روسیې نن سهار وختي د اوکراین پر پلازمېنه د توغندي او ډرون الوتکو برید کړی دی.

په کییف کې د پوځي ادارې مسوول سرهي پوپکو په ټیلګرام کې لیکلي دي چې د کییف په هولو سیفیسکي سیمه کې د روسیې د اسکندر توغندي او ډرون الوتکو د برید له امله په یوې ودانۍ کې چې خلک پکې نه اوسېدل، اورلګیدلی دی.

پوپکو زیاته کړه چې دا حمله تلفات نه لري او ټولې بې پیلوټه الوتکې هوایي ځواکونو نسکورې کړې دي.

د نیویارک یوې محکمې د امریکا پخوانی ولسمشر ډونالډ ټرمپ د بربنډو فلمونو یوې لوبغاړې ته د حق السکوت د ورکړې په قضیه کې په ۳۴ موردو تورن او مجرم وګاڼه.

د نیویارک د منهنتن د محکمې ۱۲ غړیو له دوو ورځو سلا مشورو وروسته بېګا د ټرمپ په اړه خپله پرېکړه اورولې او هغه یې ګناهګاره بللی.

ټرمپ هم په محکمه کې حضور درلود. هغه وروسته خبریالانو ته وویل چې د محکمې دا پرېکړه د شرم وړ وه. ټرمپ وویل چې اصلي پرېکړه د نومبر په ۵مه د خلکو له خوا کېږي. د هغه اشاره د امریکا د ولسمشرۍ ټاکنو ته وه.

د امریکا ولسمشر تورن دی چې د ۲۰۱۶ کال له ټاکنو څه موده مخکې یې د بربنډو فلمونو لوبغاړې ستورمي دنیلز ته ۱۳۰زره ډالره ورکړي څو له ده سره جنسي اړیکه افشا نه کړي او غلې پاتې شي.

د راپورونو له مخې، د امریکا ولسمشر جوبایدن خپلې ادارې ته امر کړی چې ډاډ حاصله کړي اوکرایین کولای شي په خارکیف کې د روسیې پر ضد له ځینو امریکايي وسلو کار اخیستلی شي.

دا خبره پولتیکو مجلې راپور کړې او دا یې د امریکا د ولسمشر جوبایډن د ادارې د سیاست یو بدلون بللی.

خو پولتیکو په عین حال کې د یوه امریکايي چارواکو له قوله ویلي چې د روسیې په خاوره د لرې واټن بریدونو په اړه تګلاره په خپل ځای ده.

اوکرایین اجازه نه لري چې له امریکايي یا د ناټو له وسلو له خپلې خاورې د روسیې په خاوره کې هدفونه په نښه کړي او یواځې یې د خپلې خاورې دفاع لپاره د اوکرایین دننه دا وسلې کارولي.

د امریکا ولسمشر داسې وخت روسي پوځیانو ته د اوکرایین له خوا د ضربې وهلو په اړه دا مهمه پرېکړه کړې چې د ناټو د بهرنیو چارو وزیران په پراګ کې سره غونډ شوي.

د ناټو سرمنشي ینس ستولتنبرګ ویلي د ناټو متحدین باید پر اوکرایین د ناټو د وسلو د نه کارولو بندیز لرې کړي.

د سوریې ولسمشر بشار اسد چې د ایران د ولسمشر او بهرنیو چارو وزیر له مړینې یوولس ورځې وروسته پرون تهران ته لاړ، هغوی دواړه په سوریه کې د علي خامنه يي د پلانونو اصلي اجرا کوونکي وبلل.

د ایران د ایسنا خبري اژانس د راپور له مخې، بشار اسد د ایران له لوی مشر علي خامنه يي سره په کتنه کې له هغه سره د ابراهیم رييسي او امیرعبداللهیان په مړینه غمرازي وکړه، ویې ویل، د ایران او سوریې اړیکې ستراتیژیکې دي چې د خامنه يي په لارښوونه وړاندې درومي او ريیسي او عبداللهیان یې د تطبیق په سر کې وو.

