په ایران کې د ولسمشرۍ تر وخت مخکې ټاکنې دویم پړاو ته لاړې ځکه یو کاندید ته هم پنځوس فیصده رایې نه دي ګټلي.

د پرونیو ټاکنو د شمېرل شویو رایو له مخې اصلاح غوښتونکي کاندید مسعود پزشکیان ۱۰ میلیونه ۴۱۵زره ۱۹۱ رایې ګټلي، تر هغه وروسته بل کاندید سعید جلیلي ۹ میلیونه ۴۷۳زره ۲۹۸ رایې خپلې کړي، تر دوی وروسته محمد باقر قالیباف څه باندې ۳ میلیونه او بل کاندید مصطفی پور محمدي څه باندې ۲۰۰زره رایې ګټلې دي.

تسنیم خبري اژانس چې د ایران له سپاه پاسداران ځواک سره نږدې اړیکې لري، راپور ورکړی و چې په پرونیو ټاکنو کې د خلکو لږ ګډون ته په پام ښايي دغه ټاکنې دویم پړاو ته لاړې شي.

د ایران د قوانینو له مخې که کوم کاندید لږ تر لږه ۵۰ فیصده رایې نه وي ګټلي، د دوو مخکښو کاندیدانو ترمنځ به بله جمعه بیا ټاکنې کېږي.

د ایران ۶۱ میلیونه وګړي د رایې ورکولو پر شرایطو برابر دي او خلک له ۱۸ کلنۍ رایه ورکولی شي.

د ایران پخوانی ولسمشر ابراهیم رئیسي، د بهرنیو چارو وزیر حسین امیر عبداللهیان او ځینې نور چارواکي د مې میاشتې پر ۱۹مه د څرخي الوتکې د نسکورېدو په پېښه کې مړه شول او دا ټاکني د رئیسي د ځایناستي د ټاکلو لپاره کېږي.

په ایران کې د ولسمشرۍ تر وخت مخکې ټاکنو چې پرون ترسره شوې د رایو شمېرل روان دي.

د لومړنیو نتایجو له مخې اصلاح غوښتونکی کاندید مسعود پزشکیان او بل کاندید سعید جلیلي تر نورو مخکې دي.

د دغو شمېرو له مخې مسعود پزشکیان تر اوسه ۸ ملیونه او ۳۰۲زره او ۵۷۷ رایې ګټلي او سعید جلیلي هم ۷ میلیونه، ۱۸۹زره او ۷۵۶ رایې خپلې کړي او په دویم کتار کې راغلی دی.

تر دوی وروسته محمد باقر قالیباف او مصطفی پور محمدي راغلي دي.

تسنیم خبري اژانس چې د ایران له سپاه پاسداران ځواک سره نږدې اړیکې لري، راپور ورکړی چې په پرونیو ټاکنو کې د خلکو لږ ګډون ته په پام ښايي دغه ټاکنې دویم پړاو ته لاړې شي.

که کوم کاندید لږ تر لږه ۵۰ فیصده رایې نه وي ګټلي، د دوو مخکښو کاندیدانو ترمنځ به بله جمعه بیا ټاکنې کېږي.

د ایران ۶۱ میلیونه وګړي د رایې ورکولو پر شرایطو برابر دي او خلک له ۱۸ کلنۍ رایه ورکولی شي.

د ایران پخوانی ولسمشر ابراهیم رئیسي، د بهرنیو چارو وزیر حسین امیر عبداللهیان او ځینې نور چارواکي د مې میاشتې پر ۱۹مه د څرخي الوتکې د نسکورېدو په پېښه کې مړه شول او دا ټاکني د رئیسي د ځایناستي د ټاکلو لپاره کېږي.

امریکايي ځواکونو پرون جمعه ویلي چې د مخکېنیو ۲۴ ساعتونو پر مهال یې په یمن کې د حوثي یاغیانو تر ولکې لاندې سیمو کې اووه بې پېلوټه الوتکې، دغه راز د سوق او ادارې یوه واسطه ویجاړه کړې ده.

