د سوریې لپاره د متحدوایالتونو ځانګړی استازی ټام بارک وايي په پام کې ده چې د سوریې ولسمشر احمدشرع په نژدې ورځو کې واشنګټن ته سفر وکړي.
بارک پرون په بحرین کې خبریالانو ته د څرګندونو پرمهال هیله څرګنده کړه چې د دې سفر په ترڅ کې به سوریه د اسلامي دولت ډلې یا داعش د ځپلو لپاره د امریکا په مشرۍ ایتلاف سره یوځای شي.
رویټرز خبري آژانس د سوریې د یوې سرچینې له قوله راپور ورکوي چې وايي تمه ده دا سفر به په راتلونکو دوو اونیو کې ترسره شي.
د امریکا د بهرنیوچارو وزارت د بهرنیو مشرانو د سفرونو د تاریخ د لیست له مخې د سوریې هیڅ یوه ولسمشر تراوسه واشنګټن ته رسمي سفر نه دی کړی.
شرع په تېره سپتمبر میاشت کې په نیویارک کې د ملګرو ملتونو عمومي اسامبلې ته وینا کړې وه.