د کرکټ درې اړخیزو سیالیو په دوام کې ټاکل شوې ده چې د افغانستان او متحده عربي اماراتو تر ۱۹ کلنو کم عمر لرونکې لوبډلې سبا دوشنبې مخامخ شي.

افغانستان خپله لومړۍ مسابقه له پاکستان څخه د سلو منډو په توپیر ګتلې او پاکستان بیا متحده عربي اماراتو ته په لسو ویکټونو ماته ورکړې ده.

د افغانستان، متحده عربي اماراتو او پاکستان په دې سیالیو کې هره لوبډله باید دوه-دوه ځلې له یو بل سره مخامخ شي.

د افغانستان او پاکستان تر ۱۹ کلنو د کم عمره لوبډلې دوهمه سیالي به د چهارشنبې په ورځ د نومبر ۲۰ مه وي.

دا سیالۍ د متحده عربي اماراتو په کوربه توب ترسره کېږي.

یوه زلزله چې شدت یې د ریښتر په کچه ۴ اعشاریه ۴ درجې و، نن د افغانستان شمال ختیځې سیمې ولړزولې.

د ډیسکوري والکېنو په نوم زلزله سنجونې ادارې پر خپله ویبپاڼه لیکلي چې دا زلزله نن سهار وختي په ۴ بجې او ۱۹ دقیقې وشوه او مرکز یې د فیض‌اباد د ختیځ په ۶۲ کیلومترۍ کې تر مځکې څه کم ۹۸ کیلومتره لاندې و.

د دې زلزلې له کبله د سرومال داحتمالي تاوانونو په اړه تراوسه کوم راپور نه دی ورکړل شوی.

د طالبانو یوه مخالفه ډله، د افغانستان د ملي مقاومت جبهه ادعا کوي چې په کندز کې د یوه برید په نتیجه کې د طالبانو د استخباراتو درې غړي وژل شوي او دوه نور ټپیان شوي دي.

دې جبهې تېره شپه په یوه بیان کې ویلي چې د دوی ځواکونو تېر ماښام د کندز ښار په واټ کې د طالبانو د استخباراتو د عمومي مدیریت پر ضد هدفي عملیات وکړل.

طالبانو تر اوسه د افغانستان د ملي مقاومت جبهې د دې ادعا په اړه څه نه دي ویلي.

د آزادې اروپا راډیو/ ازادۍ راډیو نه شي کولی په خپلواکه توګه دا ادعا تایید کړي.

د افغانستان د ساحلي فوټبال غوره لیګ سیالیو له پیل سره پرون شنبه په کابل کې دوې لوبې وشوې.

د افغانستان د فوټبال فدراسیون پرون پر خپله فېسبوک پاڼه لیکلي چې په لومړۍ لوبه کې د امید افغان لوبډلې د افغان کلب لوبډلې ته ۶-۳ ماتې ورکړه.

په بله لوبه کې اتفاق لوبډلې ولیعصر ټیم ته ۵-۴ ماتې ورکړه.

د افغانستان د ساحلي فوټبال غوره لیګ سیالۍ د دوو اوونیو لپاره د افغانستان د فوټبال فدراسیون د ساحلي فوټبال په لوبغالي کې د اتو لوبډلو په ګډون دوام کوي.

د ایران د بشري حقونو غیردولتي سازمان وايي، د یوه افغان په ګډون په ټوله کې ۱۰ کسان د ایران د کرج ښار په قزل حصار زندان کې اعدام شوي دي.

په ناروې کې دېره دغه سازمان پرون شنبه په یوه اعلامیه کې ویلي چې په اعدام شویو کې دوه کردان او یوه ښځه هم شامله ده.

دغه کسان د مخدره موادو د کار و بار او عمدي قتل په څېر تورونو له کبله اعدام شوي دي.

د اعدام شوي افغان وګړي نوم خالد تاجیک یاد شوی دی.

د ایران د بشري حقونو سازمان وايي دغه اعدامونه د چهارشنبې په ورځ شوي دي.

د دغه سازمان په وینا د احمد علیزاده په نوم یو بل کس هم چې مخکې د دار تر تختې بېول شوی و او بیا یې اعدام ځنډول شوی و، پرون اعدام شو چې له دې سره پرون په قزل حصار زندان کې د اعدام شویو کسانو شمېر لسو ته ورسېد.

د پاکستان په کراچۍ ښار کې د افغانستان قونسلګرۍ چې د طالبانو په کنټرول کې ده، د سند ایالت له زندانونو د ۱۱ افغان وګړو د خوشې کېدو خبر ورکړ.

په کراچۍ کې د طالبانو جنرال قونسل عبدالجبار تخاري د شنبې په ورځ په یوه ویډیويي پیغام کې وویل چې د یوې ښځې او اوو ماشومانو په ګډون دغه ۱۱ افغانان خوشې او د چمن-سپین بولدک له لارې افغانستان ته لېږدول شوي دي.

