د لاسرسۍ وړ لېنکونه

تازه خبر
پنجشنبه ۷ چنګاښ ۱۴۰۳ کابل ۱۰:۲۷

افغانستان

ډبلیوایف‌پي: د بودیجې کمښت له کبله میلیونونو اړو افغانانو ته مرستې نه شو رسولی

ارشیف: پر اړمنو افغانانو د خوړو نړیوال پروګرام د مرستو د وېش له بهیره یو انځور
ارشیف: پر اړمنو افغانانو د خوړو نړیوال پروګرام د مرستو د وېش له بهیره یو انځور

د خوړو نړیوال پروګرام یا "ډبلیوایف‌پي" وایي، د بودیجې د کموالی له امله نه‌شي کولای چې په افغانستان کې میلیونونو اړو کسانو ته د خوړو مرستې ورسوي.

د افغانستان لپاره د دې پروګرام څانګې پرون چهارشنبې په خپله ایکسپاڼه یا پخواني ټویټر کې لیکلي چې تر اکټوبر میاشتې پورې به یوازې یو میلیون کسانو ته د خوړو مرستې ورسوي.

خو دې پروګرام ویلي چې په افغانستان کې له ۱۲ میلیونه زیات وګړي د ژوندي پاتي کېدو لپاره د ژوند ژغورنې مرستو ته اړ دي.

د خوړو نړیوال پروګرام یوځل بیا پر بسپنه ورکوونکو غږ کړې چې ورسره مرستې وکړي ځکه دا پروګرام اوس بېړنیو مالي مرستو ته اړتیا لري.

کرکټ نړیوال جام نیمه پایلوبه؛ افغانستان له جنوبي افریقا سره سیالي کوي

افغان کرکټ ملي لوبډله
افغان کرکټ ملي لوبډله

د افغانستان د کرکټ ملي لوبډله د کرکټ د نړیوال جام سیالیو په لومړۍ نیمه پایلوبه کې نن پنجشنبې له جنوبي افریقا سره سیالي کوي.

دا لوبه د ویسټ اینډیز/ترینداد په تروبا لوبغالي کې د کابل په وخت د سهار په پنځو پیلېږي.

د افغانستان د کرکټ د ملي لوبډلې روزونکي جاناتان ټروټ ویلي چې لوبډلې یې دغې سیالۍ ته ښه تیاری نیولی او تر خپله وسه به هڅه وکړي چې پر سیالې ډلې فشار راوړي.

افغانستان او جنوبي افریقا د ۲۰۱۰م او ۲۰۱۶م کلونو په نړیوالو جامونو کې هم سره مخامخ شوي وو، خو دواړه لوبې جنوبي افریقا ګټلې وې.

د دې جام بله نیمه پایلوبه نن د کابل په وخت د ماښام په اوو بجو د هند او انګلستان تر منځ ترسره کېږي.

رینا امیري: افغان کرکټ ملي لوبډله د افغانانو روح تسخیروي او هیلې ورکوي

د اسټرالیا پر وړاندې د افغان کرکټ ملي لوبډلې د بریا یو انځور
د اسټرالیا پر وړاندې د افغان کرکټ ملي لوبډلې د بریا یو انځور

د افغانستان د ښځو، نجونو او بشري حقونو په برخه کې د امریکا ځانګړې استازې رینا امیري افغان کرکټ لوبډلې ته چې د شل اورونو په نړیوال جام کې نیمه پایلوبې ته رسېدلې ده، مبارکي ورکړې ده.

مېرمن امیري نن په ایکسپاڼه یا پخواني ټویټر کې لیکلي چې د افغان کرکټ د ملي لوبډلې لوبغاړي د افغانانو روح تسخیروي او هیلې ورکوي.

بل لور ته د افغانستان د ملي مقاومت په نوم د جبهې مشر احمد مسعود وایي، ورزش باید سیاسي نه شي.

