په دُبۍ کې دېره د اماراتو هوايي شرکت پرون پنج‌شنبه وویل، چې عراق، ایران او اردن ته یې د درېیو ورځو لپاره د "سیمه‌‌ییزې ناکرارۍ" له کبله خپلې الوتنې لغوه کړې.

دا اقدام وروسته له هغې کېږي، چې ایران تېره سه‌شنبه پر اسرايیل د میزاییلو برید وکړ او دې موضوع په سیمه کې د پراخې جګړې په باب اندېښنې ولاړې کړې.

د فرانسې خبري اژانس د خبر له‌مخې د اماراتو هوايي شرکت ویلي، د عراق بصرې او بغداد، د ایران پلازمېنې تهران او د اردن پلازمېنې عمان ته یې د نن، سبا او بل سبا لپاره خپلې الوتنې لغوه کړې.

د منځني ختیځ دغه ستر هوايي شرکت د اکتوبر تر اتمې د دوبۍ او بیروت ترمنځ هم د الوتنو د لغوه کېدو اعلان کړی و، ځینو نورو هوايي شرکتونو هم سیمې ته خپل خدمات تعلیق کړي دي.

د سه‌شنبې په ورځ د جرمني لُفټانزا هوايي شرکت هم وویل، چې بیروت ته خپلې الوتنې د نومبر تر ۳۰مې او تل‌ابیب ته خپلې الوتنې د اکتوبر تر ۳۱مې ځنډوی، تهران ته هم د دغه شرکت الوتنې د اکتوبر تر ۱۴مې ځنډول شوي دي.

ایران، پر اسرايیل د خپلې حملې په اړه د نړۍ د اووه لویو صنعتي هېوادونو یا (G-7) ډلې غندنه "مغرضانه او غیرمسوولانه" وبلله.

د ایران د بهرنیو چارو وزارت نوي ټاکل شوي ویاند اسماعیل بقايي پرون پنج‌شنبه په یوه اعلامیه کې دا خبره کړې ده.

ایران تېره سه‌شنبه د هغه څه له کبله پر اسرايیل تر ۱۸۰ زیات میزاییل وتوغول چې د اسرايیل له خوا د افراطي ډلو حماس او حزب‌الله د مشرانو وژنه او په غزه کې او لبنان کې روانه جګړه بلل شوې ده.

د امریکا متحده‌ایالتونه او اروپايي ټولنه حماس یو تروریستي سازمان ګڼي او امریکا حزب‌الله ډله هم د تروریستي سازمانونو په فهرست کې شامله کړې ده.

تېره اوونۍ (د سپټمبر پر ۲۷مه) د لبنان په پلازمېنه بیروت کې د اسرايیل په حمله کې د لبنان د حزب‌الله ډلې د مشر حسن نصر‌الله تر څنګ د ایران د سپاه پاسداران مرستیال قوماندان عباس نیلفروش هم ووژل شو.

د نړۍ د اوو لویو صنعتي هېوادونو مشرانو تېره چهارشنبه پر اسرايیل د ایران د میزاییلو حمله وغندله او په منځني ختیځ کې یې د روان بحران په باب سخته اندېښنه وښوده.

په G-7 ډله کې د امریکا متحده‌ایالتونه، کاناډا، جرمني، فرانسه، ایټالیا، بریتانیا او جاپان شامل دي.

په‌داسې حال کې چې د ناټو نوی سرمنشي مارک روته Mark Rutte د دندې له پیلېدو دوه ورځې وروسته په یوه نااعلان شوی سفر د اوکراین پلازمېنې کییف ته تللی، اوکراین او رومانیا نن پنج‌شنبې اعلان وکړ، چې د پاټرویټ توغندیو دفاعي سیسټم چې د ناټوغړې رومانیا له اوکراین سره مرسته کړې، کییف ته رسېدلی.

ښاغلي روته نن د ورځې په وروستیو کې داسې مهال د اوکراین له ولسمشر ولودمیرزیلینسکي سره وکتل چې، نن سهار وختي پلازمېنه کییف او د اوکراین نور ښارونه د روسیې په توغندویزو او د بې‌پیلوټه الوتکو په پراخو بریدونو کې په نښه شوي و.

په کییف کې دوه ځلې د بریدونو د خطر زنګونه ووهل شول.

زیلینسکي پر خپله ایکس‌‌پاڼه یا پخواني ټویټر ولیکل، دی له ټولو هېوادونو چې د هېواد له هوایي مدافعې سره یې مرسته کوي، مننه کوي.

هغه په ځانګړې توګه له رومانیا مننه وکړه چې پاټرویټ سیسټم یې ورکړی دی.