دا نه دي ویل شوي چې دغه افغانان ولې او کله نیول شوي وو.

د سند امنیتي چارواکو د تېر لمریز کال په تلې میاشت کې ویلي وو چې شاوخوا ۱۸۰۰ بې اسناده افغانان یې نیولي دي.

تخاري وویل، تر دې مخکې د سند ایالت له زندانونو څخه د ښځو او ماشومانو په ګډون ۴۲۵۸ افغانان خوشې شوي او افغانستان ته لېږدول شوي او دا مهال هم د دغه ایالت په زندانونو کې شاوخوا ۳۵ افغانان بندیان دي.

د کاناډا صدراعظم جستین ترودو پرون شنبه ویلي، اوتاوا په افغانستان کې د کاناډا د ځانګړو ځواکونو د یوه پخواني غړي د نیولو موضوع ډېره جدي ګڼي.

کاناډايي رسنیو راپور ورکړی چې متقاعد ډېوېډ لاوري تېره دوشنبه کابل ته له رسېدو سره سم د طالبانو له‌خوا نیول شوی دی.

د کاناډا سي‌ټي‌وي CTV ټلوېزیوني شبکې د جمعې په ورځ د څو سرچینو په حواله دغه راپور ورکړ، خو طالبانو تر اوسه په دې اړه څه نه دي ویلي.

وړاندې راغلي، تر اوسه معلومه نه ده چې دغه کاناډايي وګړی چېرته ساتل کېږي.

د راپورونو له مخې، لاوري د ۲۰۲۱م کال په اګست میاشت کې د طالبانو لاس ته د کابل د سقوط پر مهال له ۱۰۰ کسانو سره له افغانستانه په وتلو کې همکاري کړې وه.

هغه پخوا په افغانستان کې د یوې خصوصي امنیتي کمپنۍ خاوند و.

د سي‌ټي‌وي د راپور له مخې، د کاناډا د نړیوالو چارو ادارې په یوه برښنالیک کې تایید کړې چې په افغانستان کې د یوه کاناډایي وګړي په باب خبره ده او کاناډايي چارواکي له نږدې د وضعیت څار ته دوام ورکوي.

د افغانستان د ۱۹ کلنو ځوانانو کرکټ ملي لوبډله د درې اړخیزو سیالیو په لړ کې سبا دوشنبه د کوربه امارتو پر وړاندې د لوبې میدان ته ښکته کېږي.

دا سیالۍ د افغانستان په وخت د سهار لس بجې دوبۍ په کرکټ لوبغالي کې پیلېږي.

افغانستان تېره ورځ د همدې سیالیو په لړ کې پاکستان ته د سلو منډو په توپیر لویه ماتي ورکړې وه.

د دې درې اړخیزو سیالیو په لړ کې هره لوبډله یو له بل سره دوه دوه سیالۍ کوي او د نومرو د جدول دوه مخکښې لوبډلې به د نومبر په ۲۶مه پایلوبه ترسره کوي.

د ویلو ده چې تر دې سیاليو وروسته به د افغانستان د ۱۹ کلنو ځوانانو لوبډله په اسیا کپ سیالیو کې هم ګډون وکړي چې د نومبر په ۲۹مه نېټه په عربي متحده اماراتو کې پیلېږي.

د افغانستان فوټبال ملي لوبډلې له نیپال څخه دوه د صفر پر وړاندې ماتې وخوړه.

دا لوبه پرون د نومبر۱۶مه د تاجکستان په پلازمېنه دوشنبې کې د درې اړخیزه دوستانه ټورنمنټ په لړ کې ترسره شوه.

د افغانستان راتلونکې لوبه له کوربه تاجکستان سره ده.

دا لوبه به سبا دوشنبې د افغانستان په وخت پنځه نیمې بجې د دوشنبې په مرکزي لوبغالي کې ترسره شي.

د طالبانو امنیتي سرتېرو دوه کسان د یو خرس د ښکار په تور نیولي دي.

د بدخشان د چاپېریال ساتنې د ادارې رییس فیض‌الرحمن ابراهیمي پرون د نومبر۱۶مه رسنیو ته ویلي، دا دوه تنه يې په "شکي" ولسوالۍ کې د هغه قهويي خرس د ښکار په تور نیولي، چې څو ورځې وړاندې ښکار شوی و.

بل پلو په نیمروز ولایت کې د طالبان د چاپېریال ساتنې ادارې پرون ویلي، ایران ته يې د ۳۵ نادرو مرغانو د قاچاق مخه نیولې ده.

که څه هم طالب چارواکي د چاپېریال ساتنې او وحشي حیواناتو د ساتنې خبر ورکوي، خو وخت ناوخته د افغانستان په بېلابېلو ولایتونو کې د ناقانونه ښکار او له چاپېریال سره د ناوړه چلند راپورونه ورکول کېږي.