د عراق پر عینالاسد اډې په راکټي برید سره پنځه امریکايي پوځیان ټپیان شوي دي.
د یوه ټپي وضعیت نازک بلل شوی دی.
لا هېڅ کومې ډلې د عراق په انبار کې د امریکايي ځواکونو په دې اډې د برید مسوولیت په غاړه نه دی اخیستی.
امریکايي چارواکي بیا د ایران ملاتړې نیابتي ملېشې ډلې د دې ډول بریدونو مسوولې بولي.
د امریکا دفاع وزیر لوېډ اسټن له خپل اسراییلي سیال سره په لیدنه کې دا برید د ایران او د دغه هېواد د نیابتي ډلو لهخوا د کړکېچ خطرناکه زیاتول یاد کړي.
د دوشنبې په شپه ناوخته دوه راکټه پر عینالاسد اډې لګېدلي او یو بل دې اډې ته نږدې په یوه کلي لوېدلی.
دا وروسته تر هغه چې د ایران ملاتړې یوې ملېشه ډلې څلور قومندانان د امریکا په برید کې ووژل شول او په تهران کې د حماس سیاسي مشر اسماعیل هنیه هم په یوه برید کې ووژل شو.
ایران او حزبالله تر دغو بریدونو وروسته له اسراییلو د غچ اخیستو ګواښ کړی و.