قطر له جرمني څخه د ۲۸ افغانانو د اخراج په اړه د جرمني او طالبانو د حکومت تر منځ په خبرو کې مرسته کړې ده.
الجزیرې د شنبې په ورځ پهدې اړه یو راپور ورکړ.
په راپور کې د قطر د بهرنیو چارو د وزارت د یوه چارواکي په حواله راغلي، چې قطر پهدې برخه کې د جرمني په غوښتنه همکاري کړې ده.
د قطر هوايي شرکت د جمعې په ورځ د جرمني له لایپزګ ښار څخه د جنايي فعالیتونو په تور ۲۸ افغانان د کابل هوايي ډګر ته انتقال کړل.
جرمني د طالبانو له رژیم سره، چې د بشري حقونو په ځانګړې توګه د ښځو او نجونو د حقونو په پراخو سرغړونو تورن دی، ډیپلوماټیکې اړیکې نهلري.
د قطر د بهرنیو چارو وزارت یوې سرچینې ویلي، د قطر دنده دا وه چې د دواړو لورو ترمنځ پیغامونه تبادله کړي او اخراج شویو افغانانو ته زمینه برابره کړي چې خپل وروستي منزل ته ورسیږي.
دا په تېرو دریو کلونو کې په افغانستان د طالبانو له بیا واکمنېدو وروسته له جرمني څخه د افغانانو د اخراج لومړۍ پېښه ده.