د ایران د بشري حقونو سازمان وایي چې په تېرو دوه اوونیو کې ایران ۱۰ افغانان اعدام کړي دي.
د دې سازمان مشر محمود امیری مقدم نن د اکتوبر ۲۳مه ازادي راډیو ته په دې تړاو وویل: "د اکتوبر په میاشت کې لږ تر لږه لس افغانان د ایران په زندانونو کې اعدام شول او لکه څنګه چې موږ خبرې کوو، یو بل افغان د اعدام لپاره قزل حصار زندان ته لېږدول شوی دی. موږ په دې اړه نور معلومات نه لرو."
مقدم زیاته کړه چې ددې سازمان دمعلوماتو له مخې، د روان میلادي کال له پیله تر اوسه په ایران کې ۴۵ افغانان اعدام شوي دي.
هغه ایران کې د افغانانو د اعدام شمېر زیاتېدو ته په کتو اندېښنه ښکاره کړه او وویل چې په ۲۰۲۳م کې ۲۶ افغانان او په ۲۰۲۲ کې ۱۶ افغانان په ایران کې اعدام شوې دي.
د ایران د حکومت له لورې د اعدامونو زیاتېدونکي شمېر د بشري حقونو د سازمانونو اندېښنې راپارولې دي.