په سومالیا کې پولیسو نن ویلي چې، په پلازمېنه موګدیشو کې تېر ماښام پر یوه ساحلي هوټل په حمله کې ۳۲ کسان وژل شوي او ۶۳ نور ژوبل شوي دي.
د پولیسو ویاند عبدالفتاح عدن حسن خبریالانو ته ویلي، په حمله کې یو سرتېری هم وژل شوی او پاتې وژل شوي کسان ملکیان دي.
د حسن په وینا په ټپیانو کې هم یو سرتېری شامل دی.
عیني شاهدانو ویلي چې، تر ډزو وروسته د چاودنې غږ هم اورېدل شوی دی.
الشباب ډلې چې په ختیځه افریقا کې له القاعده سره اړیکې لري ویلي، چې دا حمله د دوی وسلهوالو کړې ده.
په موګدیشو کې د لیدو په نوم ساحل یوه مشهوره سیمه ده، چې هره جمعه پهکې ګڼه ګوڼه زیاته وي.