د پاکستان پوځ اعلان وکړ چې امنیتی ځواکونو یې د روان کال له پیل راهیسې په هېواد کې د ترهګرو ډلو پر ضد ۲۳زره ۶۲۲ عملیات کړي دي.
د پاکستان د پوځ ویاند احمد شریف چوهدری پرون دوشنبې په یوه خبری غونډه کې وویل چې په یاده موده کې د پاکستان ۱۳۹ پوځیان وژل شوي دي.
د ده په وینا، پوځ یوازې په تېرو ۱۵ ورځو کې ۲۰۴۵ عملیات کړي دي.
ده دا هم وویل چې په تېرو ۱۵ ورځو کې ۲۴ "ترهګر" وژل شوي دي.
چودري همداراز وویل، د ترهګرۍ د پای ته رسولو لپاره پوځ، پوليس او نورې ادارې هره ورځ تر سلو زيات عملیات کوي.
د پاکستان د پوځ خلاف په خیبرپښتونخوا کې اکثره بریدونه د ټيټيپي یا تحریک طالبان پاکستان ډله کوي.