د ایراني رسنیو پر اساس، خامنه يي په ځواب کې وویل چې اوس ښاغلی مخبر، چې د ولسمشر بشپړ واک لري، هماغه لارې ته دوام ورکوي او هیله لري چې چارې تر ټولو په ښه ډول مخ ته لاړې شي.

د سلوانیا حکومت نن د هغې پرېکړې د تصویب اعلان وکړ چې له مخې یې د فلسطین خپلواک دولت په رسمیت پېژندل کېږي.

د هغه هېواد صدراعظم روبرت ګلوب نن دغه اعلان وکړ، تر دې مخکې هسپانیا، ایرلنډ او ناروې هم د فلسطین د خپلواک دولت د رسمیت پېژندلو پرېکړې اعلان کړې وې.

د سلوانیا صدراعظم روبرت ګلوب نن په یوه کنفرانس کې وویل، د دوی حکومت فلسطین د خپلوک او ملي حاکمیت لرونکي دولت په توګه په رسمیت پېژني.

سلوانیا چې د اروپايي ټولنې غړی هېواد دی، باید د دې ټولنې له خوا هم د خپل حکومت د پرېکړې تصویب واخلي.

د اسراییل د بهرنیو چارو وزیر د سلوانیا حکومت دا پرېکړه غندلې ده.

دا پر اسراییل د روان او همغږي فشار برخه ده چې هدف یې د غزې د شخړې پای ته ورسول دي.

د ایران قضایه قوې د ایران د مخکښې سیاسي مخالفې فاطمې سپهري او د هغې د دوو ورونو پر خلاف تازه تورونه لګولي دي.

دوی د ایران د اوسنیو او پخوانیو رهبرانو د "سپکاوي" په تور په بند کې دي.

د تازه تورونو په باب نور توضیحات نه دي ورکړل شوي.

د فاطمې ورور اصغر سپهري پر ټولنیزو شبکو د دغو تورونو په باب څرګندونې کړي او ویلي یې دي، د مشهد یوه تحقیقاتي قاضي د هغه د خور او دوو وروڼو په دوسیه کې نور تورونه ورزیات کړي دي.

اصغر سپهري وايي، خور یې فاطمه سپهري له ۲۰ میاشتو راهیسې په زندان کې ده او ټلیفون یې په شدت کنټرولېږي.

ده په وینا، دوه نور ورونه یې محمد حسین سپهري او حسین سهپري د تېر لمریز کال له تلې یا میزان میاشتې په توقیف کې دي.

فاطمه سپهري د ایران د حکومت او د ایران د رهبر ایت الله علي خامنه اي له مخالفانو ده.

د پاکستان پوځ وایي، د ترهګرۍ هغو پېښو ته جدي اندېښنه لري چې په وینا یې د افغانستان په خاوره کې پلان کېږي.

د پاکستان د پوځ د عامه اړیکو له دفتره نن پنجشنبې په یوه خپره شوې خبرپاڼه کې ویل شوي چې په هغې غونډه کې چې پرون چهارشنبې په راولپنډۍ کې د پوځ د مشر جنرال سید عاصم منیر په مشرۍ جوړه شوې وه، وویل شول چې د پاکستان وسله‌وال مخالفين په هېواد کې د امنیتي ځواکونو او بې ګناه ملکي وګړو د په نښه کولو لپاره د افغانستان خاوره استعمالوي.

د پاکستان د پوځ د دغې ادعا په اړه د طالبانوحکومت تراوسه غبرګون نه‌دی ښودلی، خو له دې مخکې یې په کراتو کراتو دا ډول ادعاوې رد کړي او ویلي یې دي چې هیچاته به اجازه ورنه‌کړي چې د افغانستان له خاورې پر نورو د بریدونو لپاره کار واخلي.

