اسراییلي پوځ د لومړي ځل لپاره تایید کړه چې په سوریه کې یې هم څه موده وړاندې ځمکني عملیات کړي دي.

که څه هم د دغو عملیاتو کره نېټه نه ده یاده شوې، خو د اسراییلو پوځ پرون یکشنبه وویل، دغو عملیاتو کې یې یو سوریایی وګړی چې له ایران پلوه شبکو سره یې کار کاوه، نیولی دی.

اسراییلي پوځ له تېر یوه کال راهیسې څو ځله پر سوریې هوایي بریدونه کړي، خو د اسوشېټېډ پرېس خبري اژانس د راپور له مخې، د تازه شخړو له پيله دا لومړی ځل دی چې د دغه هېواد سرتېري د سوریې خاورې ته د ننوتلو پخلی کوي.

د اسراییل پوځ د دغه وګړي نیول کېدل "د ځانګړو عملیاتو" یوه برخه بللې، خو ډېر جزییات یې نه دي ورکړي.

د سوریې حکومت د اسراییلو د دغو ځمکنیو عملیاتو په اړه څه نه دي ویلي، خو د شام په نوم حکومت پلوه راډیو ویلي، د اسراییلو پوځ اوړي پر مهال د سوریې په جنوب کې "د انسان تښتونې عملیات" ترسره کړي دي.

د امریکا د بهرنیو چارو وزارت چارواکو د ایراني‌الاصله امریکايي خبریال رضا ولیزاده نیول تایید کړي او ویلي یې دي چې "دا کار ظالمانه او د نړیوالو قوانینو خلاف دی."

د ازادې اروپا فردا راډیو د روان کال د میزان په ۲۴مه خبر ترلاسه کړ چې دغه ایراني الاصله امریکايي خبریال چې له ډېرو کلونو وروسته ایران ته تللی و، په تهران کې نیول شوی دی.

ولیزاده چې د فردا راډیو کارکوونکی و، د ۲۰۲۲م کال په نومبر کې یې دغه رسنۍ پرېښوده او د څه مودې لپاره بهر اوسېده.

د امریکا د بهرنیو چارو وزارت چارواکو د یکشنبې په ورځ اسوشېټېډ پرېس خبري اژانس ته وویل چې دوی په ایران کې د رضا ولیزاده له نیول کېدو خبر دي او زیاته یې کړه چې له خپلو سویسي ملګرو سره چې په ایران کې د امریکا د ګټو د ساتونکي په توګه کار کوي، کار کوي څو د دې قضیې په اړه نور معلومات راټول کړي.

د دغو چارواکو په خبره ایران په منظم ډول د سیاسي دلایلو له مخې امریکايان او د نورو هېوادونو اتباع په ناحقه زنداني کوي چې دا عمل یې ظالمانه او د نړیوالو قوانینو خلاف دی.

ایران تراوسه د ولیزاده نیول کېدل نه دي تایید کړي.

اسوشېټېډ پرېس په خپل نوي راپور کې لیکلي، چې په ملګرو ملتونو کې د ایران پلاوي په دې اړه دوی ته ځواب نه دی ویلی.

له بلې خوا ازادې اروپا/ازادي راډیو د یکشنبې په ورځ په یوه بیان کې ویلي چې په ایران کې د خپل پخواني همکار رضا ولیزاده له نیول کېدو خبره ده، خو تر اوسه یې په هغه د لګېدلو تورونو په اړه رسمي اسناد نه دي ترلاسه کړي.

فلسطیني مرستندویانو، په غزې کې د اسراییلو په بمباریو کې د لږترلږه ۳۱ تنو د وژل کېدو خبر ورکړی دی.

له دې ډلې لږترلږه ۱۳ کسان د غزې په شمال کې د بیت لاهیا په فلسطیني ښارګوټي او د جبالیا د کډوالو په کمپ وژل شوي.

دا کمپ د یکشنبې په ورځ د اسراییلي پوځ د نوي برید اصلي هدف بلل کېږي.

یو شمېر نور کسان د خان یونس په ګډون د غزې په ښار او جنوبي سیمو کې د اسراییلو په جلاجلا بریدونو کې وژل شوي دي.

د غزې د روغتیايي چارواکو په وینا، چې د حماس د سخت دریځې ډلې تر کنټرول لاندې فعالیت کوي، په دغه ښار کې د څلورو ماشومانو په ګډون اته کسان وژل شوي دي.

اسراییلي پوځ د حماس د بیا انسجام د مخنیوي لپاره له یوې میاشتې راهیسې د غزې په شمال باندې بریدونو ته زور ورکړی دی.

