د پیسو د نړیوال صندوق IMF اجراییه بورډ د اوکراین لپاره یو میلیارد ډالره پور تأیید کړ.
تمه ده چې دا پیسې به د جګړه ځپلي اوکراین د بودیجې پر اړتیاو ولګول شي.
دا پور د څلورو کلونو په اوږدو کې اوکراین ته د ۱۵،۵ میلیارد ډالرو په ارزښت د پور د روان پلان یوه برخه ده، چې د تېرکال په مارچ میاشت کې تصویب شو.
د IMF اجراییه مشرې کریستالینا ګیورګییوا پرون په یوه بیان کې وویل، پر اوکراین د روسیې د یرغل په نتیجه کې د دې هېواد د ټولنیزو او اقتصادي برخو ویجاړېدل دوام لري.
آیايمايف ویلي دي چې، اوکراین د مالیاتو په برخه کې د تشکیلاتي اصلاحاتو په ګډون د دې بانک د پور د ترلاسه کولو ټول معیارونه پوره کړي دي.