د طالبانو د حکومت یو پلاوی د ایکو د اقتصادي همکارۍ د سازمان په غونډه کې د ګډون لپاره آذربایجان ته تللی دی.
په یوه بیان کې چې د ریاست الوزرا د اقتصادي معاونیت دفتر خپور کړی راغلي، یاد پلاوی چې په اقتصادي چارو کې د رییس الوزرا لومړی مرستیال ملاعبدالغني برادر یې مشري کوي پرون د پلازمېنې باکو د حیدرعلي یوف نړیوال هوايي ډګر ته ورسېد.
د اقتصادي همکاریو د سازمان غونډه سبا او بل سبا (د چنګاښ ۱۲- ۱۳) په باکو کې جوړېږي. د طالبانو د اعلامیې له مخې د ایکو په غونډه کې د سوداګرۍ، د انرژۍ د لېږد، ترانسپورت او ترانزیت، کرنې او چاپېریال، د اقلیمي بدلونونو پر وړاندې د مبارزې او نورو مسایلو په اړه خبرې په پام کې دي.
په ایکو سازمان کې پر افغانستان سربېره ایران، ترکیه، پاکستان، تاجکستان، ازبکستان، قرغزستان، ترکمنستان، قزاقستان او آذربایجان غړیتوب لري.