نړۍ
کمالا هاریس: په غزه کې د بې ګنا فلسطینیانو وژل راته د منلو نه دي
د امریکا د ولسمشر مرستیاله کمالا هاریس وایي، په غزه کې د بې ګنا فلسطینیانو وژل ورته د منلو نه دي.
مېرمن هاریس چې د ډیموکرات ګوند لهخوا د ولسمشریزو ټاکنو نومانده ده، پرون یکشنبه دغه څرګندونې وکړې او ټینګار یې وکړ چې دوی د غزې د جګړې پای ته رسېدل غواړي.
نوموړې زیاته کړې چې د همدې هڅو په موخه یې د بهرنیو چارو وزیر انټوني بلېنکن یوځل بیا منځني ختیځ ته ځي او هلته به د اړوندو لوریو له لوړپوړو چارواکو سره خبرې وکړي.
که څه هم منځني ختیځ ته د بلېنکن د راتلونکي سفر نور جزییات نهشته، خو د جرمني خبري اژانس یا "ډيپياې" لیکلي چې بلېنکن به سبا سه شنبه اسراییلو ته ورسېږي.
په غزه کې د اسراییلي پوځیانو د عملیاتو له پيله تراوسه څه باندې ۴۲ زره فلسطینیان وژل شوي دي.
جانسن: امریکا ژر پر ایران د اسراییلو د غچ اخیستونکو بریدونو د اسنادو د افشاګرۍ په اړه څېړنې پيلوي
د امریکا د استازیو جرګې مشر مایکل جانسن وايي، متحده ایالتونه ژر پر ایران د اسراییلو د غچ اخیستونکو بریدونو د اسنادو د افشاګرۍ په تړاو څېړنې پيلوي.
دا اسناد د شنبې په ورځ یوه ټلګرامي چینل ته لیک شوي دي.
د "سيایناین" د راپور پر اساس، دا اسناد ډېر محرمانه دي او هغه نښانونه پرې دي چې یواځې یې امریکا او د فایف آیز ډلې غړي اسټرالیا، کاناډا، نیوزیلنډ او بریټانیا کتلی شي.
د امریکا متحده ایالتونو دفاع وزارت پنټاګون د دغو رپوټونو د څېړلو په حال کې دی.
نیویارک ټایمز هم راپور ورکړی چې امریکايي چارواکي هڅه کوي د دغو اسنادو افشا کوونکې سرچینې معلومې کړي.
دا اسناد چې د سټلایټ عکسونه هم پهکې شته په راتلونکو ورځو کې په ایران د اسراییلو غچ اخیستونکي برید ته اشاره کوي.
نیویارک ټایمز بیا دا هم ویلي، دا اسناد یواځې د سټلایټي عکسونو په ارزونې وړاندې کوي.
د نیوزیلنډ ښځینه کرکټ لوبډلې په لومړي ځل شل اوريز نړيوال جام وګاټه
د نیوزیلنډ ښځینه کرکټ لوبډلې د شل اوریز نړیوال جام په پایلوبه کې د سویلي افریقا په ماتولو سره په لومړي ځل نړیوال جام وګاټه.
دغه پایلوبه نن یکشنبه د اکټوبر په ۲۰مه نېټه د عربي متحده اماراتو د دوبۍ په لوبغالي کې ترسره شوه، چې نیوزیلنډ د ۳۲ منډو په تفاوت وګټله.
د لوبې پچه سویلي افریقا وګټله او توپ اچونه یې غوره کړه، د نیوزیلنډ لوبډلې په شلو اورونو کې د ۵ لوبغاړو تر سوځېدو وروسته ۱۵۸ منډې وکړې.
د یادې لوبډلې په ګټه امیلیا کر۴۳، بروکي هالیډی ۳۸ او سوزي بټز ۳۲ منډې وکړې.
سویلي افریقا ته بیا په توپ اچونه کې نانکولولیکو ملابا دوه لوبغاړې وسوځولې.
