د ایران د عدلیې وزارت هغه راپورونه رد کړل چې پهکې ویل شوي وو، په تهران کې د حماس ډلې د مشر اسماعیل هنيه د وژنې په تړاو شکمن کسان نیول شوي دي.
د دې وزارت ویاند اصغر جهانګیر نن خبریالانو ته وویل، د هنيه د وژنې په اړه په رسنیو کې خپاره شوي راپورونه ناسم دي او تر اوسه هیڅوک پهدې تړاو نهدي نیول شوي.
جهانګیر د حماس ډلې د مشر د وژل کېدو د قضیې په اړه نور جزیات ور نهکړل.
امریکا او اروپايي ټولنه حماس وسلهواله ډله ترهګریز سازمان ګڼي.
اسماعیل هنيه د اسد میاشتې په لسمه په تهران کې په یوه پوځي مېلمستون کې ووژل شو.
داسې ښکاري چې د ایران د عدلیې وزارت ویاند اشاره د نیویارک ټایمز هغه راپور ته وه، چې د اسد په ۱۳مه يې د دوو ایراني سرچینو په حواله ویلي وو، د تهران له پوځي مېلمستون چېرته چې اسماعیل هنيه وژل شوی و، د لوړ پوړو چارواکو په ګډون تر ۲۰ ډېر کسان نیول شوي دي.
په وروستیو کې ایراني چارواکي په وار وار ویلي، اسراییلو د امریکا په مرسته د حماس ډلې مشر اسماعیل هنيه وژلی دی.