د ایران له ملاتړه برخمنې حزبالله ډلې د اسراییلو په یوه هوایي برید کې د خپل ویاند محمد عفیف وژل کېدل تایید کړل.
د جرمني خبري اژانس د حزب لله د ټلېګرام چېنل په حواله ویلي چې، هغوی محمد عفیف د رسنیو د برخې او سیاست "پیاوړی" کارکونکی یاد کړی دی.
حزبالله چې یوه سیاسي او پوځي ډله ده د امریکا لهخوا د ترهګرو په توګه پېژندل کېږي، خو اروپایي ټولنې یې یوازې پوځي برخه تور لېست کې شامله کړې ده.
حزبالله چې د لبنان پر جنوب واکمنه ده، د دغه هېواد په پارلمان کې استازي هم لري.
له کله چې د اسراییلو د پوځ او حزبالله جګړه پيل شوې، اسراییلو دغې ډلې ته د سر او مال دروند زیان اړولی دی.
اسراییلو د تېرې سپتمبر میاشتې په وروستیو کې د حزبالله مشر حسن نصرالله هم په یوه ورته برید کې وواژه.