د افغانستان د بشري حقونو لپاره د ملګرو ملتونو ځانګړی راپور ورکوونکی ریچارډ بینېټ وايي چې قطر ته رارسېدلی دی او ډېر ژر به د افغانستان د وضعیت په اړه د افغانانو له بېلابېلو ډلو او استازو سره وګوري.
د طالبانو حکومت د روان کال د زمري په ۳۱مه نېټه بینېټ د افغانستان په اړوند په ناوړه تبلیغاتو تورن کړ او د هغه پر سفر یې بندیز ولګاوه.
بېنېټ نن د وږي ۱۲مه پر خپله ایکسپاڼه ولیکل چې دی قطر ته رسېدلی او ډېرژر به له افغان مېرمنو او نارینهوو، کارپوهانو او حکومتي چارواکو سره خپلې لیدنې کتنې پیل کړي.
هغه په ترکیه کې د تېرو څو ورځو لیدنې کتنې هم ګټورې بللي، خو هغه دا نه دي ویلي چې دا لیدنې کتنې له چا سره وې.
ریچارډ بېنېټ د ۲۰۲۲م کال د مې په لومړۍ نېټه د افغانستان د بشري حقونو په چارو کې د ملګرو ملتونو د ځانګړي راپور ورکوونکي پردنده وګومارل شو.
هغه د خپل ماموریت په ترڅ کې څوځلې افغانستان ته ګڼ سفرونه وکړل او هرځل یې د طالبانو حکومت له بشري حقونو او په ځانګړي ډول د ښځو له حقونو په سرغړونو تورن کړی دی.