د امریکا مرکزي قوماندانۍ یا سنټکام پر خپله ایکس­پاڼه یا پخواني ټویټر لیکلي، پر دغو بې پېلوټه الوتکو او موټر یې ځکه حمله کړې چې د امریکايي ځواکونو ائتلاف دغه راز یې په سیمه کې تجارتي کښتیو ته خطر پېښ کړی و.

حوثي یاغیان چې ایران یې ملاتړ کوي د ۲۰۲۳م کال له نومبر میاشتې راهیسې په سره سمندرګي او عدن خلیج کې پر کښتیو حملې کوي.

دغه یاغیان وايي، دا حملې په غزې تړانګه کې د اسراییل او حماس ډلې تر منځ په روانه جګړه کې له فلسطینیانو سره د پیوستون په خاطر کوي.

د امریکا متحدو ایالتونو او بریتانیا د حوثي یاغیانو د ځواک ختمولو لپاره په یمن کې پر دې ډلې هوايي حملې کړې دي.

د پاکستان د پارلمان ولسي جرګې پرون جمعه د امریکا د کانګرس هغه پرېکړه‌لیک وغانده چې روانه اوونۍ یې د پاکستان په ترسره شویو پارلماني انتخاباتو کې د پراخو درغلیو د ادعاوو په اړه د خپلواکې پلټنې غوښتنه کړې ده.

د ولسي جرګې د پرېکړه‌لیک مسوده چې په دې جرګه کې د واکمن ګوند د غړې شائسته ملک له‌خوا وړاندې شوی وه، د پخواني صدراعظم عمران خان د ګوند د وکیلانو له اعتراضونو سره سره تصویب شوه.

د عمران خان ګوند پلویانو ادعا کړې چې د فبرورۍ د اتمې په پارلماني ټاکنو کې پراخه درغلي شوې ده.

مېرمن ملک په یوه تلوېزیوني وینا کې وویل چې د متحده ایالاتو د چهارشنبې د ورځې تصویب شوی پرېکړه‌لیک د دې په وینا، په بشپړ ډول له حقایقو سره په تضاد کې دی.

هغې وويل، پاکستان به په خپلو کورنيو چارو کې دا ډول لاسوهنه ونه زغمي.

تر دې مخکې د پاکستان دفاع وزیر خواجه آصف هم د امریکا د استازیو جرګې پر دغه پرېکړه‌لیک انتقاد کړی او ویلي وو چې د امریکا متحده ایالات حق نه لري چې د پاکستان په کورنیو چارو کې مداخله وکړي.

دغه انتخابات چې په نتیجه کې یې هېڅ یو ګوند ونه توانېد چې په یوازې توګه اکثریت ترلاسه کړي، له تاوتریخوالي، د ټیلیفوني او نورو ټولنیزو شبکو د بندېدو او د پخواني زنداني صدراعظم عمران خان د ګوند له‌‌خوا د درغلیو له ادعاوو سره مله وه.

خو د پاکستان د انتخاباتو کمېسیون دغه ادعاوې رد کړي دي.

ټاکل شوې د هند او جنوبي افریقا ملي ټیمونه نن په ویسټ اینډیز کې د شلو اوورونو د نړیوال جام پایلونه وکړي.

دواړه لوبډلې به نن د کابل پر وخت ماښام اووه بجې د ویسټ اینډیز د باربادوس په بریجټاون کې سره مخامخې شي.

جنوبي افریقا په نیمه پایلوبه کې افغانستان او هند انګلنډ یا انګلستان ته په ماتې ورکولو سره پایلوبې ته ووتل.

د بریتانیا پولیسو پرون خبر ورکړی چې د "یوازې تېل بند کړئ" ډلې د اقلیمي فعالانو ۲۷ غړي یې نیولي دي.

دغه کسان په دې شک نیول شوي چې ښايي په راروانو میاشتو کې د هوايي ډګرونو فعالیت ټکنی کړي.

پولیسو په یوه اعلامیه کې ویلي، پولیسو په ملي سطحه د عملیاتو په لړ کې چټک اقدام وکړ.