احمد مسعود په یوه ویډیويي پیغام کې چې په خواله رسنیو کې خپور شوی، د بنګله‌دېش د لوبډلې پر وړاندې د افغانستان د کرکټ د ملي لوبډلې تر بریا پورې وایي چې "ټول لوبغاړي زموږ ویاړونه دي، خدای پاک دې بریالي لري او که خدای کول د کرکټ ملي لوبډله به پایلوبې ته ورسېږي."

د افغانستان د کرکټ ملي لوبډلې د سې شنبې په ورځ بنګله‌دېش ته ماتې ورکړه او ټاکل شوې چې سبا د کابل په وخت د سهار په پنځو بجو به نیمه پایلوبه کې له جنوبي افریقا سره مخامخ شي.

امیري د افغانستان د راتلونکي په تړاو بحثونو کې د ښځو په ګډون ټینګار وکړ

د افغانستان د ښځو، نجونو او بشري حقونو لپاره د امریکا ځانګړې استازې رینا امیري
د افغانستان د ښځو، نجونو او بشري حقونو لپاره د امریکا ځانګړې استازې رینا امیري

د افغانستان د ښځو، نجونو او بشري حقونو لپاره د امریکا ځانګړې استازې رینا امیري وایي، د دغه هېواد د راتلونکې په اړه بحثونو کې د ښځو له ګډون پرته د سولې، امنیت او تلپاتې افغانستان حل لارې نه شته.

هغې دا خبره پرون سه شنبه د جون ۲۵مه پر خپله ایکس پاڼه یا پخواني ټویټر لیکلې ده.

مېرمن امیري په ډیپلوماسۍ کې د ښځو د نړیوالې ورځې په مناسبت په تاریخ کې د افغان ښځو د ونډې یادونه کړې ده.

د جون ۲۴مه، په ډيپلوماسۍ کې د ښځو نړیواله ورځ نمانځل کېږي.

رینا امیري دغه څرګندونې داسې مهال کوي چې افغان مېرمنې د دوحې د راتلونکې غونډې له اصلي بحثونو څخه منع شوې دي.

د دوحې درېیمه غونډه د جون په دیرشمه یا راتلونکې یکشنبه پیلېږي.

د طالبانو د بهرنیو چارو وزارت وایي، د دوی یو پلاوی چې مشري به یې د حکومت ویاند ذبیح‌الله مجاهد کوي، د دوحې په غونډه کې ګډون کوي.

کرکټ نړیوال جام نیمه پایلوبه؛ ټروټ: افغان لوبډله په دې پړاو کې هم خپلو هڅو ته دوام ورکوي

افغان کرکټ ملي لوبډله د اسټرالیا ته له ماتې وروسته د خوشحالۍ پر مهال
افغان کرکټ ملي لوبډله د اسټرالیا ته له ماتې وروسته د خوشحالۍ پر مهال

د افغانستان د کرکټ د ملي لوبډلې روزونکی جوناتان ټروټ د شل اووریز نړیوال جام په نیم پایلوبه کې له جنوبي افریقا سره د افغانستان د لوبې په درشل کې ویلي چې افغان لوبغاړي به په دې پړاو کې هم خپلو هڅو ته دوام ورکړي.

ټروټ، چې په جنوبي افریقا کې زېږېدلی او د انګلستان د ملي لوبډلې بیټسمن یا توپوهونکی پاتې شوی فرانس‌پرېس خبري آژانس ته ویلي چې افغان ملي لوبډله داسې مهال دې لوبې ته ورروان دی چې د نړیوال جام په نیم پایلوبه کې د ماتې یا بریا سابقه نه لري.

هغه همداراز ویلي چې په نیم پایلوبه کې سیالي د افغان لوبډلې لپاره یوه نوې تجربه ده نو ځکه دا لوبډله کېدای شي ډېره خطرناکه وي ځکه دا لوبډله ډېر څه نه لري چې له لاسه یې ورکړي نو سیاله لوبډله به تر فشار لاندې وي.