د اوکراین ولسمشر زیاته کړه، دوی په ګډه کولای شي چې د روسیې په وړاندې چې هغه د دې هېواد ترور وباله اغېزمنې نتیجې ترلاسه کړي.

د ناټو سرمنشي مارک روته له زیلنسکي سره تر کتنې وروسته ژمنه وکړه چې، له اوکراین سره به چې د روسیې د بشپړ یرغل په وړاندې دفاع کوي، د لوېدیځ د ملاتړ د دوام لپاره هڅې وکړي.

د کرکټ نړیوالې شورا له لوري د ښځو ترمنځ شل اوریز نړیوال جام نن پنجشنبه د اکټوبر په درېیمه نېټه پيل شو.

دغه سیالۍ چې د عربي متحده اماراتو په ابوظبۍ، دوبۍ او شارجه ښارونو کې ترسره کېږي، ۱۰ لوبډلې په کې ګډون لري چې په دوه ګروپونو سره وېشل شوي دي.

د پیل سیالي د بنګله‌دېش او سکاټلنډ د لوبډلو ترمنځ ده چې د کابل پر وخت ماسپښین ۲:۳۰ بجې پیل شوې ده.

د لوبې پچه بنګله‌دېش ګټلې ده او توپوهنه یې غوره کړې ده.

دغه راز په دې ورځ دوهمه سیالي د پاکستان او سریلانکا ترمنځ ده چې ماښام پيلېږي.

د یاد نړیوال جام په اېA ګروپ کې اسټرالیا، هندوستان، نیوزیلنډ، پاکستان او سریلانکا یوځای دي، په بيB ګروپ کې بیا بنګله‌دېش، انګلستان، سکاټلنډ، سویلي افریقا او ویسټ اینډیز لوبډلې یوځای شوي دي.

د ویلو ده چې په دې نړیوال جام کې ټولټال ۲۳ سیالۍ ترسره کېږي او پایلوبه به یې د اکټوبر په ۲۰مه نېټه د دوبۍ په نړیوال کرکټ لوبغالي کې وي.

د اوکراین د پلازمېنې کییف د پوځي چارو د ادارې مشر سرهې پوپکو وایي، د دې هېواد د هوایي مدافعې ځواکونو نن پنجشنبې سهار وختي د روسیې شاوخوا ۱۵ بې پیلوټه الوتکې د دې ښار پر سر راغورځولي دي.

پوپکو پر ټیلیګرام چینل لیکلي چې د دغه برید په ترڅ کې چې پنځه ساعته یې دوام وکړ، د ایستل شویو بې پیلوټه الوتکو ټوټې د پلازمېنې دسنیانسکي پر سیمې راپریوتي، خو ځاني او مالي زیانونه یې نه‌دي اړولي.

د اوکراین هوایي ځواکونو همدارنګه ویلي چې د روسیې یو شمېر بې پیلوټه الوتکې، په چرنیهیف، پولتاوا، چرکاسي، سومي او وینیټسیا کې هم راغورځول شوي دي.

په عین حال کې د روسیې دفاع وزارت ویلي چې په تېرو ۲۴ ساعتونو کې یې د اوکراین ۱۱۳ بې پیلوټه الوتکې د بلګورود، ورونژ، کورسک او بریانسک سیمو کې راغورځولي دي.

د دې وزارت په خبره، د دغو الوتکو ډېری یعنې ۷۳ یې د بلګورود پرسر راغورځول شوي دي.

د لبنان په پلازمېنه بیروت کې د اسراییل یوې هوایي حملې لږ تر لږه شپږ تنه وژلي دي.

د لبنان روغتیا وزارت ویلي، دغه برید تېره شپه پر یوه هستوګنیزه ودانۍ شوی دی.

دغه برید داسې مهال شوی چې بېلابېلو هېوادونو له خپلو اتباعو غوښتي چې له لبنان څخه ووځي.

په بیروت کې دغه هوایي برید وروسته تر هغه شوی چې اسراییل وویل، اته سرتیري یې د لبنان په جنوب کې، چيرته چې دوی د حزب‌الله په ضد ځمکنۍ جګړه پيل کړې، وژل شوي دي.

امریکا د حزب‌الله ډله چې د ایران له ملاتړه برخمنه ده، د ترهګرو په توګه پیژني او اروپایي ټولنې یې یوازې پوځي څانګه په تور لېست کې شامله کړې.

د حزب‌الله سیاسي ډله د لبنان په پارلمان کې څوکۍ هم لري.

د ملګرو ملتونو امنیت شورا پرون د منځني ختیځ پر شخړو د بحث لپاره بېړنۍ غونډه جوړه کړې وه.

