د طالبانو لوی درستیز وایي، د تحریک طالبان پاکستان ډله د افغانستان له خاورې نه، بلکې د پاکستان له دننه بریدونه کوي او خپلې طرحې جوړوي.
فصیحالدین فطرت د دفاع وزارت د یو کال د لاستهراوړنو د تشریح په پروګرام کې نن په کابل کې د پاکستان دا ادعا یو ځل بیا رد کړه چې د (ټيټيپي) وسلهوال د افغانستان دننه فعاله دي.
هغه وويل: "ټيټيپي په پاکستان کې ښکاره مرکزونه لري، سیمې یې نیولې دي او له هغو ځایونو د پاکستان پر پوځیانو او حکومتي ځایونو بریدونه کوي."
د پاکستان صدراعظم شهباز شریف یوه ورځ مخکې تر دې څرګندونو وویل چې ټيټيپي د افغانستان له خاورې د پاکستان دننه خپل بریدونه تنظیموي.
تر دې مخکې هم پاکستاني چارواکو بیا بیا ویلي وو، چې د تحریک طالبان پاکستان وسلهوال د افغانستان دننه په سرحدي سیمو کې ځای پر ځای شوي دي او له هغه ځایه د پاکستان دننه بریدونه کوي.