افغانستان په چمپیینز ټرافي سیالیو کې نن له اسټرالیا سره لوبه کوي.
دا لوبه چې د افغانستان لپاره برخلیک ټاکونکې ده، د لاهورښار په قذافي لوبغالي کې د افغانستان په وخت یوه نیمه بجه پیلیږي.
افغانستان په دوهمه لوبه کې د چهارشنبې په ورځ انګلستان ته ماتې ورکړه چې ورسره په دې جام کې د پاتیدو هیلې زیاتې شوې.
د افغانستان د کرکټ ملي لوبډلې کپتان حشمت الله شهیدي د انګلستان پر وړاندې له بریا وروسته پرون پنجشنبې خبریالانو ته وویل چې په دغې بریاسره
د ملي لوبډلې روحیه لا پیاوړې شوې او هڅه به وکړي چې له اسټرالیا سره راتلونکې لوبه هم وګټي.
ښاغلي شهیدي دا لوبه د دې سیالیو بل پړاو ته د تلو لپاره مهمه وبلله. د دې لوبې ګټونکې لوبډله به نیمه پایلوبې ته لاره پیدا کړي.
افغانستان په بي ګروپ کې له جنوبي افریقا، اسټرالیا او انګلستان سره لوبیږي.
تراوسه جنوبي افریقا او اسټرالیا د جدول په سرکې دي.