د حماس ډلې پوځي څانګې په تل‌ابیب کې د ډزو او چاقو برید پرمهال د اتو اسراییلیانو د وژلو مسوولیت ومانه.

دا حملې پرون د یافا په سیمه کې د برښنایي رېل له تمځي سره وشوې.

حماس چې امریکا او اروپایي ټولنه یې د ترهګرې ډلې په توګه پېژني، پرون یې په یوه بیان کې وویل چې د عزالدین القسام وسله‌والو د لوېدیځې غاړې له الخلیل اشغال شوي ښاره دا برید تنظیم کړی و.

دا برید څو ساعته وروسته تر دې وشو چې ایران د اسراییل په لور په لسګونو توغندي وویشتل.

د اسراییل پولیس وایي چې د تل‌ابیب په یافا سیمه کې دوه بریدګر د یوه وسله‌وال ملکي او امنیتي ساتونکو له لوري وژل شوې دي.

د حزب‌الله د مخکېنی مشر حسن نصرالله زوم حسن جعفر قصیر په سوریه کې د اسراییل په یوه برید کې وژل شوی دی.

امریکا د حزب‌الله ډله چې د ایران له ملاتړه برخمنه ده، د ترهګرو په توګه پېژني او اروپایي ټولنې یې یوازې پوځي څانګه په تور لېست کې شامله کړې ده.

د حزب‌الله سیاسي ډله د لبنان په پارلمان کې څوکۍ هم لري.

د جرمني ډي‌پي‌اې خبري اژانس د سوریې د بشري حقونو د څار یوې لندن مېشتې ډلې پر بنسټ راپور ورکړی چې قصیر د هغو درېیو کسانو په ډله کې و چې دمشق کې پر یوې هستوګنیزې ودانۍ د اسراییل په هوایي برید کې ووژل شول.

سرچینو دغه بنسټ ته ویلي چې دا برید پرون ناوخته د دمشق ښار په المزه سیمه کې شوی دی.

ویل شوي چې تر برید لاندې راغلې دغه ودانۍ د حزب‌الله ډلې اړوند وه.

اسراییلو په دې وروستیو کې د حزب‌الله پر وړاندې خپل بریدونه ډېر کړي او د لبنان په جنوبي برخه کې یې د هغوی پر اهدافو ځمکني عملیات هم پيل کړي دي.

د فوټسال نړیوال جام په لومړۍ نېمه پایلوبه کې د برازیل لوبډلې ۳ـ۲ اکراین ته ماتې ورکړه او پایلوبې ته یې لار پيدا کړه.

دغه سیالي چې نن چهارشنبه د اکټوبر په ۲یمه نېټه د ازبکستان هېواد په کوربه‌توب ترسره شوه، د لوبې تر پایه برازیل درې او اکراین دوه ګولونه ووهل.

دوهمه نېمه پایلوبه به د پنجشنبې په ورځ د ارجنټاین او فرانسې هېوادونو ترمنځ ترسره شي.

ټاکل شوې چې د فوټسال نړیوال جام پایلوبه د اکټوبر په ۶مه نېټه ترسره شي.

د ویلو ده چې د افغانستان د فوټسال ملي لوبډلې هم په لومړي ځل په نړیوال جام کې ولوبېده او د شپاړلس غوره لوبډلو په پړاو کې یې ماتې وخوړه.

د ایران ولسمشر مسعود پزشکیان نن چهارشنبه د تلې ۱۱مه ویلي، که اسراییل له خپلو اقداماتو لاس وانه‌خلي، د ایران له جدي ګواښ سره به مخامخ شي.

د ایراني رسنیو د راپورونو پر بنسټ، پزشکیان دا خبرې خبریالانو ته، قطر ته د هغه د پلان شوي سفر وړاندې کړي دي.

ایران تېره شپه پر اسراییلو ۲۰۰ توغندي وتوغول، خو د اسراییلو پوځ ویلي، د ایران له لوري توغول شوي ۱۸۰ توغندي يې شنډ کړي دي.

د اسراییلو د پوځ په خبره، د دې توغندیو د توغولو په پایله کې دوه ملکیان ټپیان شوي دي.

د ایران توغندیزو بریدونو د بېلابېلو هېوادونو غبرګونونه هم راپارولي دي.

فرانسې نن وویل، د ایراني توغندیو پر وړاندې د اسراییلو په دفاع کې ښکېله ده.

جرمني پر اسراییلو د ایران توغندیز بریدونه غندلي او خبرداری یې ورکړی چې دا بریدونه به په منځني ختیځ کې د شخړو لمن لا پسې پراخه کړي.