د اسیا فوټبال فدراسیون د خبر پر اساس د افغانستان د اولس کلنو ځوانانو د فوټبال ملي لوبډلې د مرکزي اسیا "کافا" سیالیو پایلوبې ته لار پیدا کړه.
د افغانستان د اولس کلنو ځوانانو ملي لوبډلې د اکست په ۲۱مه نېټه د کابل پر وخت ماسختن ۹:۰۰ بجې د تاجکستان لوبډلې ته په یاد هېواد کې ۱-۰ ماتې ورکړه.
افغانستان د ساحل سروري د ګول پر مټ پایلوبې ته ورسېد.
په پلان کې ده چې افغان لوبډله به د ازبکستان پر وړاندې پایلوبه ولوبوي.
ازبکستان هېواد بیا ایران ته په ماتې ورکولو سره پایلوبې ته لار پیدا کړې ده.
افغان لوبډلې درې ورځې وړاندې د قرغیزستان پر وړاندې ۲-۰ بریا خپله کړې وه.
د مرکزي اسیا سیالۍ چې د شپږو هېوادونو ترمنځ پیل شوي، د روانې اکست میاشتې په ۲۴مه نېټه به یې پایلوبه ترسره شي.