د پولیسو په وینا، د اقلیم دغه ۲۷ فعالان د ملي بنسټونو د چارو د ګډوډۍ په شک نیول شوي دي.

د "یوازې تېل بند کړئ" په نوم د فعالانو ډله د بریتانیا له حکومته غواړي چې د تېلو او ګازو ټول نوي اکتشافات بند کړي او ویلي یې دي، تر هغو چې حکومت داسې اقدام نه وي کړي، دوی به له خپلو مبارزو لاس وانخلي.

اسراییلي ځواکونو پرون هم د غزې تړانګې په دوو جنوبي او شمالي سیمو کې خپل تهاجم ته دوام ورکړ.

په همدې حال کې د فلسطینیانو روغتیايي چارواکي وايي، په رفح ښار کې د ټانکونو په تازه ډزو لږ تر لږه ۱۱ کسان وژل شوي دي.

ځايي اوسېدونکي او د حماس ډلې رسنۍ وايي، د اسراییل ټانکونه د رفح ښار په شاکوش سیمه کې خپل مخکې تګ ته دوام ورکړ او په زرګونو بېځایه شوي کسان یې اړ کړل چې له کمپونو ووځي، یا د شمال پر لوري کډه شي یا هم نږدې ښار خان یونس ته ځانونه ورسوي.

د اسراییل پوځ لا د دغو څرګندونو په باب عکس العمل نه دی ښودلی.

د مې میاشتې له اوومې ټانکونه د رفح ښار په بېلابېلو سیمو کې مخکې تللي او اسراییلي ځواکونه له مصر سره پر ټولو سرحدي سیمو کنټرول لري.

رفح ښار د غزې تړانګې د ۲ میلیونو او ۳لکه اوسېدونکو لپاره یوازینۍ دروازه ده چې هر ډول اکمالات ورباندې کېږي.

د فنلنډ دفاع وزارت له اوکراین سره د ۱۷۰ ډالرو په ارزښت د پوځي مرستو اعلان وکړ.

د فنلنډ ولسمشر الکساندر سټب نن د حکومت له لورې د دې مرستې وړانیز تصویب کړ.

د فنلنډ دفاع وزارت تر اوسه دا نه ده روښانه کړې چې په دې مرستو که څه شامل دي او څرنګه به یې له اوکراین سره کوي، خو دا له اوکراین سره د فنلنډ د مرستو ۲۴مه بسته ده.

د اذربایجان ولسمشر الهام علییف نن پارلمان منحل کړ او اعلان یې وکړ چې د سپټمبر په لومړۍ نېټه به انتخابات ترسره شي.

مخکې ټاکل شوې وه چې دا ټاکنې په نومبر کې وشي.

د نوي اذربایجان واکمن ګوند تېره اوونۍ وویل چې د ملګرو ملتونو د اقلیمي کنفرانس په ګډون یو شمېر غونډې شته چې د انتخاباتو په نېټه کې بدلون ته اړتیا لیدل کېږي، د اساسي قانون محکمې پرون دا وړاندیز تصویب کړ.

مخالفو سیاستوالو او ګوندونو انتقاد کړی او تور یې پورې کړی چې واکمنان په دې ډول په انتخاباتو کې درغلیو ته لارې پرانېزي.

د پولنډ صدراعظم وایي، دی ډاډه دی چې له اوکراین سره به د ناټو تر راتلونکې سرمشریزې مخکې دوه اړخیز امنیتي تړون لاسلیک شي.

ټاکل شوې ده چې د ناټو د مشرانو غونډه د جولای په نهمه په واشنګټن کې جوړه شي.

د پولنډ صدراعظم ډونالد ټوسک نن خبریالانو ته وویل چې د اوکراین له ولسمشر سره به په وارسا کې د دې تړون په اړه خبرې وکړي او ۹۹ فیصده دا امکانات شته چې له ولسمشر ولودومیر زیلینسکي سره دا تړون د ناټو تر سرمشریزې مخکې لاسلیک کړي.