اسراییلي پوځ لا په غزه کې د یکشنبې ورځې د بریدونو او اوښتې مرګژوبلې په تړاو څه نه دي ویلي.

د هند تر ولکې لاندې کشمیر په مرکز سرینګر ښار کې ۱۱ کسان پرون په یوه بمي چاودنه کې ټپیان شوي دي.

د راپورونو له مخې، وسله‌والو بریدګرو د سرینګر په یوه ګڼه ګوڼي بازار کې لاسي بم پر هندي پوځیانو وغورځاوه.

د بريد مسوولیت لا کومې ډلې په غاړه نه دی اخیستی.

د چارواکو په خبره، ټپيان د درملنې لپاره روغتون ته وړل شوي، خو د چاودنې له کبله په بازار کې خلک په وېره کې دي.

دا برید یوه ورځ وروسته له هغې کېږي چې د سختدریځې اسلامپاله لشکر طیبه (LeT) ډلې یو جګپوړی قوماندان، د دوو نورو وسله‌والو سره په کشمیر کې د هندي سرتېرو لخوا ووژل شو.

سعودي عربستان د نړۍ د ټینس د غوره ښځینه لوبغاړو لپاره د فصل د وروستۍ تورنمنټ کوربه دی.

د ښځو د مسلکي ټینس اتحادیه یا "WTA" خپل وروستی تورنمنټ پرون شنبې (د عقرب په ۱۲مه) په ریاض ښار کې په دوو برخو؛ انفرادي یا یو کسیز او دوه کسیزو لوبو کې پیل کړ.

دا تورنمنټ، چې د "WTA" مهمې سیالۍ دي، په پیل کې یې د ښځو د ټینس اته غوره لوبغاړې په لیګ کې سره سیالي کوي او په پای کې څلور غوره لوبغاړې له دوو ګروپونو څخه په نیمه پایلوبه کې سره مخامخ کېږي.

د دې ټورنمنټ پایلوبه به د عقرب په نوولسمه په ترسره شي.

د نیوزیلنډ د کرکټ ملي لوبډلې د ټېسټ اتلولیو په لوبلړۍ کې هندوستان ته ۳ د صفر پر وړاندې ماتې ورکړه.

درېیمه ټېسټ سیالي چې د نومبر میاشتې په لومړۍ نېټه پیل شوې وه، نن یک‌شنبه د نومبر په ۳یمه نېټه د نیوزیلنډ په بریا سره پای ته ورسېده.

په وروستۍ ټېسټ لوبه کې هندوستان ونه‌کړای شول چې د نیوزیلنډ د ۱۴۷ منډو هدف پوره کړي، د یاد هدف په تعقیب هندوستان ۱۲۱ منډې وکړې او ټول لوبغاړي یې وسوځېدل.

د درې ټېسټ لوبو دغه لوبلړۍ د اکټوبر په ۱۶مه نېټه د بنګلور په ښار کې پیل شوه، چې دویمه لوبه یې د اکټوبر په ۲۴مه په پونې او وروستۍ یې د نومبر په لومړۍ نېټه د ممبيي په ښارونو کې پيل شوې وې.

په وروستۍ لوبه کې عجاز پټیل غوره لوبغاړی شو، هغه په دواړو پاڼيو کې ۱۱ هندي لوبغاړي سوځولي وو.

دغه راز ګرېګ یانګ د دې لوبلړۍ د غوره لوبغاړي جایزه وګټله، هغه په ۶ پاڼیو کې ۲۴۴ منډې کړې وې.

د ویلو ده چې تر دې ماتو وروسته هندوستان د ټېسټ اتلولیو د لوبډلو د نومرو په جدول کې له لومړي مقام دویم ته ښکته شوه او نیوزیلنډ بیا په څلورم مقام کې ځای لري.

د دغې جدول لومړی مقام اوس له اسټرالیا سره دی.

د اسراییل پوځ د شنبې په ماښام اعلان وکړ چې، د غزې په شمال کې یې یو سرتېری د لاسي بم په چاودنه کې وژل شوی دی.

د اسراییلي رسنیو د راپور له‌مخې، دا سرتېری یې ظاهراً په مستقیم ډول د جګړې په تړاو نه‌دی وژل شوی.

تر دې څو ساعته مخکې هم د اسراییل پوځ راپور ورکړی و چې، په شمالي غزه کې یې دوه نور عسکر وژل شوي دي.

د درې واړه عسکرو، چې د شنبې په ورځ یې د وژل کېدو خبر ورکړل شو، عمرونه د ۲۰ او ۲۲ کلونو ترمنځ وو.

