تمه ده د اوکراین ولسمشر ولودیمیر زیلینسکي نن د سپټمبر۲۶مه د امریکا له ولسمشر جوبایډن او د هغه له مرستیالې کاملا هاریس سره په کتنه کې د روسیې پر وړاندې جګړې کې د "بریا پلان" وړاندې کړي.

په وروستیو کې د امریکا له ولسمشر سره دا د زیلینسکي دوهمه کتنه ده.

زیلینسکي پرون د ملګرو ملتونو د عمومي اسامبلې په ناسته هم له خپل امریکايي سیال سره لنډ لیده کاته درلودل.

سپینه ماڼې ویلي، بایډن به نن له غرمې وروسته د ولودیمیر زیلینسکي کوربه کوي.

زیلینسکي به د بایډن له مرستیالې کاملا هاریس سره هم وګوري.

دا لید کاته په داسې حال کې دي چې روسیې پر اوکراین بریدونه ته زو ورکړی او ملکي اهداف يې په نښه کړي دي.

پاکستاني چارواکو نن وویل چې د خیبر پښتونخوا ایالت په کرمه سیمه کې د شیعه او سنیانو ترمنځ په روانو نښتو کې د وژل شویو شمېر ۲۵ ته رسېدلی دی.

د اسوشېټېډپرېس خبري اژانس د راپور له مخې په دې مرګونې جګړه کې چې له تېرې شنبې راهیسې روانه ده، لسګونه نور کسان ټپیان شوي دي.

دغه شخړه د ځمکې د ملکیت پر سر د شخړې له امله پیل شوې ده.

پاکستاني چارواکو ویلي چې دوی هڅه کوي چې د افغانستان پولې ته نژدې د ځمکې شخړه په فرقه‌يي تاوتریخوالي بدله نه شي.

تر دې مخکې د روان کال په جولای میاشت کې هم په دې سیمه کې د ورته جګړې له امله د دواړو خواوو لسګونه کسان وژل شوي او ټپیان شوي وو.

کرمه سیمه په وروستیو کلونو کې د شیعه او سني اوسیدونکو ترمنځ د فرقه‌يي تاوتریخوالي شاهده ده.

متحده‌ایالتونو، فرانسې او څو نورو متحدانو یې د اسراییل او د لبنان حزب‌الله ترمنځ سملاسي د ۲۱ ورځني اوربند غوښتنه کړې ده.

رویټرز بېګا ناوخته د سپینې ماڼۍ د یوې خبرپاڼې له مخې لیکلي چې دغه لنډمهاله اوربند به دواړوو خواوو ته موقع ورکړي چې رامنځته شوې جګړه د خبرو له پای ته ورسوي.

په دې اړه یوه ګډه اعلامیه د امریکا، فرانسې، استرالیا، متحده عربي اماراتو، سعودي عربستان او اروپایي ټولنې له‌خوا لاسلیک شوې ده.

د اوربند دا غوښتنه داسې مهال شوې چې همدا پرون چهارشنبه هم پر لبنان د اسراییلو په بریدونو کې د لبنان د روغتیا وزارت په وینا ۷۲ کسان وژل شوي او ۲۲۳ نور ټپيان شوي دي.

د اسراییلي پوځيانو د تېرې دوشنبې او سه شنبې ورځې په بریدونو کې هم څه باندې پنځه نیم سوه کسان په لبنان کې وژل شوي وو.

امریکا او متحدانو یې د اسراییلو او لبنان ترڅنګ په غزه کې هم د اوربند غوښتنه کړې ده.

د اوکراین ولسمشر وایي چې داسې راپورونه یې ترلاسه کړي چې د روسیې ولسمشر ولادیمیر پوتین د اوکراین پر اټومي تاسیساتو او زیربناو د برید پر طرحه کار کوي.

ولودمیر زیلینسکي دا خبره پرون په نیویارک کې د ملګرو ملتونو عمومي اسمبلۍ ته د وینا پر مهال وکړه او زیاته یې کړه چې د اوکراین استخباراتو په وروستیو کې داسې راپورونه ترلاسه کړي چې روسیه د سپوږمکۍ له لارې د اوکراین د اټومي تاسیساتو په اړه معلومات ترلاسه کوي او تصویرونه اخلي.

