د پاکستان یوې محکمې پرون په ضمانت له زندانه د پخواني صدراعظم عمران خان او د هغه د مېرمنې بشرا بي بي د خوشې کولو غوښتنه رد کړه.
دا خبره د خان مدافع وکیل رسنیو ته وکړه.
دا د پاکستان پر پخواني صدراعظم یو بل ګوزار دی چې په ګڼو تورونو له یوه کال راهیسې په زندان کې دی.
عمران خان له ۲۰۲۲م کال راهیسې چې د پاکستان په پارلمان کې د نه باور رایې له لارې له دندې ګوښه شو، په ۱۵۰ قضیو محکوم شوی دی.
په هغه وخت کې په پارلمان کې د عمران خان ډېرو متحدینو له هغه مخ وګرځاوه.
هغه د پاکستان پوځ او خپل اصلي سیال، اوسنی صدراعظم شهباز شریف تورنوي چې د امریکا د یوې دسیسې پر اساس یې د ده حکومت مات کړ.
دا ادعا شریف او امریکا رد کړې.