په درینا سنید کې د کډوالو د یوې کښتۍ د ډوبېدو په پېښه کې د مړو شویو کسانو شمېر لسو ته پورته شو.
د سربیا د کورنیو چارو وزیر ولادان رانیک ویلي، ژغورونکي توانېدلي، ۱۸ کسان چې درې يې ماشومان دي، وژغوري.
د هغه په خبره، د لسو کسانو جسدونه، چې یو يې نهه میاشتی ماشوم دی، له اوبو راویستلي دي.
سربیايي چارواکو د ازادې اروپا/ازادي راډیو ته ویلي، دا کښتۍ چې غیرقانوني کډوال په کې سپاره وو، د سربیا او بوسینا ترمنځ په درینا سیند کې ډوبه شوې ده.
که څه هم په کښتۍ کې د سپرو کسانو شمېر مشخص نه دی، خو ژغورل شویو کسانو ویلي، ټول ۲۵ کسان په کښتۍ کې وو.
سربیا او بوسینا لوېدیځي اروپا ته د کډوالو د رسېدو تر ټولو لویه لار ده.
وخت ناوخت پر دې لار افغان کډوال هم د بېلابېلو پېښه له کبله ژوند بایلي.