با خبره سرچینو ازادي راډیو سره خبرو کې د طالبانو لخوا په کابل کې زرقا یفتلي په مشرۍ " د ښځو او ماشومانو د تحقیقاتي بنسټ" د شپږو کارکوونکو نیول کیدل تایید کړل.
یادو سرچینو د پنجشنبې په ورځ وویل چې د شپږو ورځو په تیریدو سره هم دیادو کسانو برخلیک څرګند نه دی.
سرچینو زیاته کړه چې د طالبانو کسانو ددغه بنسټ په دفتر چاپه واچوله او یو شمیر تجهیزات ، اسناد او کاري وسایل یې هم له ځان سره یوړل.
د ښځو د زده کړو د فعالې زرقا یفتلي په مشرۍ یاد بنسټ، دښځواو ماشومانو د وضعیت او حقوقو په اړه څیړنیز رپوټونه برابرول.
طالب چارواکو ددغه بنسټ د کارکوونکو د نیول کیدو په اړه تراوسه څه نه دي ویلي.
زرقا یفتلي تیرکال دمتحدو عربي اماراتو لخوا "د بشري پیوستون لپاره دزاید د ۲۰۲۶ کال" بین المللي جایزه وګټله.