د اوکراین ولسمشر همداراز وویل چې د انرژي پر تاسیساتو د هرې بې پيلوټه الوتکې، یا توغندي برید ممکن د یوه اټومي ناورین سبب شي.

زیلینسکي په ورته وخت کې د نړۍ له مشرانو وغوښتل چې د روسیې د تېري پر وړاندې د اوکراین مبارزې ته لومړیتوب ورکړي.

پاکستاني چارواکو نن چهارشنبه هغه نرسه له رسنیو سره مخامخ کړه چې د یوه ځانمرګي برید د هڅې په تور نیول شوې ده.

اسوشېټېډپرېس خبري اژانس لیکلي چې د عدیلې بلوچ په نوم دغې نرسې رسنیو ته ویلي، د تربت یوه دولتي روغتون کې یې کار کاوه چې (ترهګرو) ځان ته جذب او بیا یې ځانمرګي برید ته وګمارله.

هغې منلې چې تر یوه ځانمرګي برید مخکې د تېرې اوونۍ په پای کې د پولیسو له‌خوا ونیول شوه.

اسوشېټېډپرېس لیکلي، دوی نه پوهېږي چې دغې نرسې نن تر کومو شرایطو لاندې له رسنیو سره خبرې کړي دي.

بلوچستان له کلونو راهیسې د نارامیو شاهد دی او دغلته وخت ناوخت ځانمرګي بریدونه کېږي چې تر ډېره یې هدف د پاکستان امنیتي ځواکونه وي.

حزب‌الله نن چهارشنبې پر اسراییلو لسګونو توغندي توغولي چې په یوه کې تل‌ابیب په نښه شوی و.

له دغو بریدونو او په لبنان کې د اسراییل په بریدونو کې د په سلګونو کسانو له وژل کېدو وروسته داسې ښکاري چې په سیمه کې کړکېچ په زیاتېدو دی.

د اسراییل پوځ وویل چې له ځمکې څخه ځمکې ته یو توغندی یې چې له کبله یې په تل‌ابیب او د اسراییل په مرکزي برخه کې د خطر زنګ وهل شوی و، شنډ کړی دی.

د دغه توغندي له امله د ځاني او مالي زیانونو راپورونه نه‌دي ورکړل شوي.

حزب‌الله چې متحده‌ایالات یې د یوې ترهګرې ډلې په توګه پېژني، وویل چې د قادر ۱ بالسټیک توغندی توغولی او د اسراییل د استخباراتو د ادارې یا موساد مرکزي دفتر یې په نښه کړی دی.

حزب‌الله د اسراییل استخبارات، د خپلو لوړپوړو قومندانانو د وژلو او تېره اوونۍ په پیجرونو او مخابرو کې د چاودنو چې په نتیجه کې یې په لسګونو کسان وژل شوي او په زرګونو نور ټپي شوي، مسوول بللي دي.

په دغوچاودنو کې ډېره مرګ‌ژوبله د حزب‌الله غړیو ته اوښتې ده.

د لبنان پر جنوب د اسراییل د د دوشنبې او سې شنبې د ورځې د هوایي بریدونو په نتیجه کې لږترلږه ۵۶۰ کسان وژل شوي او په زرګونو کسان یې هم اړ کړي چې له خپلو کورونو نورو سیمو ته کډه شي.

د غزې د روغتیا وزارت چې د حماس تر واک لاندې دی، وایي چې د اسراییل د بریدونو له پيله تراوسه ۴۱۴۹۵ فلسطینیان وژل شوي دي.

اسراییلي پوځیان او حماس وسله‌وال چې اروپایي ټولنه او متحده ایالتونه یې ترهګر بولي، له تېر نږدې یوه کال راهیسې په غزه کې په جګړه بوخت دي چې ډېر زیان یې ملکیانو ته رسېدلی دی.

رویټرز خبري اژانس نن چهارشنبه د غزې د روغتیا وزارت په حواله ویلي چې دغې جګړه کې د ټپي شویو فلسطینیانو شمېر له ۹۶زرو څخه اوښتی دی.

