په جرمني کې له یوې نوې احصایې سره سم، له ۲۰۱۵ م کال څخه د ۲۰۲۳ تر پایه دغه هېواد ته نژدې یو میلیون سوریه والو پناه وړې.
د اروپا د احصایې د مرکز له راپور سره سم اوس له هرو ۲۰ سوریه والو څخه یو يې په جرمني کې اوسي.
په راپور کې د جرمني د استخدام د فدرالي ادارې د معلوماتو پر اساس ویل شوي، سره لهدې چې سوري کډوالو ژمنې کړې وې چې د جرمني په اقتصاد کې به جذبیږي خو لا هم څه باندې ۵ لکه ۱۳ زره سوري کډوال له حکومت څخه مرسته یا سوسیال اخلي او هغوی چې سوسیال نه اخلي، د کور کرایه او نور امتیازونه لا هم له حکومته ترلاسه کوي.
د جرمني حکومت په ۲۰۲۳ م کال کې پر کډوالو نژدې ۵۰ میلیارد یورو لګولي چې دا د دغه هېواد د بوديجې د پام وړ برخه ده.
د دې احصایې لهمخې، په دغه هېواد کې د افغان پناه غوښتونکو شمېر هم زیات شوی، تر دې چې په ۲۰۲۳ کې ۴ لکه ۱۹ زره ۴۱۰ تنه ثبت شوي چې د ۲۰۱۴ کال شپږ برابره دي.
د دغو افغانانو نژدې نیمايي له حکومت څخه سوسیال اخلي او لوی اکثریت یې د دولت په مرستو ژوند کوي.