د طالبانو حکومت د روغتیا وزارت په افغانستان کې د بیزو تڼاکې په نوم د ناروغۍ د مخنیوي لپاره د تدابیرو په اړه بحث کړی دی.
باختر اژانس چې طالبان یې اداره کوي خبر ورکوي چې، د روغتیا وزارت سرپرست مولوي نورجلال جلالي له چارواکو سره په یوه غونډه کې د دې ناروغۍ د مخنیوي پر لارو چارو خبرې کړې دي.
د راپور لهمخې، تر اوسه په افغانستان کې د بیزو تڼاکې د ناروغۍ کومه پېښه نهده ثبت شوې.
د روغتیا نړیوال سازمان "WHO" د زمري په ۲۵مه د دې ناروغۍ د سرایت له کبله د افریقا په ځینو برخو کې بېړنی حالت اعلان کړی دی.
همدارنګه، اسیا او اروپا ته د دې ناروغۍ د خپرېدو خبر هم ورکړل شوی.
د بیزو کوڅوک یا د بیزو تڼاکې د ناروغ انسان سره د جنسي اړیکې، د پوستکي، خبرو او تنفس په څېر د تماس له بېلابېلو لارو انتقالېږي.
دا ناروغي چې زکام او جلدي کوڅوک ته ورته نښې لري، د مرګ سبب هم کېدای شي او په هر سلو کې یو ناروغ وژلی شي.
د بیزو تڼاکې د واکسین په وسیله وقایه کېدای شي.