د نیوزیلنډ د هدف په دوام د سویلي افریقا لوبډلې ۱۲۶ منډې وکړې، ۹ لوبغاړي یې وسوځېدل او یو وار بیا یې پایلوبه وبایلله.
لورا د سویلي افریقا مخکښه منډه جوړونکې وه، چې ۳۳ منډې یې کړې وې او د نیوزیلنډ په توپ اچونکو کې امیلا کر او رسمیري مایر ۳ـ۳ لوبغاړې وسوځولې.
د نیوزیلنډ ملي لوبډله تر دې وړاندې هم درې ځل تر پایلوبې رسېدلې وه، خو په لومړي ځل یې پایلوبه وګټله.
د سویلي افریقا ښځینه لوبډلې بیا تېر ځل هم په پایلوبه کې د اسټرالیا پر وړاندې ماتې خوړلې وه او لا یې هيڅ نړیوال جام نهدی ګټلی.
د ویلو ده چې سږکال په لومړي ځل د ښځینه نړیوال جام امتیازات هم د نارینو په څېر و، ګټونکې لوبډلې ته دوه اعشاریه ۳۴ میلیونه او دویم مقام ګټونکې لوبډلې ته ۱ اعشاریه ۱۷ میلیونه امریکايي ډالر ورکړل شول.
د اسراييل پوځ لبنان کې د حزبالله پر استخباراتي مرکز د بريد خبر ورکړی
د اسراییل پوځ اعلان کړی چې دوی د یکشنبې په ورځ په لبنان کې د حزبالله د استخباراتو پر یوه مرکز او په پلازمېنه بیروت کې د وسلو د تولید پر یوه ځمکني ورکشاپ برید کړی دی.
د اسراییل پوځ په یوه بیان کې ویلي چې، د دوی جنګي الوتکو د حزبالله درې قوماندانان وژلي دي، چې پهکې عباس سلیمه د دې ډلې د جنوبي قوماندانۍ یو جګپوړی غړی، رضا عباس عواضه د اړیکو ماهر، او احمد علي حسین شامل دي، چې د اسراییلو پوځ په وینا د دې ډلې د ستراتیژیکو وسلو د پراختیا مسوول و.
تر اوسه روښانه نهده چې دا درې کسان په استخباراتي مرکز کې په برید کې وژل شوي او که په بېلو عملیاتو کې.
حزبالله تر اوسه پهدې اړه څه نهدي ویلي.
د لبنان دولتي رسنیو راپور ورکړی چې د یکشنبې په سهار دوه اسراییلي بریدونه په (حاره حریک) او په (حداث) کې شوي، دا ټولې سیمې د حزبالله تر کنټرول لاندې د بیروت د جنوب په ضاحیه کې موقعیت لري.
د اسراییل پوځ د شنبې په ورځ اعلان وکړ، د لبنان په جنوب کې یې تونلونه او ځمکني تاسیسات ویجاړ کړي او د جمعې په ورځ یې د حزبالله د بنت جبیل سیمې مرستیال قوماندان وژلی دی.
اسراییلي پوځ همداراز ویلي چې، په نورو بریدونو کې یې د لبنان په جنوب کې د حزبالله ۳ وسلهوال وژلي دي.
کيوبا کې د يوې برخې برېښنا د بېرته فعالېدو خبر ورکړل شوی
د کیوبا چارواکي وايي، په تېرو ۲۴ ساعتونو کې د برېښنا په ملي شبکې کې له دوو لویو پرچاویو وروسته د دې هېواد، چې ۱۰ میلیونه نفوس لري، د یوې برخې لپاره برېښنا بېرته فعاله شوې ده.
لهدې سره سره، د کیوبا د برېښنا اتحادیې نن (یکشنبې) د نویو ستونزو خبر ورکړ او په خپل رسمي ټلېګرام چېنل کې یې ولیکل: "د سهار په ۶ بجې او ۱۵ دقیقو د برېښنا ملي شبکه یو وار بیا پرچاو شوه."
په کیوبا کې په لومړي ځل په پراخه کچه د برېښنا پرچاوي د جمعې په غرمه د دې هېواد په یوه ستر برېښناکوټ کې د ستونزې د پېښېدو له کبله پیل شوه.
