د پوځ مطبوعاتي دفتر آی اس پي آر ادعا کړې چې دغو بریدګرو غوښتل د بلوچستان له ژوب سیمې سره د پاکستان خاورې ته ننوځي چې د پاکستاني پوځیانو له خوا هدف وګرځېدل.
د پاکستان پوځ په دغه بیان کې یو وار بیا ویلي چې افغانستان کې د طالبانو له حکومت غواړي د خپلې خوا پولې امنیت ونیسي. د پاکستان د پوځ بیان زیاتوي چې د طالبانو حکومت باید خپل مسوولیت ادا او اجازه ورنکړي چې له افغان خاورې د پاکستان ضد فعالیت ترسره شي.
د طالبانو حکومت بیا مخکې په وار وار ویلي هیڅ ډلې ته به اجازه ورنکړي چې د ګاونډیو هیوادونو امنیت ته د ګواښ لپاره د افغانستان خاوره وکاروي.
د پاکستان پوځ داسې وخت دا ادعا کړې چې تېره اوونۍ یې د کونړ ګڼې سرحدي سیمې په توپونو ویشتلي او تر هغه مخکې یې هم په پکتیکا کې بمباري کړې.
د دغو پرله پسې سرحدي نښتو له امله د پاکستان او افغانستان ترمنځ اړیکې ډېرې ترینګلې شوې دي.