ایټالیایی ډاکټر جولین کلیفاتو به له نیوزیلنډ سره د ټسټ لوبې پرمهال د افغانستان د کرکټ د ملي لوبډلې د فزیو تراپي چارې مخته وړي.
د افغانستان کرکټ بورډ اعلان کړی دی، چې په جنوبي افریقا کې مېشت دا ایټالیایی ډاکټر یې د هندي فزیوتراپست پرشانت پنچاډا په ځای ټاکلی دی.
د افغانستان د کرکټ ملي لوبډله له نیوزیلنډ سره د ټسټ لوبې لپاره د اګست په اتهویشتمه هند ته روانه شوه چې تمرینات ترسره کړي.
د افغانستان او نیوزیلنډ ترمنځ یوه ټسټ لوبه په پام کې ده چې د سپتمبر په نهمه به د هند په ګریټر نویډا کې ترسره شي.
دا لومړي ځل دی چې نیوزیلنډ له افغانستان سره ټسټ سیالي کوي.