د اسراییل او حماس د جګړې پای ته رسېدو او اوربند ته هڅې لا هم روانې دي، خو تراوسه د جګړې په کچه کې کوم کموالی نه لیدل کېږي.

دغه جګړه وروسته تر هغه ونښته چې حماس پر اسراییلو غلچکي برید سره ۱۲ سوه کسان ووژل او شاوخوا ۲۵۰ نور یې برمته کړل.

ټاکل شوې د اوکراین ولسمشر ولودمیر زیلنسکي د امریکا ولسمشر جو بایډن ته له روسیې سره په جګړې کې (د بریا پلان) تر سپارلو مخکې نن د ملګرو ملتونو عمومي اسامبلې ته وینا وکړي.

دا په داسې حال کې ده چې د اوکراین پر ښارونو د روسیې بېباکانه بریدونه دوام لري او پر اوکراین د روسیې جګړه په ارامه، خو دوامداره توګه د اوکراین ختیځ ته د غځېدو په حال کې ده.

زیلنسکي پرون د ملګرو ملتونو امنیت شورا ته وویل چې د سولې لپاره یوازېنۍ لاره پر روسیې فشار راوړل دي او نوموړي له روسیې سره د ایران او شمالي کوریا پوځي مرستې وغندلې.

زیلنسکي پخوا ویلي وو چې د سولې یوه طرحه یې جوړه کړې چې د امریکا له ولسمشر جوبایډن او دغه راز ولسمشرۍ ټاکنو ته له ولاړو نوماندانو ډونالډ ټرمپ او کمالا هاریس سره یې شریکوي.

تراوسه د دغې طرحې یا پلان ډېر جزیات نه دي رسنیز شوي.

د اسراییل پوځ وایي، د لومړي ځل لپاره د لبنان د حزب الله ډلې یو توغندی تل ابیب ته رسیدلی دی.

فرانس پرېس نن چهارشنبه د اسراییل د پوځ د یوه ویاند په حواله چې نوم یې نه دی یاد شوی لیکلي، دغه توغندی د تل‌ابیب فضا ته له رسېدو سره سم د هوایي دفاع سیستم په وسیله شنډ شو.

بل لورته د اسراییلو د پوځ یوه ویاند ناداو شوشاني خبریالانو ته ویلي، تل‌ابیب ته د حزب‌الله د توغندي رسېدل، د دغې وسله‌والې ډلې له‌خوا د بریدونو د شدت څرګندونه کوي.

رویټرز خبري اژانس لیکلي، حزب‌الله هم پر تل‌ابیب د توغندي توغول تایید کړي دي.

بل لورته اسراییلي الوتکو تېره شپه هم په لبنان کې د حزب‌الله سنګرونه په نښه کړي دي.

د اسراییل د تېرو دوو ورځو په حملو کې د لبناني چارواکو په وینا، له ۵۶۰ ډېر کسان وژل شوي او د جنوبي سیمو زرګونه اوسېدونکي د خپلو مېنو پرېښودو ته اړ شوي دي.

د امریکا استخباراتي چارواکو د ولسمشرۍ په انتخاباتو کې د جمهوریپال ګوند کاندید ډونالډ ټرمپ ته د ایران له لوري د هغه د وژنې لپاره د احتمالي خطرونو اړوند معلومات ورکړل.

دا خبره د ټرمپ انتخاباتي کمپاین پرون په یوه بیان کې اعلان کړه.

د بیان له مخې استخباراتي مامورینو ته معلومه شوې چې په تېرو څو میاشتو کې د ایران له‌خوا پېښ ګواښونه زیات شوي او د حکومت چارواکي د ټرمپ د خوندي ساتلو او د ولسمشرۍ پر انتخاباتو د دې ګواښونو د اغېز د له منځه وړلو لپاره کار کوي.

په نیویارک کې د ایران دایمي استازولۍ په دې اړه پوښتنې ځواب نه کړې، خو تهران مخکې له دې د امریکا په کورنیو چارو کې د لاسوهنو اړوندې ادعاوې رد کړې دي.