او امریکا له‌‌خوا د ترهګرو په توګه پېژندل کېږي.

د اوربند دغه هڅې داسې مهال کېږي چې، همدا پرون هم د غزې په شمال کې د اسراییلو بریدونو لږ تر لږه ۴۵ کسان ووژل.

د فلسطین روغتیايي چارواکو ویلي، د یک‌شنبې په ورځ د غزې پر شمال د اسراییلو په بریدونو کې لږ تر لږه ۴۵ کسان وژل شوي دي.

اسراییلي پوځيانو د غزې په شمال باندې یو وار بیا تمرکز زیات کړی، ځکه په خبره یې د حماس جنګیالي د انسجام په حال کې دي.

حماس د امریکا او اروپايي ټولنې له‌خوا ترهګريز سازمان ګڼل کېږي.

د غزې په شمال کې داسې وخت د لسګونو کسانو د وژل کېدو خبر ورکړل شوی چې د بندیانو او یرغملو د تبادلې په هدف د یوه لنډمهالي اوربند په سر خبرې پيلیږي.

د امریکا د مرکزي استخباراتو سي‌ای‌اې او د اسراییلو د استخباراتو ادارې موساد مشران به د قطر له صدراعظم سره په دوحه کې د دغه اوربند په څرنګوالي بحث وکړي.

تمه کېږي چې د لنډمهالي اوربند په وخت د حماس په لاس یوشمېر یرغمل شوي کسان د فلسطیني بندیانو په بدل کې خوشې شي.