په پام کې ده چې د افغانستان او جنوبي افریقا لوبډلې سبا د کابل په وخت د سهار په پنځو بجو سره مخامخ شي.

افغانستان او جنوبي افریقا د ۲۰۱۰م او ۲۰۱۶م کلونو په نړیوالو جامونو کې هم سره مخامخ شوي وو، خو دواړه لوبې جنوبي افریقا ګټلې وې.

سبا سهار د افغانستان او جنوبي افریقا ټیمونه سیالي لري

د افغانستان لوبغاړي د یوې مخکېنۍ لوبې پر مهال
د افغانستان لوبغاړي د یوې مخکېنۍ لوبې پر مهال

د کرکټ نړیوال جام لومړۍ نیمه پایلوبه کې سبا سهار وختي د افغانستان او جنوبي افریقا ټیمونه سره مخ کېږي.

دا لوبه د ویسټ اینډیز/ترینداد په تروبا سټډيوم کې د کابل په وخت د سهار په پنځو پیلېږي.

بله نیمه پایلوبه د هند او انګلستان تر منځ سبا ماښام ترسره کېږي.

د نیمه پایلوبې ټیمونو ته که ماته خوري د کرکټ نړیوالې شورا له خوا ۷۸۷زره امریکايي ډالره ورکول کېږي او فاینل ته په وتلو یو میلیون او ۲۸۰زره ډالره خپلوي، خو که فاینل او جام وګټي دوه میلیون او ۴۵۰ زره ډالره جایزه به خپلوي.

په دې سربېره د ګروپي او اتو غوره پړاو هر بري ته د کرکټ نړیوالې شورا څه باندې ۳۱زره ډالره جایزه ورکړې.

طالبانو په پروان کې درې کسان په درو وهلي او په درې کاله بند یې محکوم کړي

د افغانستان په عمومي نقشه کې د پروان ولایت موقعیت
د افغانستان په عمومي نقشه کې د پروان ولایت موقعیت

د طالبانو سترې محکمې خبر ورکړی چې د سه شنبې په ورځ یې په پروان ولایت کې درې کسان په ۳۹-۳۹ درو وهلي او په درې کاله بند یې محکوم کړي.

محکمې ادعا کړې چې په پروان کې یوې ښځې ته له کوره د تېښتې او دوو نورو کسانو ته د غلا په تور دا سزاوې ورکړل شوي.

د طالبانو سترې محکمې همداراز په یوه بله اعلامیه کې تایید کړې چې د هرات په اوبې ولسوالۍ کې هم د دوشنبې په ورځ یوه ښځه د دې محکمې د ادعا له مخې د زنا په تور په ۳۹ دُرو ووهل شوه.

طالبانو له بیا واکمنېدو وروسته د ګڼو ښځو په شمول لسګونه کسان په عام محضر کې په درو وهلي او سزاوې یې ورکړي دي.

د بشري حقونو مدافع بنسټونه د طالبانو قضايي دستګاه تورنوي چې تورن کسان عدالت ته له لاسرسي پرته په صحرايي محکمو کې په سزا رسوي او په دې برخه کې چاته ځوابګویه نه دي.

کرزی د شاوخوا ۴۰ ورځو بهرنیو سفرونو وروسته بېرته کابل ته ستون شوی

د افغانستان پخوانی ولسمشر حامد کرزی
د افغانستان پخوانی ولسمشر حامد کرزی

د افغانستان پخوانی ولسمشر حامدکرزی تر شاوخوا ۴۰ ورځو وروسته له بهرنیو سفرونو بېرته کابل ته ستون شوی دی.

د کرزي یوه مشاور او نږدې همکار شهزاده مسعود ازادي راډیو ته تایید کړه چې کرزی سه شنبه ناوخته له امریکا متحده ایالتونو کابل ته ورسېد.