وروسته له هغې چې د اسراییل پوځ له مصر سره پر پوله د غزې د یوه ستراتیژیک کوریډور د نیولو خبر ورکړ، د غزې تړانګې د جنوبي ښار رفح اوسېدونکو نن وویل چې تېره شپه په سیمه کې د سختو بریدونو شاهدان وو.

د فرانس‌پرېس خبري آژآنس د راپور له مخې د اسراییل د پوځ ویاند ډانیل هګاري وویل چې اسراییل هغه تنګه سرحدي سیمه تر کنټرول لاندې راوستې چې شاوخوا شل تونلونه په‌کې موندل شوي دي.

په غزه کې عیني شاهدانو د رفح په مرکزي او لوېدیځو سیمو کې د نښتو راپورونه ورکړي دي.

دوی ویلي چې اسراییلي ځواکونو د ښار په ختیځه برخه کې چې اسراییلي ځواکونو د مې په اوومه پرې یرغل پیل کړی و، یو شمېر ودانۍ ویجاړې کړې دي.

په دغو نښتو کې د مرګ‌ژوبلو په اړه تراوسه راپورونه نه‌دي ورکړل شوي.

د راپورونو له مخې د اسراییلو له‌خوا د فیلادیلفي په نوم د دغه کوریډور نیول ښایي د اسراییل او مصر اړیکې هم پیچلې کړي، ځکه مصر له مخکې نیوکه کړې چې اسراییل یې د پولې پر لوري پرمختګ کړی دی.

د اوکراین د هوایي مدافعې ځواکونه وایي چې نن یې د روسیې څو ډرون الوتکې او میزاییل له منځه یووړل چې د اوکراین په څو سیمو کې یې پوځي او ملکي تاسیسات د بریدونو لپاره په نښه کړي وو.

دغو ځواکونو نن پر ټیلګرام په یوه بیان کې ویلي چې ۳۲ ډرونونه او ۱۹ توغندي یې د خمیلنڅکي، دنیپرو پتروسک، چیرکاسي، کیروهراد، زاپوریژیا، ادیسه، خیرسون، کییف او وینیڅیا د سیمو د پاسه راغورځولي دي.

په عین حال کې د خارکییف ښاروال ایهور تیریکوف وویل چې تېره شپه د دې ښار په شمال ختیځ کې چې د روسیې له پولې یوازې ۳۵ کیلومتره واټن لري، د روسیې په توپچي بریدونو کې د ګازو د نللیکې په شمول مهم تاسیسات زیانمن شوي دي.

د روسیې په دغو بریدونو کې د احتمالي ځاني تلفاتو په اړه څه نه‌دي ويل شوي، خو اوکرایني چارواکو پرون د روسیې په بریدونو کې د لږترلږه پنځو ملکي وګړو د وژل کېدو او شپږو نورو د ټپي کېدو خبرورکړی و.

د ایران سرحدي ځواکونو په بلوچستان کې پر هغه موټر ډزې کړي چې پاکستاني اتباع په کې سپاره وو.

اسوشېټېډپرېس خبري اژانس نن پنجشنبه د پاکستاني چارواکو په حواله دغه راپور ورکړی او ویلې یې دي چې د ډزو په پرونۍ پېښه کې ۴ پاکستانیان وژل شوي او دوه نور ټپیان شوي دي.

په بلوچستان کې یوه حکومتي مسوول صاحبزاده اسفند ویلي، دوی ته دا معلومات نه‌شته چې ایراني پوله‌ساتو ولې پر پاکستاني اتباعو ډزې کړي.

د ایران دولتي سرچینو هم تراوسه په دې اړه څه نه دي ویلي، خو مخکې د ایران او پاکستان پوله ساتو ځواکونو سرحدي سیمه کې د قاچاق کوونکو او سخت دریځو ډلو د نیولو خبرونه ورکړي دي.

ایران تېره جنوري میاشته کې پرپاکستان هوایي برید هم کړی و چې پاکستان یې غچ واخیست او دواړو لورو د یوه او بل په خاوره کې د سخت دریځو ډلو د مرکزونو د په نښه کولو ادعا وکړه.