دا پرچاوي د دې هېواد لپاره جدي ګواښ دی، ځکه چې د برېښنا نشتوالی د اوبو رسولو شبکه هم بندوي او یخچالي خواړه په چټکۍ سره خرابېږي.
د برېښنا شدید کمښت حکومت اړ کړی چې، غیر ضروري کارګران کور ته ولېږي او ښوونځي، اقتصادي او تفریحي مرکزونه وتړي.
غزه کې روغتيايي چارواکي: د اسراييل په هوايي بريد کې ۷۳ کسان وژل شوي
د حماس تر کنټرول لاندې روغتیايي چارواکي وايي، پرون (شنبې) د اسرايیل هوايي ځواک په شمالي غزه کې د بیت لاهیا په ښار کې یوه څو پوړیزه ودانۍ په نښه کړه، چې لږ تر لږه ۷۳ کسان پهکې وژل شوي او لسګونه نور ټپیان شوي دي.
حماس د امریکا او اروپایي اتحادیې لهخوا تروریستي ډله ګڼل کېږي.
په ورته وخت کې، د اسرايیل پوځ وویل چې، د دې برید په اړه د مرګژوبلو راپورونه څېړي او زیاته یې کړه: "لومړنۍ څېړنې ښيي چې د مرګژوبلو په شمېر کې مبالغه شوې او له ترلاسه شویو معلوماتو سره سمون نهخوري."
د رویټرز خبري اژانس د راپور لهمخې، پر جګړې د اسرايیل، حماس او حزبالله ټینګار د دې هیله کمه کړې چې د یحیی سنوار وژل به په غزه او لبنان کې اوربند ته لاره هواره کړي.
د دې راپور لهمخې، د اسرايیل الوتکو د شنبې په ورځ د غزې په جنوب کې اعلامیې غورځولې، چې په هغو کې د یحیی سنوار عکس او دا پیغام لیکل شوی و چې: "حماس به نور په غزه واکمني ونهکړي."
له بلې خوا اسراییل پرون (شنبې) په بیروت او لمنو کې یې څو درنې هوايي حملې وکړې.
د خبري اژانسونو د راپورونو لهمخې، له بمباریو وروسته د بیروت او شاوخوا سیمو په اسمان کې لوخوړې او لوګي پورته شول.
ايټاليا له دغه هېواد يوشمېر ايستل شوي پناه غوښتونکي بېرته راګرځولي
ایټالیا درې ورځې وروسته لهدې چې یوشمېر پناه غوښتونکي یې له اروپايي اتحادیې د باندې، البانیا ته واستول، د خپل هېواد د محکمې په امر ۱۲ تنه بېرته راوګرځول.
رویټرز خبري اژانس پرون (شنبې) راپور ورکړ چې په روم کې د محکمې د حکم پر اساس، دا پناه غوښتونکي د دې لپاره بېرته ایټالیا ته راوګرځول شول چې، د دوی اصلي هېوادونه یعني مصر او بنګلهدېش د هغوی لپاره خوندي هېوادونه ګڼل کېدای نهشي.
امکان و چې د هغوی په منځ کې د یوشمېر کسانو غوښتنلیکونه رد شوي او له البانیا څخه خپلو اصلي هېوادونو ته استول شوي وای.
ټاکل شوې ده چې، د ایټالیا حکومت د محکمې د پرېکړې په اړه د روانې اوونۍ د سهشنبې په ورځ پرېکړه وکړي.
د امریکا د دفاع وزیر: اسراییل دې په بیروت کې او د بیروت شاوخوا خپل بریدونه څه کم کړي
د امریکا د دفاع وزیر وایي، واشنګتن غواړي چې اسراییل په بیروت کې او د بیروت شاوخوا خپل بریدونه څه کم کړي.
لویډ اسټن زیاته کړه چې د ملکي تلفاتو شمېر خورا لوړ دی او هیله ده چې د خبرو له لارې دې ته زمینه برابره شي چې په دواړو لوریو کې ملکیان بېرته خپلو کورونو ته ستانه شي.