کرزی د ثوریا غويي په وروستیو کې د سترګو د عملیات لپاره جرمني ته تللی و او تر هغه وروسته یې د خپل ورور د جنازې په مراسمو کې د ګډون لپاره امریکا متحده ایالتونو ته هم سفر وکړ.

هغه د طالبانو له بیا واکمنېدو وروسته له خپلې کورنۍ سره په کابل کې اوسېږي.

دی د طالبانو د حکومت له‌خوا څو ځله له بهرنیو سفرونو راګرځول شوی او شاوخوا یو کال یې بهر ته د تلو اجازه نه درلوده.

کرزي د طالبانو له بیا واکمنېدو وروسته یو وار مخکې هم د ۱۴۰۱ کال په لیندۍ یا قوس میاشت کې جرمني او ترکیې ته سفرونه کړي او له یو شمېر سیاستوالو سره یې لیدلي وو.

طالبانو په فاریاب کې د یوه ځوان د شکنجې په تور شپږ کسان نیولي

د افغانستان په عمومي نقشه کې د فاریاب ولایت موقعیت
د افغانستان په عمومي نقشه کې د فاریاب ولایت موقعیت

د طالبانو د کورنیو چارو وزارت ویلي، د فاریاب په بلچراغ ولسوالۍ کې د یوه ځوان د شکنجې په تور شپږ کسان نیول شوي.

د دغه وزارت ویاند عبدالمتین قانع سه شنبه مازیګر په خپله ایکسپاڼه لیکلي چې د څلورو نورو شکمنو د نیولو لپاره هم د دوی پولیس هڅې کوي.

عبدالمتین قانع د دغه کس د شکنجې پېښه یوه شخصي او ټولنیزه دښمني بللې، خو ویلي یې دي چې دا ډول بې‌رحمانه شکنجه په هېڅ صورت د توجیه وړ نه ده او له عاملینو سره یې جدي چلند کېږي.

په خواله رسنیو کې د یوه ځوان څو ټکان ورکوونکي بربنډ عکسونه خپاره شوي چې د ادعاوو له مخې د طالبانو محلي ځواکونو له یوې نجلۍ سره د ټيلیفوني اړیکو په تور په بې‌رحمۍ شکنجه کړی او لاسونه یې ورتړلي دي.

متقي افغان لوبډلمشر ته؛ طالبان غواړي څو سپورټ له سیاست څخه لیرې وي

افغان کرکټ ملي لوبډله
افغان کرکټ ملي لوبډله

د کرکټ د شل اووریز نړیوال جام نیم پایلوبې ته د افغان ملي لوبډلې له پرمختګ وروسته د طالبانو د حکومت د بهرنیو چارو وزیر ویلي چې دوی غواړي سپورټ له سیاست څخه لیرې وي.

په هغه ویډیو کې چې د بهرنیو چارو وزارت مرستیال ویاند حافظ ضیااحمد پر خپله ایکس پاڼه خپره کړې، متقي په داسې حال کې ښکاري چې له لوبډلمشر راشدخان سره خبرې کوي.

افغانستان د ۲۰۲۴ کال د ۲۰ اووریز نړیوال جام د اتو غوره لوبډلو په وروستۍ سیالي کې له بنګلدېش څخه لوبه وګټله او نیم پایلوبې ته ورسېد.

که څه هم افغانستان چې لومړی یې بېټینګ وکړ، نسبتاً ټیټ یعنې د ۱۱۶ منډو هدف ټاکلی و، خو بالرانو د بنګله‌دېش پر لوبغاړو فشار زیات کړ او پرې یې‌ نه‌ښودل چې ټاکلی هدف پوره کړي.

افغانستان به د پنجشنبې په ورځ د جون ۲۷مه د کابل د سهار په ۵ بجو په نیم پایلوبه کې له جنوبي افریقا سره مخامخ شي.

د نیم پایلوبې دوهمه لوبه به هم د پنجشنبې په ورځ د هند او انګلستان ترمنځ وي.

نور راوښيه

XS
SM
MD
LG