د اسراییل د پوځ د شمېرو له‌مخې، د هغو اسراییلي سرتېرو شمېر، چې په غزه او لوېدیځه غاړه کې په ځمکنیو عملیاتو کې وژل شوي، ۳۷۰ ته رسېدلی دی.

د اسراییل پوځ همداراز اعلان وکړ چې، په تېره یوه میاشت کې یې په جبالیا کې، چې د غزې په شمال کې ده، د عملیاتو پر مهال شاوخوا ۹۰۰ "ترهګر" وژلي او ۷۰۰ فلسطینیان یې نیولي دي.

په‌داسې حال کې چې د ایران له لوري پر اسراییل د نوي برید د احتمال په اړه اندېښنې زیاتې شوې دي، د امریکا پوځ اعلان کړی چې بي۵۲ ستراتېژیکې بمبار الوتکې یې منځني ختیځ ته رسېدلي دي او له‌دې سره هم‌مهاله اکسیوس وېب‌پاڼې د "سپینې ماڼۍ له‌خوا تهران ته د خبرداري پیغام" په اړه راپور ورکړی دی.

د امریکا مرکزي قوماندانۍ (سنتکام) نن سهار (یک‌شنبه، د لړم په ۱۳مه) اعلان وکړ چې بي۵۲ الوتکې د دې قوماندانۍ د مسوولیت سیمې ته داخلې شوې دي.

سنتکام د بمبارد الوتکو شمېر په شمول نور جزییات نه‌دي ورکړي او یوازې یې ویلي چې دا الوتکې د امریکا د ماینت له هوايي اډې څخه روانې شوې وې.

دا خبر یوه ورځ وروسته له هغې خپور شو چې، پنتاګون اعلان وکړ د متحدایالتونو دفاع وزیر امر کړی چې، څو بي۵۲ الوتکې، همداراز بېړۍ ماتوونکې بېړۍ او د سونګ رسولو الوتکې منځني ختیځ ته واستول شي.

د پنتاګون په وینا، دا بمبار الوتکې او بېړۍ منځني ختیځ ته د امریکا د پوځي حضور د پیاوړتیا، د اسراییل د دفاع او د بریدونو د شنډولو له لارې د کړکېچ د کمولو په هدف لېږل شوي دي.

د روغتیا نړیوال سازمان وايي، د غزې په شمال کې پرون د ګوزڼ ضد واکسین پر یوه مرکز په یوه حمله کې د څلورو ماشومانو په ګډون ۶ کسان ټپیان شوي دي.

دغه سازمان پرون شنبه د غزې په شمال کې د ګوزڼ ضد واکسین د کمپاین دویم پړاو پیل کړ، ځکه دغه کمپاین څو ورځې مخکې د اسرايیل د بمباریو له کبله ځنډول شوی و.

د روغتیا نړیوال سازمان مشر تدروس ادهانوم ګیبریسوس ویلي، د واکسین دا مرکز په هغه ساحه کې و، چې مخکې هلته په جګړه کې پر بشري وقفې موافقه شوې وه او له‌مخې یې د واکسین پر مخ بېولو ته اجازه ورکړل شوې وه.

دغه سازمان نه‌دي ویلي چې دغه حمله چا کړې ده، خو اسرايیل په غزه کې د هغو سرچینو ادعا رد کړې چې ویلي یې وو، د اسرايیل یوې بې‌پيلوټه الوتکې پر دغه مرکز حمله کړې ده.

د اوکراین په پارلمان کې د بشري حقونو کمېشنر دمیترو لوبینیتس نن یک‌شنبه له روسیې غوښتنه وکړه، چې د اوکراین د جګړې د اسیرانو لېست برابر کړي.

دا هغه اسیران دي چې ښايي د روسي اسیرانو د خوشې کېدو په بدل کې ازاد شي.

تر دې مخکې مسکو پر کییف تور لګولی و، چې د اسیرانو د تبادلې پروسه سبوتاژ کوي.

لوبینیتس د ټلېګرام په کانال کې لیکلي، غواړم د روسیې د بشري حقونو له کمېشنر د اوکراین د ټولو اسیرانو لېست چې روسیه یې سم د لاسه تبادلې ته تیاره ده ترلاسه کړم.

د اوکراین دغه چارواکي لیکلي؛ موږ هر وخت د جګړې د اسیرانو تبادلې ته تیار یو.

په وږي/ سنبلې میاشت کې هم مسکو او کییف د متحده عرب اماراتو په منځ‌ګړیتوب د یو بل ۱۰۳- ۱۰۳ جنګي اسیران تبادله کړل.