لویډ اسټن دا خبرې پرون د ایټالیا په ناپولي کې د نړۍ د اوو سترو صنعتي هېوادونو د چاروکو له غونډې وروسته وکړې.
د جي اووه سرمشریزې پرون ایران ته خبرداری ورکړ چې په منځني ختیځ کې د خپلو نیابتي ډلو له ملاتړه لاس واخلي.
نتنیاهو: د حزبالله دا هڅه چې ما او زما مېرمنه ووژني، لویه اشتباه وه
د اسراییل صدراعظم بنیامین نتنیاهو پرون شنبه د ایران له ملاتړه برخمنه حزبالله ډله تورنه کړه چې د ده د وژلو هڅه یې کړې ده.
دا څرګندونې داسې وخت کېږي چې په منځني کې کړکېچ زیات شوی او اسراییل د ایران د راکټي حملو د غچ اخیستو ګوتڅنډنه کړې ده.
د نتنیاهو دفتر وايي، په مرکزي سیمه قیساریه کې د نتنیاهو د کور پر لوري یوه بې پېلوټه الوتکه توغول شوې وه، خو نتنیاهو او مېرمن یې هغه شېبه په کور کې نه وو او چا ته د سر زیان نه دی اوښتی.
نتنیاهو په یوه اعلامیه کې ویلي: "د ایران د نیابتي ډلې حزبالله دا هڅه چې ما او زما مېرمنه ووژني، لویه اشتباه وه."
د لبنان حزبالله ډلې چې ایران یې تمویلوي، د دې حملې مسوولیت نه دی منلی، خو په ملګرو ملتونو کې د ایران استازولۍ پرون ناوخته ویلي، دا د حزبالله کار و.
امریکا، د ایران له ملاتړه برخمن حزبالله ډله د یوه ترهګریز سازمان په توګه پېژني او اروپايي ټولنې د دې ډلې یوازې پوځي څانګه په تور لېست کې اچولې ده.
د نیوزیلنډ او سویلي افریقا ترمنځ د ښځو شل اوریز جام پایلوبه ترسره کېږي
ټاکل شوې ده چې د کرکټ نړیوالې شورا له لوري د ښځو ترمنځ د پیل شوي شل اوریز نړیوال جام پایلوبه نن یکشنبه د اکټوبر په ۲۰مه نېټه ترسره شي.
دغه پایلوبه به د کابل پر وخت ماښام ۶:۳۰ نیمې بجې د سویلي افریقا او نیوزیلنډ لوبډلو ترمنځ د عربي متحده اماراتو د دوبۍ په لوبغالي کې وي.
د نیوزیلنډ لوبډلې په نیمه پایلوبه کې د وېسټ اینډیز ته ماتې ورکړه او سویلي افریقا بیا له اسټرالیا نیمه پایلوبه وګټله.
تر دې دمه د سویلي افریقا او نیوزیلنډ ښځینه ملي لوبډلو د شل اوریز نړیوال جام اتلولي نه ده ګټلې.
تر دې وړاندې د نیوزیلنډ ملي لوبډلې دوه ځل د نړیوال جام پایلوبې بایللې وې او سویلي افریقا بیا تېرکال له اسټرالیا په پایلوبه کې ماتې وخوړه.
دغه شل اوریز نړیوال جام د اکټوبر په درېیمه نېټه د لسو هېوادونو ترمنځ پیل شو او تر دې دمه پکې ۲۲ سیالۍ ترسره شوي دي.
د ویلو ده چې د یاد نړیوال جام تر پیل وړاندې د کرکټ نړیوالې شورا ویلي وو چې دا ځل به د ښځینه نړیوال جام امتیازات هم د نارینهوو په څېر وي او ګټونکې لوبډلې ته به دوه اعشاریه ۳۴ میلیونه او دوهم مقام ګټونکې لوبډلې ته به ۱ اعشاریه ۱۷ میلیونه امریکايي ډالر ورکوي.