په فیلیپین کې د ټرامي په نوم د استوايي توفان پر مهال د سختو سېلابونو او ځمکې ښویېدو له امله د مړو او تري تم شویو شمېر نږدې ۱۳۰ کسانو ته ورسېد.
د فیلیپین د طبیعي پېښو پر وړاندې د مبارزې ادارې ویلي، توفان د جمعې په ورځ د دغه هېواد په شمال لوېدیځ کې پیل شو چې لږ تر لږه ۸۵ کسان یې تراوسه پورې مړه کړي او ۴۱ نور تري تم دي.
اټکل دی چې د مړو شمېر زیات شي.
په لسګونو پولیسو، اور وژونکو او د بېړنیو خدماتو نورو کارکوونکو پرون د باتانګاس ولایت په تالیسي ښارګوټي کې د دوو ویجاړ شویو کلیو له جملې په یوه کې د ژغورنې عملیاتو ته دوام ورکړ.