افغانستان ته د کډوالو د بېرته ستنولو پر موضوع د بحث لپاره، اروپايي کمېسیون پلان لري چې په نږدې راتلونکي کې د طالبانو چارواکي بروکسل ته د تخنیکي خبرو لپاره ور وبولي. د راپورونو له مخې، کابل ته به ډېر ژر یو رسمي لیک واستول شي څو د دې غونډې نېټه وټاکل شي.
دا ګام په داسې حال کې اخیستل کېږي چې شاوخوا ۲۰ اروپايي هېوادونه د افغان کډوالو، په ځانګړي ډول هغوی چې په اروپایي هیوادونو کې یې جرمونه ترسره کړي، د بېرته ستنولو لارې چارې ارزوي. بلخوا، د بشري حقونو سازمانونو خبرداری ورکړی چې افغانستان کې روان بشري بحران ته په کتو، د کډوالو جبري ستنول ښايي جدي بشري ستونزې رامنځته کړي.