د اوکراین په جنوب کې د روسیې تر کنټرول لاندې د زاپوریژیا د اټومي تاسیساتو د یخولو په یوه برج کې پرون اور ولګېد چې مسوولین هغه خطرناک نه بولي.
روسي چارواکو ویلي چې، د اوکراین یو توغندی پر دې تاسیساتو لګېدلی خو کییف دغه ادعا رد کړې ده.
د دې تاسیساتو مسوولینو ویلي، اور لا هم بل دی خو هغه په خوندي توګه د دې تاسیساتو فعالیت له خطر سره نهدی مخامخ کړی.
اوکرایني چارواکو ویلي، داسې غیر رسمي معلومات یې ترلاسه کړي چې روسي ځواکونو د دې تاسیساتو د یخولو په برجونو کې د موټرو ګڼو ټایرونو ته اور اچولی دی.
د اوکراین ولسمشر ولودمیر زیلینسکي ویلي، د وړانګو شاخصونه د دې اټومي بټۍ لپاره نورمال ښکاري.
پر دغو تاسیساتو روسي ځواکونو د ۲۰۲۲م کال په فبرورۍ کې پر اوکراین د یرغل په لومړیو کې ولګه ټینګه کړې ده.